7
1 Kəl ngə Tlakə tə nar nyi nə Musa, <<La'a, a mərtə nghə tə ya wi Hyel a nə Fir'auna, zamə nghə Haruna tsə'u kwa ɗa ka ndər mətakər ngha. 2 Ka dəkər nyi dəhə sə nda ya nar ngha nə zamə nghə Haruna, ya ba'a cha nar nyi nə Fir'auna ka cha ngyar njir Isra'ila nda biya ku hə'i nyi. 3 Kəl ja, yo mərtə dufwa Fir'auna ɓaɓaləu, tsa'aka yo mərtə sər məngəl i'i ana səshinshin i'i ku hə'i Masar, 4 ndo ngyar səhimi da hi. Kəl ba'a ya fəkər cha ya təkəra Masar, ya təwa gyalkur tla nəuma ɗa, yo fa'abiya nji ɗa Isra'ila zəbiya vu Masar ka dzuku ka dzuku. 5 Njir Masar tsə'u kwa zəndəbiya ənda naya ngə Tlakəu, ma ya fəkər cha ya təkəra Masar ga fa'abiya njir Isra'ila zəbiya vu nda.>>6 Musa ana Haruna tə mər tang wi nda Tlakə tə tsau nda bar. 7 Fah Musa chisəkumnyi, fah Haruna tsə'u chisəkumnyi parnya makər ma nda ɓwanya nə Fir'auna.
Zəwa Haruna tə sha ka Pwabu
8 Ngə Tlakə tə nar nyi Musa ana Haruna, 9 <<Ma Fir'auna tə nar hi, <Char ɗa ma səshinshin.> Ba'a ka nar nyi nə Haruna, <Hətə tamba nghə nga ka sənda səya hu'i mar Fir'auna,> ya tamba ngə kwa sha ka pwabu.>>
10 Kəl Musa ana Haruna tə təra gwa da Fir'auna ga mər tang wi sənda Tlakə tə tsau nda bar. Haruna tə sənda tamba nyi səya hu'i, a mar Fir'auna ana njirawawa'a nyi, ngə tamba nda tə sha ka pwabu. 11 Ngə Fir'auna tə nga njir dəma ana njir ha kəzəa, kəl njir bushin nə Masar tə mərtə ənda təwa bushin. 12 Madawa ku pama nda tə sənda tamba nyi səya hu'i, ngə tə ɗa ka pwabu i'i! Kəl ngə tamba Haruna tə ndasənya tamba kənda i'i. 13 Ba'aka saka nga dufwa Fir'auna tə ɗa ɓaɓaləu, ngə cha ngyar səhimi da nda, tang wi nda Tlakə tə na.
Təmachi Mashi
14 Kəl ngə Tlakə tə nar nyi nə Musa, <<Ɗufwa Fir'auna ɗatə ɓaɓaləu, cha ngyar wuniya nji ingə nda təra. 15 Ma'i yada Fir'auna əmbudla ma cho biya ka gwa nya ɓiti. Səkətə nyi nya Nilu, ka hətə tamba nghə nda tə sha ka pwabu nda ku cha ka. 16 Kəl ba'a ka nar nyi, <Tlakəu, Hyel njir Ibrani tə sə ɗa ya nar ngha, Ngyar nji ɗa nda təra, ka ga nda ki həsəli na'a kwa tə dadil takəu, ya ba'a sakana a da ka səhimi wa. 17 Janə sə nda Tlakə tə na, ana tamba nə ku cha ya na yo dəgəya ɓitir Nilu, ya ɓiti kwa sha ka mashi, təwa ənga ko zəndəbiya ənda naya ngə Tlakəu. 18 Kalfi inda ku Nilu kwa kuɗa, ya dəl ngə kwa shi'uni, a tsə'u njir Masar da kwa nau sa ɓitir dəl ngə wa.> >>
19 Ngə Tlakə tə nar nyi nə Musa, <<Nar nyi nə Haruna, hətə tamba nghə ka hatə cha kə ya təkəra ɓiti nə Masar, a təkəra dəl i'i ana lakur ɓiti i'i ana dlələm i'i ana a təkəra dəhə sə'inda nja pəu ɓiti kwa, ya dəhə kwa sha ka mashi. Mashi kwa ɗa mada aman ku Masar, mada ku wu nda nja dzapəbiya ta cha ana giɗa hangu.>>
20 Musa ana Haruna tə mər tang wi nda Tlakə tə tsau nda bar. Cha har tamba nyi a tə lya Fir'auna ana dəhə njirawawa'a nyi ga dəgəya ɓitir Nilu ni, kəl dəhə ɓiti tə sha ka mashi. 21 Kalfi inda ku Nilu tə kuɗa, ya dəl nda tə shi'uni ɗimi nda a tsə'u njir Masar da kwa nau sa ɓitiɓiti nyi wa. Mashi tə ɗa mada təwa bari ku Masar.
22 Kəl ja, njir bushin nə njir Masar tə mərtə tang wi nda təwa bushin kənda, tang wi nda Tlakə tə na, ɗufwa Fir'auna tə ɗa ɓaɓaləu, a da cha səhimi da ka Musa ana Haruna wa. 23 Atəvira ənga, cha sha ga ma'i tanyi yatə patla nyi, ɗufwa cha da hətə sə nda ka vanya sə ma'a wa. 24 Kəl dəhə njir Masar tə labiya ka'u nya dəl Nilu ndo gwa'a ɓiti sa, aka a da ndo nau sa ɓitir dəl i'i wa.
Təmachi Gwamba
25 Hanyi məɗəfə tə tərabiya ahir Tlakə tə dəgəya Nilu.