DƏLABIYA 9

Təmachi shilkə Sərshishi

1 Təma ngə Tlakə tə nar nyi nə Musa, <<Ma'i ya da Fir'auna ka nar nyi, <Janə sənda Hyel Tlakə nə njir Ibrani tə na, <<Ngyar nji ɗa nda ma'i, tsa'aka nda ki həsəli na'a.>> 2 Ma ka ngyar dləukər nda təra, ga katə nda tsa ma'i, 3 Tlakə na cha kərnyi kwa shili na təmachi təkəra sərshishi ngha, wi ka taku ngha ana Kwara ngha, dləgwam ana təkəra tla i'i, kətəng ana kua. 4 Kəl ja, Tlakə kwa fəu gəl ku pama sərshishi njir Isra'ila ana sərshishi njir Masar, tsa'aka a sərshishi njir Isra'ila da kwa kuɗə wa.> >>

5 Tlakə tə fiya bəji, ga na, <<Əzəkə Tlakə kwa mərtə sə ngə ku hə'i na.>> 6 Ya vanya zəkəu Tlakə tə mərtə ənda, dəhə sərshishi njir Masar tə kuɗa, kəl ja, sərshishi njir Isra'ila da tə mada zhang wa. 7 Fir'auna tə sə nji nda ki gwa'abiya ndara aman sərshishi njir Isra'ila, nda ki həya mada zhang ku huɗa sərshishi kənda da tə wa. Dəhə ka ənga ɗufwa Fir'auna tə ɗa ɓaɓaləu, ya ngə cha ngyar wuniya nji nda nda təra.

Təmachi Mbəlkəɗimi

8 Kəl ngə Tlakə tə nar nyi nə Musa na Haruna, <<Tatsə ma pətsəɗəu ku tla gwang chi, Musa tsə'u cha uchitə gya tə gyang a huɗə Fir'auna. 9 Pətsəɗə nda kwa ɗa ka bərbər kwa ɗəza, kwa gwa'atə mbəlkəɗimi kwa biya dza nji ana sərshishi ku dəhə hə'i nda.>> 10 Aka ənga nda tatsə pətsəɗə ku tla ga ta'i mar Fir'auna. Musa tə uchitə gyatə gyang, kəl mbəlkəɗimi tə biya dza nji ana sərshishi. 11 Njir bushin inda da nau ta'i mar Musa wa aka mbəlkəɗimi dzən nda ana a dzər dəhə njir Masar. 12 Kəl ja, Tlakə tə mərtə ɗufwa Fir'auna ɓaɓaləu ngə cha ngyar səhimi da Musa na Haruna, tang wi nda Tlakə tə na.

Təmachi Mindindili

13 Kəl Tlakə tə nar nyi nə Musa, <<Ka hya'atə tsəɗakə mbudla, ka həya Fir'auna ka nar nyi, <Janə sənda Tlakəu, Hyel njir Ibrani tə na, ngyar nji ɗa nda təra, ka ga nda ki həsəli na'a, 14 Ma'a əngə wa, yo sətə təmachi ɗimiɗimi təkəra ka ana njirawawa'a ngha ana nji ngha, ga ka zəndə ənda ndə da wi naya ku dəhə dunəya wa. 15 Aka macha nda təya ha cha ya ga dəgə hi na təmachi, ta'ir naka ana nji ngha a wurandə hi tə nji tə dunəya. 16 Kəl ja, ya ngya nghə na pi ka nəna səu, ka ga ya char nghə gyalkur ɗa ana ka ga nja bəziya tləm ɗa ku dəhə dunəya. 17 Ba'a sakana tsəutang kwa hə kəra kərnghə nə nji ɗa, ga ngyar wuniya nda nda təra. 18 Aka ənga, sakanənnə zəkəu yo sətə mindindili ɗimiɗimi nda pa'a ta təɗə vu Masar, fwatə tə bəji nda nja mər Masar ba'a ənya 19 Aka ənga ja Musa, ka sə nja shili na dəhə sərshishi ngha, ana dəhə sə nghə shili tə kiɗa mənga, aka mindindili kwa təɗə təkəra kala ndə ana sərshishi nda pa'a nja shili nə tə kiɗa mənga, ya ndo kuɗa.> >>

20 Ka njirawawa'a Fir'auna inda kwa ləvər ɓwanya Tlakəu tə kusa ki shili na mavi'i kənda ana sərshishi kənda da kiɗa mənga. 21 Kəl ja, nji inda tə ngyar ɓwanya Tlakəu tə ngyar mavi'i kənda ka sərshishi kənda tə babal.

22 Kəl ngə Tlakə tə nar nyi nə Musa, <<Har cha kə shi huɗamələm ka ga mindindili pəpə ku dəhə hə'i Masar a təkəra nji ana sərshishi ana təkəra dəhə sə tsətsə nda biya tə babal nə Masar.>> 23 Manda Musa tə har tamba nyi shi huɗamələm, kəl Tlakə tə sətə dəradlər par ana mindindili, ana nghənghəɗir par tə nghənghəɗi səya hu'i. Tlakə tə pəpənda mindindili səya tə hə'i Masar, 24 mindindili tə pəpa ana nghənghəɗir par kwa nghənghəɗi biya ana shili. Fwatə tə bəji nda Masar tə ɗa ka hə'i, nacha ngə mindindili ɗimiɗimi nda tə təɗə tə hə'i nda. 25 Mindindili tə dəgə dəhə sə inda biya tə babal, nji ana sərshishi, dəhə sə tsətsə inda biya tə babal mindindili nda tə səwandi, ga ɓəɓəlda kala wua. 26 Huɗəkər mbwa nda pa'a mindindili tə təɗə ti, kəl a tə hə'i Goshen, tangnda njir Isra'ila na ngya ti.

27 Kəl ngə Fir'auna tə nga Musa ana Haruna ga nar nda, <<A mər tə ya səpəla'a, Tlakə ndər mər sə tsa'atsa'a cha, naea ka nji ɗa a da ea tsa'atsa'a wa. 28 Pətlənya nə Tlakəu, aka dəradlər par ana mindindili nji ea ti. Yo ngya hi hya təra, ngwa hya tsə'u ɓəla ngya wa.>>

29 Musa tə wum ga na, <<Ma ya biya ku hə'i na, yo ha cha ya ku pətlənya nə Tlakəu. Dəradlər par kwa ta'i, ya mindindili tsə'u da kwa təɗə wa, hyo zəndə ənda dunəya nə Tlakə nga. 30 Kəl ja, a zəndə tə ya ənda naka ana njirawawa'a ngha da kwa ləvər Hyel Tlakə ba'a sakanə wa.>> 31 Uli ana chul vanya uhi na tləm nyi bale a səwa ti, aka bale wurtə nəa ya uli tsə'u a mbəl ti. 32 Kəl ja, alkama ana yaɗi da səwa wa, aka ndo ɗa kaɗə wa.

33 Kəl ngə Musa tə ngyar Fir'auna ga təra biyatiya mələm. Cha ha chi shi nə Tlakəu, kəl dəradlər par ana mindindili nda tə ta'i, ya par da zhaka təɗə tə hə'i nda wa. 34 Nda Fir'auna tə la'a ənda par ana mindindili ana dəradlər par nda ta'i ti, cha ɓəla mər səpəla'a, nacha ana njirawawa'a nyi tə mərtə ɗufwa nda ɓaɓaləu. 35 Aka ənga, ɗufwa Fir'auna tə ɗa ɓaɓaləu, ngə cha ngyar wuniya njir Isra'ila nda təra wi nda Tlakə tə nar nyi nə Musa.