8
1 Kəl ngə Tlakə tə nar nyi nə Musa, <<Ma'i ya da Fir'auna ka yi nar nyi, <Jane sənda Tlakə tə na, Ngyar Nji ɗa nda təra, ga nda ki həsəli na'a. 2 Ma ka katə nda tsa təra, yo zhaliya hə'i nghə dəhə na təmachi gwambə i'i. 3 Dəl Nilu kwa nyi na gwamba, nda kwa zəbiya gwa ku patla ngha, bətə go fur ngha, ya tsa'atə gangər ngha, ndo gwa ku ki njirawawa'a ngha ana nji ngha, ndo fəl go kisəlsəu ana go shala ɗəfə kəhi. 4 Gwambə inga, kwa fəl gyatə ka, nji ngha, ana dəhə njirawawa'a ngha.> >>5 Kəl Tlakə tə nar nyi nə Musa, <<Nar nyi nə Haruna, <Hyandə tamba ngə ku cha kə ngə ya təkəra dəhə dəl i'i ana dlələm i'i, ka fa'a i'i nə Masar, tsa'aka nda biyanɗə gwambə i'i təkəra dəhə hə'i Masar.> >>
6 Kəl Haruna tə har cha cha ya təkəra ɓiti Masar, kəl gwambə i'i tə biya ga haɗiya hə'i dəhəu! 7 Kəl njir bushin inda tə mərtə tang wi nda, nda biyandə gwambə ma'a nanda tə hə'i Masar.
8 Kəl Fir'auna tə nga Musa ana Haruna ga nar nda, <<Gədi ma Tlakə cha fa'anda ɗa gwambə inə tə ya, ana təkəra na'a na nji, yo ngyar nji kəhi nda təra, tsa'aka ndo ki uya lakur hatəmachi nə Tlakəu.>>
9 Musa tə nar nyi nə Fir'auna, <<A dləukər təya, ka na'a bəji nda yo pətlənya nə ngha, ana njirawawa'a ngha, ana nji ngha, ənda nja fa'anda hi gwambə ingə ku ki kəhi, kəl nda inda ku dəl Nilu kwa həyadza.>>
10 Ngə Fir'una tə na, <<Əzəkəu.>>
Ngə Musa tə ɓəlakə nyi, <<Kwa ɗa wi sə ngə ka na nga, ga ka zəndə ənda vanya ndə da wi Hyel Tlakən ea wa. 11 Gwambə ingə kwa ngya hi ana ki kəhi, njirawawa'a ngha ana nji ngha, kwa həyadzə kəl inda ku Nilu.>>
12 Nda Musa ana Haruna tə ngyar patla Fir'auna, ngə Musa tə tiwi nə Tlakə təkəra gwambə inda cha sətə nyi nə Fir'auna nda. 13 Kəl ngə Tlakə tə mər wi nda Musa tə gədi. Gwambə inda ku ki, biya hir ki, ana inda kwa takəu tə kuɗa. 14 Kəl nja ɓutə dumdumu, ngə hə'i tə gulbiya dzə na shi'uni bəm gagaɗa. 15 Kəl ja, nda Fir'auna tə la'a tsə'u sə da wa, ngə cha mərtə ɗufwa cha ɓaɓal səkəu ga ngyar səhimi da Musa ana Haruna, tang wi nda Tlakə tə na.
Təmachi Jakar
16 Kəl ngə Tlakə tə nar nyi nə Musa, <<Nar nyi nə Haruna, <Har tamba nghə ka dəgəya bərbər nə hə'i,> bərbər nə hə'i nga kwa sha ka jakar.>> 17 Ka Musa na Haruna tə mər ənga, nda Haruna tə har tamba nyi ga dəgəya bərbər hə'i ni, kəl jakar tə yah dza nji ana sərshishi. Dəhə bərbər hə'i nə Masar tə sha ka jakar. 18 Kəl ja, ma njir bushin gwa'a ka nda shili na jakar təwa bushin kənda, a da nda nau wa, aka jakar tə zhaliya nji ana sərshishi.
19 Njir bushin inda tə nar nyi nə Fir'auna, <<Nənna, gyalkur Hyel na.>> Kəl ja, ɗufwa Fir'auna tə ɗa ɓaɓaləu, ngə cha ngyar səhimi, tang wi sə nda Tlakə tə na.
Təmachi Chiɗi
20 Kəl ngə Tlakə tə nar nyi nə Musa, <<Hya'atə tsəɗakə mbudla ka gwa həya Fir'auna kwa nya dəl ka nar nyi, <Janə sənda Tlakə tə na, ngyar nji ɗa nda təra, ka ga nda ki həsəli na'a. 21 Ma'a ka ngyar nji ɗa nda təra wa, yo sətə ləvakachi nə chiɗi səya təkəra ka ana njirawawa'a ngha, nji ngha ana ku ki kəhi. Ki njir Masar kwa nyi na chiɗi, ana ma'a kəra hə'i mbwanda tə nda ti.
22 << <Kəl ja, a tə biji nga, yo kanda hə'i Goshan, mbwanda nji ɗa na ngya ti. A ndə do la'a chiɗi hinda wa. Tangə ko zəndə ənda naya ngə Tlakəu, ya ku hə'i nə ya. 23 Yo tau gəl ku pama nji ɗa ana nji ngha. Chul ngəna sər muniya kwa ɗa zəkəu.> >>
24 Ngə Tlakə tə sətə ləvakachi chiɗi gwatə patla Fir'auna ana ki njirawawa'a nyi. Dəhə hə'i Masar tə səwandə dzə na chiɗi.
25 Təma ngə Fir'auna tə nga Musa ana Haruna ga nar nda, <<Ma'i hya ki hatəmachi nə Hyel kəhi, kəl nda ja, hya mər nyi tang na.>>
26 Kəl ngə Musa tə na, <<Nacha ngə nda kwa ɗa tsatsa'a wa. Aka hatəmachi nda ea kwa mər nə Hyel Tlakən ea da cha sə ɗaɗa nə njir Masar wa. Ya ma ea hatəmachi kəea tangna mbwanda njir Masar kwa la'a, ndo vakənda ea na mangu. 27 Tuku eo hətə hanyi makər eo ma'i gwa dadil takəu, ka ea gwa handa təmachi nə Hyel Tlakəu, wi nda cha nar ea.>>
28 Ngə Fir'auna tə na, <<Yo ngya hi hya ma'i ki hatəmachi nə Hyel Tlakən hi ku dadil takəu, kəl ja, ngwa hya ma'i naɗə wa.>>
29 Ngə Musa tə ɓəla kənyi, <<Ma ya ngya nghə sakana, yo pətlənya nə Tlakəu, əzəkə chiɗi ingo təkə na ka, ana njirawawa'a ngha, ana nji ngha. Kəl ja, ngwa da ɓəla shandə ea kər səkəu, ka katə nji tsa ma'i ki hatəmachi nə Tlakə wa.>>