Sər Muniya a nə Musa
4
1 Musa wuma, <<Aman ma nda ngyar səhimi da ya, ga ngyar na'a njiri ga na, <A Hyel da chabiya nghə dzə wa>?>>2 Ngə Tlakə tə nar nyi, <<Mi ngə ku cha ka.>> Ngə cha wuma, <<Zəwa.>>
3 Ngə Tlakə tə na, <<Vakənda səya hu'i.>>
Musa tə tə vakənda tamba nyi nda səya hu'i ngə a sha ka pwabu, ngə cha hwi tanyi tsari. 4 Kəl ngə Tlakə tə nar nyi, <<Ha cha kə ka hətənyi tə shiwa cha.>> Kəl ngə Musa tə ha cha cha ga hətə pwabu nda kəl ngə a ɓəla sha ka tamba ku cha cha. 5 Ngə Tlakə tə na, <<Nənna, ga nda nənyi jiri ənda Hyel Tlakə nə adan nda, Hyel nə Ibrahim, Hyel nə Ishaku, ana Hyel nə Jakop chabiya nghə tə dza.>>
6 Kəl ngə Tlakə tə nar nyi, <<Fəu cha kə ku ləkutə ngha.>> Kəl ngə Musa tə fəu cha cha gu ləkutə nyi, nda cha həbiya, kəl jan cha cha ɗa tə pərtə tyal na bibi wi mindindili.
7 Ngə Tlakə nar nyi, <<Ɓəla fəu cha kə gu ləkutə ngha,>> Ya manda cha ɓəla fəu cha cha gu ləkutə nyi, kəl cha cha tə ɓəla ɗa wi alenya kumur dza cha.
8 Kəl ngə Tlakə tə na, <<Ma a da nda nə nghə jiri ga dləukər na səshinshin tangərma ngə wa, ndo dləukər na mətləkunyi nga. 9 Kəl ja, ma a da nda dləukər na muniya mətlə ingə wa, ya ngə nda ngyar səhimi da ka, gətsə ɓiti ku dəl Nilu ka pənda tə hə'i 'ul'ula. Ɓiti nda gətsə ku dəl Nilu nda kwa sha ka mashi hu'i.>>
10 Kəl ja, Musa tə nar nyi nə Tlakəu, <<Maki Tlakəu, a da ya kwa nau ɓwanya tsalal wa, mada'a a yahi ndara wi nə ka ɓwanya nə mava nghə na. Tərkusə ya təwa ɓwanya ya kyara ya tədəɓəu.>>
11 Kəl ngə Tlakə tə nar nyi, <<Wa nənyi nya nə ndəa? Wa kwa mərtə hima ndə dadanyi ndara katə nyi tsa ɓwanya? Wa kwa mərtə ndə kwa la'a səu ndara wuləfa? A da naya Tlakə ngə ma? 12 Sakana ma'i! Yo vala nghə ko nau ɓwanya ya yo dlədləɓar nghə sənda ko na.>>
13 Kəl ja, Musa tə na, <<Maki Tlakəu, matikuɗi sə vanya ndə ka mər sənga.>>
14 Kəl ngə huɗa Tlakə tə tla na Musa ngə cha na. <<Aman zamə nghə Haruna ndər Levi nda? Kwa zəndə ya kwa ɓwanya cha tsalaləu. Jan cha ku laku cho shili həya nghə sakana, ya ɗufwa cho ɗa twasə macha la'a ngha. 15 Ka ɓwanya nənyi, ka fəu nyi ɓwanya ku nya cha; Yo vala kya'akura hi hya ɓwanya, ya yo dlədləɓətə hi sənda hyo məra. 16 Haruna ngə kwa ɓwanya nə nji tə dəbar ngha, ya cho ɗa wi nacha ngə nya ka, ya nakə tsə'u ko ɗa wi Hyel ngə kwa ndər nə nyi. 17 Ka hətə tamba nə ku cha ka, ka ga ka mər sə shinshin nə i'i.>>
Musa tə Ɓəl gwa Masar
18 Kəl ngə Musa tə ɓəl ya da Jetro ga nar nyi, <<Əngwa ya ɓəl gwa da na'awa nji vu Masar ga ya gwa la'a ndara tsə'u ta nda na pi.>>
Ngə Jetro tə na, <<Ma'i, yo chim ka gwa yiyinghəu.>>
19 Tlakə wurtə nar nyi nə Musa vu Midiyan, <<Ɓəl gwa Masar, aka dəhə nji inda kwa gwa'a nghə ka tsa inda kuɗə ti.>> 20 Kəl ngə Musa tə hətə mala nyi ana zər nyi, cha pətə nda tə ya kwara ga ghəya ma'i dzəva Masar. Ngə cha hətə tamba Hyel ku cha cha.
21 Tlakə tə nar nyi nə Musa, <<Ma ka ɓəl gwa Masar, cha ɗa təkəɗəu a mər tə kə dəhə səshinshin inə ya nə nghə gyalkur mər nə mar Fir'auna. Kəl ja, yo mərtə ɗufwa cha ɓaɓal ga cha ngyar wuniya nji ɗa nda təra. 22 Ka nar nyi nə Fir'auna, <Janə sə nda Tlakə tə na, Isra'ila ngə zə'ual ɗa, 23 Ya yo nar ngha, <<Ngyar zər ɗa cha təra, ga cha ki həsəli na'a.>> Ya ngə ka ngyar wuniya nda nda təra, aka ənga yo tsəya zə'ual ngha.> >>
24 A tə mbwar ɓəlsar ku laku, Tlakə tə həya Musa cho nda gwa'a tsəya nyi. 25 Kəl ngə Zipora tə hətə hangu nda kwa səm ga tlanda zhumbulum zər nyi ni, ga tsəkar hya Musa ni. Cha na, <<Jiri təwa mashi, ɗa tə kə sal ɗa təkəɗəu.>> 26 Kəl ngə Tlakə tə ngya nyi sə nyi. (Aku bəji nda cha na, <<Sal gambəl nə mashi,>> Aka tla bədzang nda.)
27 Tlakə tə nar nyi nə Haruna <<Ma'i gwa tə dadil takəu hya gwa ɓə na Musa>> Kəl ngə cha ɓə na Musa a vu kəra mə Hyel ngə cha gapətə nyi.
28 Ngə Musa tə dəkar nyi dəhə sə nda Tlakə tə nar nyi cha dəka, ana tsə'u cha dəkar nyi dəhə səshinshin sər muniya nda Tlakə tə nar nyi cha məra.