Ladər Dləgəlnda
12
1 Tlakə tə nar nyi nə Musa ana Haruna vu Masar, 2 <<Hya na kwa ɗa ka tangərmar hya nəhi, tangərmar hya nə fa kəhi. 3 Nar nyi nə dəhə dlama njir Isra'ila ənda pishir hanyi kumma nə hya na, kala sal ki kwa səya gam nə njir ki nyi, zhang nə kala ki. 4 Ma cha gam nda dəgal tsa njir ki nda, ba nda təkəya na təwul nda ləhə dzənda, nja ɗənghatə na ɗangkura nji nda ku kinda. Hya dzətə ɗangkura gam nda njo gwa'a nda kala ndə kwa ɗəa. 5 Sərshishi nda hyo tabiya cha ɗa fa zhang, ya sal, nda kəla tyakəm, hyo mbar gwa'ari ku huɗa kətəng əngə wa kua. 6 Hya ɓəlatə nda kəl pishir hanyi kwabufwaɗu nə hya na, sakanda ngə ja, dəhə dlama nji nə Isra'ila kwa tlakənda wulya abakəu. 7 Ba'a nda gwa'ari mashi nda ɓəsəti tə shimbal nə nyaki kya'a ana gi kəra nyavi nə ki kənda, tə mbwanda ndo ɗə kumənda ti. 8 Pishinda tanyi vu'i ndo ɗə kumə nda tsatsanyi təkəra hu'u, ana hyali ɗəwatə, ana gwazhilakə nda nja mər kəla tləlam. 9 Ngwa hya ɗə kumə ngə katla'u ndara nja tagu na ɓiti wa, kəl ja, hya tsagu na hu'u, kər, hi ana hali. 10 Ngwa hya ngyari vi wurtə kər wa, macha vanyi nda nda tə həya dzə tə səkə mbudla, tuku hya nginda. 11 Janə ənda hyo ɗəa: daura kəhi mbambanyi na gyarakən, na ɓiɓi kəhi ku hya hi, zəwa kəhi ku cha hi. Hya səm tə kusa'a; aka sər sum nə ladər dləgəlnda, nə Tlakə nga.>>12 Ku vu'i nda tanyi yo tahəya Masar, yo tsəya kala yar tangərma nə zərsal kya'a nə ndəu, ana sər shishi, yo tlanda nyi nəuma nə dəhə katə Masar. Naya Tlakə na. 13 Mashi ngə kwa ngya ka ba'ada nə hi ku dəhə kinda hya kwa; ma ya la'a mashi nga, yo dləgəlnda ki kəhi. A təmachi da kwa uya hi ku sakanda yo tsa nji vu Masar wa.
14 <<Bəji nda hyo kina ɗanghatə na; aka dəhə nyandəla hi ndo da shil biyama hyo mər nəna ladər nə Tlakəu, gadlagadla na, nə ba'a sakamani. 15 Hanyi məɗəfa hyo səm gwazhilakə nda nja mər kəla tləlam. Pishir hanyi tangərma hya fa'abiya tləlam ku ki kəhi, aka kala ndə nda tə səm sə nda tləlam kwa, ghəya tə tangərmar pəchi nda ba'anə hanyi məɗəfəkunyi tuku njo həbiya nyi ku pama njir Isra'ila. 16 Pishir tangərmar pəchi hya tsəmtə dzə ku kartikur, hyo ɓəla mər vanyi səkə pishir hanyi məɗəfəkunyi. Ngwa hya da mər tlər ku dəhə hanyi ingə wa, kəl nda hya ɓatliya nyi sərsum nə kala ndə ka cha səma, wur sənda hyo kina mər nga.
17 <<Hya mər ladər gwazhilakə kəla tləlam, aka pishinda ngə ya təkəbiya pama hi ga fa'abiya hi zəbiya vu Masar. Ladər na a ngyatə ka gadlagadla nə hi nda hyo mər ba'anawa. 18 Aku tangərmar hya hyo kwasə gwazhilakə kəla tləlam, ghəya tə pəchir akə nə kwabəfwaɗəkunya hanyi tsa'a tə pəchir akə nə mətləkumnyi parnya zhang kunya hanyi. 19 Hanyi məɗəfa əngwa nja uya tləlam ku ki kəhi wa. Ya kala ndə nda tə səm sə nda na tləlam kwa, njo həbiya nyi ku pama njir Isra'ila, mada mihiɓi cha ndara ndər mələm. 20 Ngwa hya da səm sə nda na tləlam wa. Dəhə mbwa nda hya ngya ti, tuku hya kwasə gwazhilakə kəla tləlam.>>
21 Təma ngə Musa tə tsəmtə dəhə njira wawa'a nə Isra'ila ga nar nda, <<Ma'i ma kuskus hya ɗəmtsə sərshishi hya tsəya ka ladər nə dləgəlnda aka njir ki kəhi. 22 Hya gwa'ari hyali izop, hya gu mashinda ku shala nda ba hya ɓəsətə tə shimbal nə nyavi, gya kəra cha ana tə yimbəla cha tsa'a kya'a. 23 Ma sakanda Tlakə kwa tərabiya ku hə'i Masar ka cha tsəya njir Masar, cho la'a mashi gya kəra ana a tə yimbəla shimbal inda, ba cha dləgəlnda kinda, a da cho ngyari chama nə tah cha gwa ku ki ingə ka cha tsəya hi wa.
24 <<Hya ɓəlatə dəhə sə inga cha ɗa ka gadlagadla nə ba'anawa a nə hi ana nyandəla hi. 25 Ma hya gwa ku hə'i nda Tlakə kwa nəhi, wi nda cha mər alkawal, hya mər ənga. 26 Ma ngulisha'a kəhi tə jau hi, <Mi ngə ladər nga təkəra?> 27 Nar nda ma, <Ladər nə dləgəlnda anə Tlakəu, nda dləgəlnda ki njir Isra'ila a vu Masar ga tsanda ki kəmən ku sakanda njo tsa njir Masar.> >> Təma ngə nji inda tə uzhi ga hətə səli nə Tlakəu. 28 Njir Isra'ila tə mər tang wi nda Tlakə tə tsau nda bar təwa Musa ana Haruna. 29 Adala vu'i nda, Tlakə tə kuɗənda zərsal yar tangərma ghəya tə zə'ualə Fir'auna nda ku dzəga təlkur, səya tə zə'ualə nə ndə nda ku jarum, əngə ma'a yar tangərma nə dəhə sərshishi tə kuɗa. 30 Fir'auna ana dəhə njirawawa'a nyi ana dəhə njir Masar tə hya'atə vu'i, kəl lələ dzəgamdzəgamə njo ngatə ku dəhə hə'i Masar. A ki da zhang kəla ndə tə tah kwa wa.
Biyar njir Isra'ila vu Masar
31 Fir'auna tə sə nə Musa ana Haruna vu'i nda ga na, <<Təra ma hya ngyar nji ɗa naka ana njir Isra'ila! Ma'i ma ki hə sili nə Tlakə wi nda hya gədi. 32 Təra ma dəhə ka kətəng kəhi, ka tla kəhi. Kəl ja, ka səkəɗa papa'akur.>>
33 Njir Masar tə nar nyi nə nji, nda kusa ngyar hə'i nda, nda na, <<Ma əngə wa məno kuɗə dəhəu!>> 34 Aka ənga njir Isra'ila tə pəu upə zukzukwa nda a tləlam da kwa wa ku kyawa, ga pəɗəu ku ləkutə kənda ga hakəu ku yimbəlya nda. 35 Njir Isra'ila tə mər wi nda Musa tə nar nda, nda gədi kari nə azurfa ana bəjingha ka ləkutəu. 36 Tlakə tə mərtə njir Isra'ila tə uya kwambiyakur tsa njir Masar, ngə nda nə nda sə inda nda gədi nda, təwa ənga nda fa'aya gəna njir Masar.
37 Njir Isra'ila tə hya'tə vu Ramases yi Sukot. Shili kwa ɗa 600,000 ana hi, a nja jiga mahi'i ka ngulisha'a wa. 38 Nji ɗang nda pa'a njir Isra'ila tə təra ka nda, ana sərshishi ɗanghəu, kətəng ka tla. 39 Nda mərtə waina na upə zukzuk nda nda zəbiya nə vu Masar nda. Upə zukzuk nda a tləlam da kwa wa, aka nja gədləbiya nda na kusa a da nda nau mərtə nyi sərsum nə kərnənda wa.
40 Njir Isra'ila tə ngya vu Masar fa 430. 41 Pəshi nda fa 430 kwa nyi, pəshinda ngə dəhə nji nə Tlakə tə biya ka dzuk ka dzuku. 42 Aka ku vu'i nda Tlakə tə ɓəla nda ga cha fa'abiya nda zəbiya vu Masar, njir Isra'ila tə fiya vu'i nda ka həsəli nə Tlakəu, ba'a nə nyandəla nda ndo shili hi.
Gadlagadla Ladər Dləgəlnda
43 Kəl ngə Tlakə tə nar nyi nə Musa ana Haruna, <<Janə gadlagadla nə ladər dləgəlnda, a mihiɓi do səm wa. 44 Kala mava nda hya ɗəlbiya kwa səm ahir hya tlanda nyi bədzang, 45 mihiɓi nda shili ka hanyi yiɗau ana ndə nda nja hətə ka tlər wazəba da kwa səm wa. 46 Tuku nja səm ku ki zhang, a da njo gwa'ar kum nda kwa təra nə biya wa. A da njo ɓəliya mada ɗəhi zhang wa. 47 Dəhə njir Isra'ila kwa səm ladər nga.>>
48 <<Mihiɓi nda na ngya ku pama hi nda kwa gwa'a cha səm ladər nga, cha tlanda nyi bədzang nə dəhə nguli shili nda ku ki nyi, təwa ənga cho nau səm ladər nga wi ndə nda nja yah ku hə'i nda. A sal nda pa'a nja tlanda nyi bədzang da kwa səm wa. 49 Əngə tanyi tsə'u ndə nda nja yah ku hə'i nda, ana mihiɓi nda na ngya ku pama hi.>>