Yar Musa
2
1 Ku bəji nda, vanya sal ku nyavi Levi tə həbiya vanya malakə tsə'u ku nyavi Levi. 2 Mala nda tə hətə huɗu ga yiya zərsal. Manda cha la'a zər nda gumaguma, ngə cha ɗəwanda nyi nə hya makərəu. 3 Tə nda ɗa a tsə'u cha kwa nau ɗəwanda nyi wa, ngə cha hətə tsəla nda nja tsatə na fəvəl ga hyahibiya ta cha na kwalta. Kəl ngə cha fəu nyi kwa ga gwa pinda nyi ku lya sar walang tə nya Dəl Nilu. 4 Ngə kwamənya zər nda tə tai tanyi naɗəu, cho ɓəla ndara mi kwa ɗa na cha.5 Ngə kwar Təl Fir'auna tə gwa waɗa ku Dəl Nilu nda, nda kwatəra nyi i'i kwa zhuli nya dəl nda, Kəl ngə kwar təl tə la'a tsəla ku lya sar walang, ngə cha sə zhang ku pama kwatəra inda cha hətənyi shili 6 Manda Kwar təl tə mbəɗiya, cha la'a zər kwa tiwi, kəl cha ngatə təhuɗə nyi. Cha na, <<Nənna tuku zang ku huɗa ngulisha'a njir Ibrani innə na.>>
7 Kəl kwamənya zər nda tə shili ləhə dza kwar Fir'auna nda ga na, <<Ya ma'i ya ki gwa'arə nghə zang ku huɗa mahi'i njir Ibrani cha shili ki handə nghə zer nə ya?>>
8 Kwar təl tə wum ga na <<Ah, ma'i!>> Kəl ngə kwanda ki nga amanya zər nda. 9 Kwar təl nda tə nar nyi, <<Handə ɗa zər na yo ki nda ngha.>> Amanya zər nda tə təra na cha kyo ki ga tsamartə nyi. 10 Manda zər nda tə həa, ngə cha yi na cha nə kwar Fir'auna, ngə a ɗa ka zər nyi. Cha fəndzə yi tləm Musa, cha na, <<Ku ɓiti həbiya nyi.>>
Musa tə hwi yi Midiyan
11 Vanya pəchi ahir Musa tə həa, cha biya tangnda nənyi na nji ti, cho ndzamə ənda nda kwa mər tlər ɓwaɓwatəu, ngə cha la'a ndər Masar kwa dəgə ndər Ibrani, zhang ku huɗa nənyi na nji. 12 Musa tə ndzamar ndara vanya ndə da kwa ndzamə nyi, ngə cha tsəya ndər Masar nda ga ɗəwanda nyi ku məshishi'ua. 13 Vanya zəku, cha biya ga la'a njir Ibrani mətləu kwa pa. Ngə cha jau ndə nda na bikəu, <<Kami ko dəgə kuvanghə ndər Ibrania?>>
14 Ngə ndə nda na, <<Wa tə fiya nghə ndəradəgal ana ndər nəuma təkəra ea? Aa ko i ka tsəya ɗa wi nda ka tsəya ndər Masar nda ya?>> Kəl ngə ləvər tə səya Musa, ngə cha na ku jigadəma nyi, <<A zəndə tə nji sənda ya mər nda.>>
15 Nda Fir'auna tə ngatə sənda tə ɗa, ngə cha gwa'a cha tsəya Musa. Kəl ja, Musa tə hwi tanyi tsa Fir'auna yatə hə'i Midiyan, ga yi ngya tanyi tə nya vanya ka'ur ɓiti. 16 Ku'imahi'i da məɗəfa tsa fərist nə Midian, nda shili ka gə ɓiti, nda nyandə sər sa ɓiti sərshishi adan nda. 17 Alinya njir ɓəla sərshishi tə shili gədlənda nda, kəl ja Musa tə shili dləuya nda ga nənyi ɓiti nə sərshishi kənda inda.
18 Manda nda ɓəl shili da Rewel adan nda tə jau nda, <<Mya gwa'atə ənya hya ɓəl shili kaɗa?>>
19 Ngə nda wum ga na, <<vanya ndər Masar tə dləuya ea tsa alenya njir ɓəla sərshishi. Cha gətsə ea ma'a ɓiti ga nənyi nə sərshishi kəea.>>
20 Ngə cha jau nda, <<Ya aman cha? Mya gwa'atə hya ngyanya? Nga nyi ma cha uya vanya sə cha səma.>> 21 Musa tə dləukər cha ngya ka ndə nda, ngə cha nənyi kwa nyi Zippora nə Musa ka cha hətə ka mala nyi. 22 Ngə Zippora tə yah zərsal, ngə Musa tə fəndzə nyi tləm Gashom, nacha ngə <<Ya ɗa ka mihiɓi tə hə'i nda pa'a na'a.>>
23 Ahir fa ɗanghəu, təl Masar tə tah. Njir Isra'ila kwa biyama na ngya ku tədəɓər ɓwaɓwatər mavakur. Ngə nda tiwi gwa'a vala, tiwi kənda hya'ati ga gya da Hyel.