Təmachi Ndzəkwa
10
1 Kəl ngə Tlakə tə nar nyi nə Musa, <<Ma'i ya da Fir'auna, Aka a mərtə tə ya ɗufwa cha ana ɗufwa njirawawa'a nyi ɓaɓaləu, ka ga ya char səshinshin ɗa ina ku pama nda, 2 ga hya dəkar nyi nə ngulisha'a kəhi ənda ya nə nyi ɓwaɓwatə nə njir Masar ana ənda ya char sər muniya ku pama nda, ana ga hya zəndə ənda naya ngə Tlakəu.>>3 Kəl Musa na Haruna tə ya da Fir'auna ga nar nyi, <<Janə sə nda Tlakəu, Hyel njir Ibrani tə na, <Ba'a sakaman ko ngya ka həkəra kərnghə huɗə ɗa? Ngyar nji ɗa nda təra, ga nda ki həsəli na'a. 4 Ma ka ngyar wuniya nda təra, yo shili na ndzəkwa ku hə'i nghə əzəkəu. 5 Ndo haɗiya kəra hə'i nda a tsə'u njo la'a wa. Ndo ɗinya dəhə sə inda həyadzə ku nya mindindili, dəhə ka wu inda kwa hə ku fa kəhi. 6 Ndo nyandə ki kəhi ana ki njirawawa'a kəhi dəhə ki njir Masar sənda adan hi ndara ajin hi da ta la'a fwatə tə bəji nda nda ghəya ngya tə hə'i na wa, kəl sakana.> >> Ngə Musa tə sha ta nyi ga ngyar Fir'auna.
7 Njirawawa'a Fir'auna tə nar nyi nə Fir'auna, <<Ba'a sakamani ndən kwa tabwal nəməna? Ngyar nji ingə nda təra, ga nda ki hətənyi səli nə Hyel Tlakən nda. A da ka ta zəndə ənda Masar səwa tə ma?>>
8 Kəl ngə nja ɓəl na ka Musa na Haruna shili da Fir'auna. Ngə cha nar nda, <<Ma'i ma hya ki həsəli nə Tlakəu Hyel kəhi, kəl ja ya, ka wa ka wa ngə kwa maea?>>
9 Ngə Musa tə wuma, <<Eo təra ka ngulisha'a ka nji halhal kəea, nguli shili ka ku'i kəea, kətəng ka tla kəea, aka eo ki zəbatlal nə Tlakəu.>>
10 <<Ngə Fir'auna tə na, Ana yo ngya hi hyo təra ka mahi'i ka ngulisha'a kəhi, kəl nda ma Tlakə tə fəkə hi chi! Vəlvəl sənda nya ta hi ɗimi. 11 A da wa! Fa'atə kəl shili səkənda hya ki hətənyi səli nə Tlakəu, ma'a nacha ngə sənda hyo gədi.>> Kəl ngə nja gədlənda ka Musa na Haruna mar Fir'auna.
12 Ngə Tlakə tə nar nyi nə Musa, <<Ha cha kə ya kəra Masar ga ndzəkwa shili tə hə'i, nda ɗənya kala sə tsətsə nda tə fa i'i, dəhə sə inda tə həyadzə ku mindindili.>>
13 Ngə Musa tə har tamba nyi ya kəra Masar, kəl Tlakə tə mərtə gyang zədərpəchi tə fi ku dəhə hə'i nda pa'apəchi həmhanyi. Ma vi wura gyang nda shili tə na ndzəkwa, 14 nda zhaliya dəhə Masar ga ngya mada amani ku hə'i, ɗang nda gagaɗa. A da ta ɗa ənda wa, ya tsə'u do ɗa səkə wa. 15 Nda haɗiya dəhə hə'i kəl kyakyar kura kəra hə'i. Nda ɗənya dəhə sə nda həyadzə ku nya mindindili nda, dəhə sə tsətsə inda ku fa i'i ana wu yayah. A sə da nda wi hyali tə həyadzə kyo wu wa, ya sə da nda wi sə tsətsə tə həyadzə təkəra hə'i wa.
16 Fir'auna tə kusa nga Musa na Haruna ga nar nda, <<A mərtə ya səpəla'a mar Hyel Tlakən hi ana a man hi. 17 Far ma bikə ɗa səkəu hya pətlənya nə Hyel Tlakən hi cha hənda ɗa təmachi na.>>
18 Kəl ngə Musa tə ngyar Fir'auna ga pətlənya nə Tlakəu. 19 Ngə Tlakə tə shandə gyang nda tə fi na dunama gwa təwa təɗərpəchi, gyang nda tə fa'anda ndzəkwa inda gwa tə Fa'a Dəzəu. Mada ndzəkwa zhang da tə həyadzə mada tangmanə vu Masar wa. 20 Kəl ja, Tlakə tə mərtə ɗufwa Fir'auna ɓaɓaləu, ga ngyar wuniya njir Isra'ila nda təra.
Təmachi Kutla
21 Kəl ngə Tlakə tə nar nyi nə Musa, <<Ha cha kə shi huɗamələm ga kutlə ɗimiɗimi ɗa ku dəhə Masar, kutlə nda wi njo nau tsəkari.>> 22 Kəl ngə Musa tə ha cha cha shi huɗamələm, kəl kutlə ɗimiɗimi tə haɗiya dəhə Masar nə hanyi makərəu. 23 Hanyi makər a ndə da kwa la'a kuvanyi ndara cha ngyar mbwa nda cha tə wa. Dəhə ka ənga njir Isra'ila tahi tə vi mbəlmbəl tangnda nda na ngya ti.
24 Kəl ngə Fir'auna tə nga Musa ga nar nyi, <<Ma'i ma hya ki həsəli nə Tlakəu. Ma'a mahi'i kəhi ana ngulisha'a kəhi kwa nau ma'i kə'i hi, hya ngyar kəl kətəng ka tla kəhi biyahi.>>
25 Kəl ja, Musa tə nar nyi, <<Tuku ka ngya ea, ea təra na sərshishi ka ea ki hatəmachi ana təmachi nə nginda nə Hyel Tlakən ea ni. 26 Tuku ea təra na sərshishi kəea, a da eo ngyar mada pəlkwapəlkwa nda wa. Eo ki mər tlər na alenyi ku həsəli nə Hyel Tlakən ea, ya kəl ea yi nda eo dzugwa zəndə sənda eo mər tlər nə ka həsəli nə Tlakəu.>>
27 Kəl ja, Tlakə tə mərtə ɗufwa Fir'auna ɓaɓaləu, a da cho i ngya nda nda təra wa. 28 Fir'auna tə nar nyi nə Musa, <<Təgwa tangna! Ngwa ka tsə'u shili ma ɗa səkə wa! Pəshinda ka la'a huɗəma ya ti, ko tah.>>
29 Ngə Musa tə na, <<Wi ngəka na nga, atsəu yo tsakətə shili huɗə nghə səkə wa.>>