Dzəvə yar tangərma
13
1 Ngə Tlakə nar nyi nə Musa, 2 <<Dzəvəya ɗa kala zərsal nda nja yah tangərma. Kala sə salsal nda nja ghəya yah tangərma, ndara ndəu, ndara sərshishi na'a inga.>>3 Kəl ngə Musa tə nar nyi nə njir Isra'ila, <<Hya maka ɗənghatə na bəji na, bəji nda hya zəbiya vu Masar zəbiya ku mavakur, aka Tlakə tə zəbiya nahi na chi nə gyalkur, gwa hya da səm kala sə nda na tləlam kwa wa. 4 Ənya, a tə hya nə Abib, hyo təra. 5 Ma Tlakə tə yi na hi tə hə'i njir Kan'ana, Hitti, Amori, Hor ana hə'i njir Jebusi, hə'i nda nja səmnda nyi fəla nə jival kəhi njo nə hi, hə'i nda na 'ua ana mwamwa kwa, hya ɓəlatə ladər nə ku hya na. 6 Hyo kwasə gwazhilakə kəla tləlam hanyi məɗəfa, kəl ja pəshir hanyi məɗəfkunyi cho ɗa ka pəchir ladər həsəli nə Tlakəu. 7 Aku hanyi məɗəfə inga, ngwa nja da la'a sə nda na tləlam kwa ku pama hi wa, ya ngwa nja da la'a tləlam tsa hi wa. 8 Hya dəkar nyi nə ngulisha'a kəhi ənda, <Yo mər sə na aka sə nda Tlakə tə mər nə ea ku bəji nda cha fa'abiya ea zəbiya vu Masar.> 9 Ladər ngə kwa ɗa sər ɗənghatə nda hyo mbatə tə cha hi ana ku nyama hi, aka ga gadlagadla Tlakə ɗa tə chimir nya hi. Aka Tlakə tə fa'abiya hi zəbiya vu Masar na gyalkur nyi. 10 Tuku hya ɓəlatə tsaubar na tə bəji tsa'atsa'a kala fa.>>
11 <<Ahir Tlakə tə gwa na hi tə hə'i Kan'ana ga nə hi, wi nda cha mər alkawal ana səmfəla nə hi ana nə jival kəhi, 12 hya nə nyi zərsal nda nja yah tangərma. Dəhə yar tangərma sə salsal nə sərshishi nə Tlakə inga. 13 Hya pəliya kala yar tangərmar nə kwara, kəl ja macha a da hyo pəliya nyi wa, hya ɓəliya wulya cha. Hya pəliya kala yar tangərma nə nguli shili kəhi.
14 <<A biyama ma zər nghə tə jau ngha, <Mi nə sənə kwa cha?> Hya nar nyi, <Ana chi nə gyalkur Tlakə tə fa'abiya ea zəbiya vu Masar, zəbiya ku hə'i mavakur. 15 Nda Fir'auna tə ngyar wuniya ea ea təra, Tlakə tə kuɗənda dəhə yar tangərma ku Masar, ndə ana sərshishi. Nacha na gwa'atə yo hatəmachi nə Tlakə na yar tangərma nə kala sərshishi ka ya pəliya kala zərsal yar tangərma ɗa.> 16 Ya cho ɗa ka sər ɗənghatə tə cha ea ana ku nyama ea ənda Tlakə tə fa'abiya ea na cha cha nə gyalkur.>>
Dləgəl Fa'a Dəgal
17 Nda Fir'auna tə wuniya njir Isra'ila nda təra, Hyel da nəu na nda təwa laku nda tə tərabiya tahə hə'i Filistin, madangə ɓatsə tanyi ba nda wa. Aka Hyel tə na, <<Ma nda gwa ku pa, kəra nda kwa nau sha ndo ɓəl ta nda gwa Masar.>> 18 Ngə Hyel tə ma'i na nda tahə laku dadil takə təwa Fa'a Dədzəu. Əngə njir Isra'ila tə ngyar Masar wi ləvaləva inda tə ɓatliya ka pa.
19 Musa tə fa'atə ɗihi Yusufu, aka Yusufu tə səmnda fəla nə nguli shili Isra'ila cha na, <<Hyel kwa da shili vala hi. Ma cha mər ənga, tuku hya təra na ɗihi ɗa, ngwa hya ngyar wa.>>
20 Njir Isra'ila tə ngyar Sukot ga yi ngya vu Etam a tə yimbəlya dadil takəu. 21 Əpuchi Tlakə kwa ma'i manda na ləɓəkə ndalndala, Cha kwa nənda vimbəlmbəl hu'u kaɓəkaɓa. Aka ga nda nau ma'i vu'i na pəchi. 22 A Tlakə da tə hənɗa ləmbəkə ndalndala nda ndara nə hu'u nda tə mɓwar ngya nyi a mar njir Isra'ila wa.