6
1 Kəl ngə Tlakə tə nar nyi nə Musa, <<Sakana ko la'a sənda yo mərtə nyi nə Fir'auna, aka gyalkur ɗa cho ngyanda nda təra, vələu, aka gyalkur ɗa cho gədləbiya nda ku hə'i nyi.>>2 Ətsəu Hyel tə nar nyi nə Musa, <<Naya ngə Tlakəu. 3 Ya chabiya nyi kərɗa nə Ibrahim, Ishaku, ana Jakop ənda Hyel ndər Gyalkur ya, kəl ja, a da ya i nda zəndə ɗa na tləm, Tlakə wa. 4 Ətsəu ya mərtə mbandər ɗa kə'i nda, ka ya nənda hə'i Kan'ana, tangnda nda ngya wi mihiɓi ti. 5 Əngə tsəu, a ngatə təya tiwi njir Isra'ila nda njir Masar tə fəu ku mavakur, ya ɗənghatə tə ya mbandər ɗa.
6 <<Aka ənga, nar nyi nə njir Isra'ila: <Naya ngə Tlakəu, ya yo dləuya hi tsa ɓwaɓwatə nda njir Masar kwa nə hi. Yo nəhi dimukur tsa mavakur kənda, ya yo mbəɗandə hi na gyalkur ɗa təwa tlanda nda nəuma. 7 Yo hətə hi ka na'awa nji, ya yo ɗaka ka Hyel kəhi. Sakanda ngə hyo nagbiya ənda naya ngə Hyel Tlakən hi, ndə nda kwa dləuya hi tsa mavakur da kiɗa njir Masar. 8 Yo hətə hi ya tə hə'i nda ya səmfəla yo nənyi nə Ibrahim, Ishaku, ana Jakop. Ya kwa nəhi ka cha ɗaka nəkəhi. Naya Tlakə na!> >>
9 Ngə Musa tə nar nyi sə ngə nə njir Isra'ila, kəl ja, a da nda dləukər wa aka ɓwaɓwatə ana dza'ukura mavakur nda nda kwa.
10 Kəl ngə Tlakə tə nar nyi nə Musa, 11 <<Ɓəl ya da Fir'auna təl Masar, cha ngyar njir Isra'ila nda biya ku hə'i nyi.>>
12 Kəl ja, Musa tə nar nyi nə Tlakəu, <<Macha njir Isra'ila da kwa səhimi da ya wa ya, mya gwa'atə Fir'auna kwa səhimi da ya, naya nda kyara ya tədəɓə ma yo ɓwanya?>>
Nyandəla Musa ana Haruna
13 Ngə Tlakə tə ndər nə Musa ana Haruna təkəra Njir Isra'ila ana Fir'auna təl Masar, ga tsau nda bar nda fa'abiya njir Isra'ila zəbiya vu Masar.
14 Janə jivalnya kə'i Musa ana Haruna,
Nguli Roben zə'ualə Isra'ila nanda ingə Hanok ana Palu, Hezron ana Karmi. Nanda ingə nyavi Roben.
15 Nguli Simion nanda ingə Jemuel, Jamin, Ohad, Jakin, Zohar ana Shaul ngulisha'a kwa Kan'ana. Nanda ingə nyavi Simion.
16 Janə tləmər nguli Levi wi sə nda tsəftə nji, Gashon, Kohat ana Merari. Levi tə fah 137 təvi cha tah.
17 Nguli Gashon nanda ingə Libni ana Shimei.
18 Nguli Kohat nanda ingə Amram, Izhar, Hebron ana Uzziel. Kohat tə fah 133 təvi cha tah.
19 Nguli Merari nanda ingə Mali ana Mushi. Nanda ingə nyavi Levi wi sə nda tsəftə nji.
20 Amram tə həbiya kwamənya adanya Jokobed, cha yiyah nyi Haruna ana Musa. Amram tə fah 137 təvi cha tah.
21 Nguli Izhar nanda ingə Kora, Nefeg ana Zikri.
22 Nguli Uzziel nanda ingə Mishel, Elzafan ana Sitri.
23 Haruna tə hə Elisheba, kwar Aminadab ya kwamənya Nashon, ngə cha yiyah nyi Nadab ana Abihu, Eliyazar ana Itamar.
24 Nguli Kora nanda ingə Assir, Elkana ana Abiyasaf. Nanda ingə nyavi Kora.
25 Eliyazar zər Haruna tə həbiya zhang ku huɗa ku'i Putiel, ngə cha yiyah nyi Finahas.
Nanda ingə njirawawa'a nyandəla Levi, ka nyavi ka nyavi.
26 Tsəu ka Haruna ana Musa nda tanyi ngə Tlakə tə nar nda, <<Fa'abiya ma njir Isra'ila zəbiya vu Masar wi ngə nda təkətəkənyi nga.>> 27 Nanda ingə tə ɓwanya nə Fir'auna təl Masar təkəra zəbiya na njir Isra'ila vu Masar. Nanda ka Musa na Haruna inda tanyi nga.
Haruna tə ɓwanya tə nyar Musa
28 Manda Tlakə tə ɓwanya nə Musa vu Masar, 29 cha nar nyi, <<Naya ngə Tlakəu. Nar nyi nə Fir'auna təl Masar dəhə sə nda ya nar ngha.>>
30 Kəl ja, Musa tə nar nyi nə Tlakəu, <<Mangə kyara ya tədəɓə ku ndəra, mya gwa'atə Fir'auna kwa səhimi da ya?>>