Nja Tsakətə nyi Ɓwaɓwatə nə njir Isra'ila
5
1 Ahir nga, Musa ana Haruna tə təra ya da Fir'auna ga yi nar nyi, <<Janə sənda Tlakəu, Hyel nə Isra'ila tə na: <Ngyar nji ɗa nda təra, ga nda ki səm ladər nə həsəli na'a kwa dadil takəu.> >>2 Ngə Fir'auna tə na, <<Wa ngə Tlakə nga, nda tsa'aka yo nəu nya cha, ya ngyar njir Isra'ila nda təra? A da yo zəndə Tlakə ngə wa, a yo ngyar njir Isra'ila nda təra wa.>>
3 Kəl ja, Haruna ana Musa tə na, <<Hyel nə njir Ibrani ngə tə ɓəna ea. Ngya ea, ea ma'i ɓupuchi makər gwatə dadil takəu ka ga ea ki hatəmachi nə Hyel Tlakən ea, Ma a da wa, cho kuɗe nda ea na təmachi ndara katsakər.>>
4 Kəl ja, təl Masar tə na, <<Musa ana Haruna, mya gwa'atə hyo hənda nji tsa tlər kənda? Ɓəl ma yatə mbwar tlər kəhi!>> 5 Kəl ngə Fir'auna tə na, <<Ndzama, njikə hi ɗa tə ɗang tə hə'i na, ngə hyo gwa'a katə nda tsa mər tləra.>>
6 Pəshinda tanyi Fir'auna tə nar nyi nə njir gəla mavi'i ana njirawawa'a nda təkəra nji. 7 <<Əngwa hya tsə'u shili na sar nə nji ka kaɓə nghingha wa, ngya nda nda təra nda ki gwa'a sar kənda. 8 Kəl ja, hya gwa'a nda kaɓətə wi ɗanghəkura nda haaɗa, ngwahya da həya nda mada zhang wa. Kukufəkura nda nga gwa'atə ndo tiwi, <Ngya ea ea ki hatəmachi nə Hyel kəea.> 9 Hya tsakətənyi tlər ɓwaɓwatə nə nji ingə tsa nda da uya lakur səhimi da ɓwanya gəzhi.>> 10 Kəl njir gəla mavi'i ana njirawawa'a tə biya nar nyi nə nji, <<Janə sə nda Fir'auna tə na, <A tsə'u yo nə hi sar wa. 11 Ma'i ma hya ki gwa'a sar na kərnəhi tangnda hyo uya ti, ya a da njo həya hi tlər pa'a wa.> >> 12 Aka ənga ngə njir Isra'ila tə wiɗətədzə mada amani ku Masar ka gwa'a sar. 13 Njir gəla mavi'i inda tə biyama na ufə nda nda kwa na, <<Wurandə ma tlər nda nja ɓatliya ka kala pəchi, tang wi nda ma nja nə hi sar.>> 14 Ngə nja dəgə njirawawa'a Isra'ila inda njir gəla mavi'i Fir'auna tə fiya ga jau nda, <<Mya gwa'atə a da hya mərtə tlər nda hyo ki na mərtə ku ɓupuchi əna ana ənya wi nda haaɗa wa?>>
15 Kəl ngə njirawawa'a nə njir Isra'ila tə yi na tiwi kənda huɗə Fir'auna nda na, <<Aləvari, mya gwa'atə ka mərtə nyi ənnə nə mavi'i ngha? 16 A nja nənyi sar nə mavi'i nghə wa, dəhə ka ənga nja nar ea, <Dla'a ma tubali!> Nja dəgə mavi'i ngha, ya nənghə na nji ngə na bikəu.>>
17 Fir'auna tə na, <<Nji kukufəu, vəlvəl kukufə hi! Nacha gwa'atə wa'atanyi hyo na, <Ngya ea ea təra ea ki hatəmachi nə Tlakəu.> 18 Ɓəl ma ki mər tləra. A da njo nə hi sar wa, dəhə ka ənga tuku hyo dla'abiya tubali tsa'atsa'a.>>
19 Njirawawa'a nə njir Isra'ila tə ngabiya ənda ku ɓwaɓwatə nda nda nja nar nda, <<Əngwa hya da həya ɗanghəkura tubali nda njo gwa'a tsa hi kala ɓupuchi wa.>> 20 Manda nda ngyar Fir'auna, nda həya Musa ana Haruna kwa səkə nda ɓəa, 21 ngə nda na, <<Ga Tlakə ndzam sə ngə hya mər nga, cha mərtə hi nəuma! A gwa'atə tə hi məna ɗa na bikə mar Fir'auna ana njirawawa'a nyi, ga fəu katsakər ku cha nda ka nda tsəya mən.>>
Hyel tə mər Alkawal Dləuya njir Isra'ila