Kayinu ana Habila
4
1 Adamu tə piya na mala nyi, Hawa'u, ngə cha hətə huɗəu. Manda cha yiya Kayinu, cha na, <<Təwa vala nə Tlakəu, ya yiyah zərsal.>> 2 Ahir nga, cha yiyah məshikər nyi Habila.Habila tə ɗa ka ndər ɓəla sərshishi, Kayinu tsə'u ndər zwa. 3 Vanya pəchi, ngə Kayinu tə shili na alenya sə zwazwa nyi ka cha mər ga'a ni, nə Tlakəu. 4 Kəl ja, Habila tə shili na yar tangərma inda ku huɗa sərshishi nyi, cha tsəya ga lətə nyi ga'a na mbwar mal mbwar mal nə Tlakəu. Ngə Tlakə tə ngatə məsɗakəkur na Habila ana ga'a nyi. 5 Kəl ja, cha ngyar dləu ga'a nə Kayinu, ngə huɗa Kayinu tə tla gagaɗa, ngə cha ndaltə huɗəma cha.
6 Ngə Tlakə tə jau Kayinu, <<Mya gwa'atə huɗa ka tla? Mya gwa'atə ka ndaltə huɗəma ka? 7 Ma ka mər sənda tsatsa'a ya, a njo dləutsə nghə ma? Kəl ja, ma'a aka mər sənda tsatsa'a wa, jan səpəla'a kwa tsa nyavi ngha, cho i ka cha gəla ngha. Kəl ja, tuku ka gəla nyi.>>
8 Vanya pəchi, Kayinu tə nar nyi nə zamə nyi, <<A mi təra gwa takəu.>> Sakanda nda kwa takəu, Kayinu tə səya zamə nyi Habila na pa, ga tsəya nyi.
9 Ahir nga, Tlakə tə jau Kayinu, <<Aman Habila zamə ngha?>>
Ngə Kayinu tə ɓəlakə nyi, <<A da ya zəndə wa, naya ndər ɓəla zamə ɗa ya?>>
10 Kəl ngə Tlakə tə na, <<Mi ngə mər kə ngana? Ngati! Mashi zamə nghə kwa tiwi na'a hya'atə kya hu'i zədə na'a! 11 Sakana a shu'unda nghə tə nji ga gədlənda nghə tsa hə'i nda tə mbəɗiya nya cha, ga dləutsə mashi zamə nghə ku cha ka. 12 A hə'i da kwa biyandə sə zwazwa mənakə a nə nghə mada aman ka mbadzə ga mər tləra wa! Ko ngya ndə kəla ɓəlsar ndər ma'i kəɓanghəu tə dunəya.>>
13 Kayinu tə na, <<Ɓwaɓwatə ngə ndiya tə dunama ɗa, a yo nau sar wa. 14 Ko gədlənda ɗa tsa hə'i, yo mbu tsa ka, yo ɗa ka ndə nda kwa wi kəɓang ku dunəya, ya dəhə ndə nda tə la'a ɗa cho tsəya ɗa.>>
15 Kəl ja, Tlakə tə na, <<Ada əngə wa, dəhə ndə nda tsəya ngha, njo kibiya zhaka məɗəfa təkəra cha.>> Ngə Hyel tə fəndzə nyi vanya ba'ada nə Kayinu tsa madawa tə la'a nyi da ba'a tsəya nyi. 16 Ngə Kayinu tə ngyar mbwa nda Tlakə ti, ga ki ngya tə hə'i Nod təwa zədər pəchi nə fa Edən.
17 Kayinu tə piya na malanyi, ngə cha hətə huɗəu ga yiyah Enok. Aku nda Kayinu kwa hər mələm, ngə cha fədzə nyi tləmər zər nyi nda nə mələm nda. 18 Nja yiyah nyi Irad nə Enok, Irad nacha ngə adanya Mehujael, Mehujael ngə adanya Metusela, Metusela ngə adanya Lamek.
19 Lamek tə hə mahi'i mətləu, tləmər zhang, Adah tləmər vanyi tsə'u Zila. 20 Adah tə yiyah Jabal, Jabal ngə adanya nji inda kwa ngya ku madləɓa, kwa ɓəla sərshishi inda njo gəzə ku ki. 21 Tləmər zamə nyi Jubal, nacha ngə adanya nji inda kwa mbəɗə mbalau. 22 Zila tsə'u tə yiyah Tubal-Kayinu, nacha ngə ndər ɓatlə kala kar tlər nə ndzəa. Tləmər kwamənya Tubal-Kayinu, Naamah.
23 Lamek tə nar nyi nə mahi'i nyi,
<<Adah ana Zila, səya ma himi da ya,
mahi'i Lamekəu, ngatə ma ɓwanya ɗa.
Ya tsəya vanya ndəu, aka cha fəndzə ɗa kəti, ana tlakala, aka cha takasiya ɗa.
24 Macha njo kibiya nyi nə Kayinu zhaka məɗəfa,
yau, nə Lamek nənyi, zhaka məɗəfəkumnyi parnya məɗəfa.>>
25 Adamu tə ɓəla piya na mala nyi, nga cha yiyah vanya zər. Cha fəndzə nyi tləm Set, cha na, <<Hyel tə ɓəla tə na'a vanya zər təvəra Habila, nda Kayinu tə tsəya.>> 26 Set tə yiyah zər tsə'u ga fəndzə nyi tləm Enosh.
Aku bəji nda ngə nja ghəya həsili ana nga tləmər Tlakəu.