DƏLABIYA 11

Təmachi Tər Yar Tangərma

1 Kəl Tlakə tə nar nyi Musa, <<Yo səya na vanya təmachi təkəra Fir'auna ana hə'i Masar. Ahir nga, Fir'auna kwa ngya hi hyo təra tangna, macha ngya hi, cho gədləbiya hi pa'apa'a.>> 2 Ka nar nyi nə nji, ənda shili ka mahi'i nda gədi azurfa ana bəjingha tsa təwul i'i. 3 Tlakə tə mərtə njir Isra'ila tə uya kwambiyakur tə lya nji, ya Musa təkərnyi tə ɗa na səli gagaɗa vu Masar atsa njirawawa'a Fir'auna ana nji.

4 Kəl Musa tə nar nyi nə Fir'auna, <<Janə sənda Tlakə tə na: <Adala vu'i ənya yo shili tahəya Masar. 5 Dəhə zərsal yar tangərma tə hə'i Masar kwa tah, gheya tə zə'ualə Fir'auna, nda tə ngya ku dzəga təlkur, kwa'a səya tə zə'ualə kushinya kwatəra nda tə bəra ha'a, ana dəhə yar tangərma nə sərshishi kwa kuɗa. 6 Njo ləla 'ual'ual tə dəhə hə'i Masar, tiwi nda a da nja ta mər wa, ya a tsə'u njo tsakətə mər səkə wa. 7 Kəl ja, ku huɗa njir Isra'ila, a mada həya zhang da kwa mi ndə ndara sershishi wa.> Məl na hyo zəndəbiya ənda Tlakə tau tə gəl ku pama njir Masar ana njir Isra'ila. 8 Dəhə njirawawa'a nghə ingə kwa shili da ya, ndo shili uzhi huɗə ɗa ndo na, <Ma'i ma dəhə hi kə'i nji inda kwa nəu ngha!> Ahir nga yo təra.>> Ana huɗatla Musa tə ngyar Fir'auna ga təra.

9 Tlakə tə nar nyi nə Musa, <<Fir'auna kwa ngyar səhimi da ka, ga ya tsakətə char sər məngəl ku Masar.>> 10 Musa ana Haruna tə mər dəhə sər məngəl inə huɗə Fir'auna, kəl ja, Tlakə tə mərtə ɗufwa Fir'auna ɓaɓaləu, ngə cha ngyar wuniya njir Isra'ila tsa biya ku hə'i nda.