Hyel tə nga Musa
3
1 Vanya pəchi Musa kwa ɓəla biri kətəng səlkə nyi Jetro, ferist nə Midian. Ngə cha təra na biri kətəng gwa ɓəla naɗə ku dadil taku, ta'i dzər Sinai kəramə Hyel. 2 Hinda chama Tlakə tə shil da cha aku kyara hu'u ku lya kubu. Musa tə la'a kubu tə dləutsə hu'u kwa gəɗa, ya wu nda da kwa ngi wa. 3 Ngə Musa tə jigadəma ga na, <<Əngwa ya yi la'a sər məngəl nda mya gwa'atə wu nə da kwa ngi wa.>>4 Manda Tlakə tə la'a yi tə cha ka ndzama, ngə Hyel tə nga nyi ku wu nda, <<Musa! Musa!>>
5 <<Ngwa da shil ləhə wa,>> Ngə Hyel tə na. <<Səɗəbiya ɓiɓi ngha, aka mbwa nə ka ta'ia tə na, mbwa karti nga.>> 6 Təma ngə cha na, <<Naya ngə Hyel nə Ada ngha, Hyel nə Ibrahim, Hyel nə Ishaku ana Hyel nə Jakop.>> Aka ənga, Musa tə mbuya huɗəma cha, aka cha kwa ləvər tsa cha da la'a Hyel.
7 Ngə Tlakə tə na, <<A la'atəya chul ɓwaɓwatə nda nji ɗa kwa a vu Masar. I ngatə ya ndo tiwi aka njirawawa'a kənda nda kwa tla mbaina nə nda, a zəndə tə ya ɓwaɓwatə kənda. 8 A səya təya sakana ka ga ya dləuya nda ku cha njir Masar, ya shili na nda ku hə'i nda mənakə ya dlaɓəu, hə'i nda 'ua ana mwamwa kwa hwi kwa, mbwa nda njir Kan'ana, njir Hiti, njir Amori, njir Perizi, njir Hivi, ana njir Jebusi na ngya tə sakana. 9 Sakanə ja, a ngatə təya tiwi njir Isra'ila, ya a la'a təya ənda njir Masar kwa nənda ɓwaɓwatəu. 10 Sakanə yo sə nghə ya da təl Masar tsaka ka yi fa'abiya ɗa nji ɗa ku hə'i Masar.>>
11 Kəl ngə Musa tə nar nyi nə Hyel, <<Na ya wa ja, nda yo ma'i ya da Fir'auna ka ga ya fa'abiya njir israila vu Masara?>>
12 Ngə Hyel tə nar nyi, <<Yo ma'i tsa'a naka. Janə səndo ɗa ka ba'ada nə ngha, ndo chari na ya ngə tə sə ngha: Ma ka fa'abiya nji nga vu Masar, ku kəramə na hyo shil həsəli nə Hyel.>>
13 Ngə Musa tə nar nyi nə Hyel, <<Aman maya ya da njir Isra'ila ga nar nda, ənda <Hyel nə jival kəhi ngə tə sə ɗa,> ya ngə nda jau ɗa, <Wa tləm nya?> Mi yo nar nda?>>
14 Ngə Hyel tə nar nyi nə Musa, <<NAYA NGƏ NAYA. Əngə ko nar nyi njir Isra'ila, <NAYA ngə tə sə ɗa shil da hi.> >> 15 Ngə Hyel tə nar nyi nə Musa, <<Nar nyi nə njir Isra'ila, Hyel Tlakə nə jival kəhi, <Hyel nə Ibrahim, Hyel nə Ishaku ana Hyel nə Jakop tə sə ɗa da hi.> Janə tləm ɗa ba'anawa, tləm nda njo ɗəghatə ɗa nə ba'anawa.
16 <<Ma'i ka yi tsəmtə njirawawa'a Isra'ila ka nar nda, <Tlakəu, Hyel nə jival kəhi, Hyel nə Ibrahim, Ishaku ana Jakop tə chabiya dzə ga na, a ndzam təya ga la'a sə nda nja mərtə hi vu Masar. 17 Ya a mər təya alkawal yo həbiya hi ku ɓwaɓwatə kəhi vu Masar yo mələm njir Kan'ana, Hiti, Amori, Periz, Hivi ana Jebusi, mələm nda kwa hwi na 'ua ana mwamwa.>
18 <<Njirawawa'a Isra'ila kwa səhimi da ka. Ətsəu naka ana njirawawa'a hya gwa da təl Masar hya nar nyi, <Hyel Tlakə nə njir Ibrani, tə ɓə na ea. Ngya ea ea ma'i nə hanyi makər gwa dadil takəu ea gwa hatəmachi nə Hyel Tlakən ea.> 19 Kəl ja, a zəndə tə ya təl Masar da kwa ngya hi hya təra wa kəl gyalkur ɗa tə chiu nyi kwa na tuku. 20 Aka ənga yo ha cha ya ba dəgə njir Isra'ila ana dəhə sər məngəl nda yo mər ku pama nda. Ahir nga, cho dzugwa ngya hi hya təra.