DƏLABIYA 14

1 Kəl ngə Tlakə tə nar nyi nə Musa, 2 <<Nar nyi njir Isra'ila nda ɓəl yahi nda yi ngya vu Pi Hahirot, ku pama Migdol ana fa'a dəzəu. Nda ngya nya fa'a, nda kwa ndzam dzə na Ba'al Zefon. 3 Aka ənga Fir'auna kwa jigadəma cho na, <Yau wula njir Isra'ila kwa wi tə dadil takəu.> 4 Ya yo mərtə ɗufwa Fir'auna ɓaɓaləu, ya cho gədlə nda. Kəl ja, yo uya nyi səli nə kərɗa təwa Fir'auna ana dəhə ləvaləva nyi, ya njir Masar kwa zəndə ənda naya ngə Tlakəu.>> Kəl njir Isra'ila tə mər ənga.

5 Manda ɓwanya tə həya təl Masar təkəra njir Isra'ila təra tə na hwi, ngə jigadəma Fir'auna ana njirawawa'a nyi tə sha ngə nda na, <<Mi ngə məna məra? Məna ngyar dəhə njir Isra'ila tə təra, ga tar mavi'i.>> 6 Ngə Fir'auna tə ɓatliya charkaina taku pah ngə cha nga ləvaləva i'i. 7 Cha hətə njir nau dlə charkaina taku pah 600 nə Masar, ana həyadzər charkaina taku nə Masar ana gau kənda. 8 Kəl ngə Tlakə tə mərtə dufwa Fir'auna təl Masar ɓaɓaləu, ngə cha gədlə njir Isra'ila, njinda tə biya təra gangkər. 9 Kəl ngə njir Masar ana dəhə ləvaləva Fir'auna, dəhə taku nyi, ana njir charkaina taku tə gədlə njir Isra'ila. Ngə nda həya njir Isra'ila a nya Bahar ləhə dza Pi Hahirot nda kwa ndzam dzə na Ba'al Zefon. 10 Nda njir Isra'ila tə la'a ənda Fir'auna ka ləvaləva nyi kwa shili, kəl ləvər tə səya nda ngə nda tiwi nə Tlakəu. 11 Nda nar nyi nə Musa, aka a hu da vu Masar wa na gwa'atə ka zəbiya naea ga ea kuɗə tə dadil takə nə ya? Mi nə ka mərtə ea ənə nan ja? 12 A da ea nar nghə vu Masar ya, <<Ngya ea səkəea ea mər mavakur nə njir Masar ma? Bəliya ea nda ngya ka mər mavakur nə njir Masar tsa eo kuɗə tə dadil takə na.>>

13 Ngə Musa tə wum nə nji inda ga na, <<Ngwa hya da ləvər wa, ta'i ma hinghəu, hyo la'a dləuya nda Tlakə kwa shili nə ənya. Njir Masar inə hyo la'a ənya na, a tsə'u hyo tsakətə la'a nda səkə wa. 14 Tlakə kwa patə ya hi, ta'i ma hinghə nəkəhi.>>

15 Kəl Tlakə tə nar nyi nə Musa, <<Mya gwa'atə hyo tiwi na'a? Nar nyi nə njir Isra'ila nda ma'i biyama. 16 Har tamba nghə ka hatə cha kə yi təkəra fa'a, ga ɓiti təkəbiya dza, njir Isra'ila tərabiya tahə fa'a tə hə'i 'ul'ula. 17 Yo mərtə ɗufwa njir masar ɓaɓaləu ya ndo nəu nda gwa. Təwa ənga yo uya səli tsa Fir'auna ana dəhə ləvaləva nyi, təwa charkaina taku nyi ana njir dlə taku nyi. 18 Njir Masar kwa zəndə ənda naya ngə Tlakəu ma ya uya səli təwa Fir'auna, charkaina taku nyi ana njir dlə taku nyi.>>

19 Kəl chama Hyel, nda kwa ma'i biyamar ləvaləva njir Isra'ila nda tə ɓəl biyahin nda. Ləmbəkə ndalndal nda tsə'u tə təra biyahin nda. 20 Ləmbəkə ndalndal nda tə ta'i tanyi ku pama njir Masar ana njir Isra'ila. Dəhə vu'i ləmbəkə nda tə mərtə kutlə təwa bangtiti ana vimbəlmbəl bangtiti, dəhə vu'i a vanya dzuku da kwa nau ləhətə vanyi wa.

21 Kəl Musa har cha cha ya təkəra fa'a dəgal nda, kəl Tlakə tə bəɗiya lakur ɓiti na gyang dəgal təwa zədər pəchi. Gyang nda tə fi dəhə vu'i, ga shandi huɗə dəl ka hə'i 'ul'ula. 22 Ngə njir Isra'ila tə biya təwa ghadar dəl tə hə'i 'ul'ul, ana bangu ɓiti tə chəsəm ana matsala nda!

23 Kəl njir Masar dəhə taku Fir'auna, njir charkaina taku, ka njir dlə taku tə gədlə njir Isra'ila gwatə ghadar fa'a nda. 24 Kəl ja, təvi vu'i wura, Tlakə tə ndzam səya təkəra ləvaləva Masar ku hu'u kaɓəkaɓa ana ləɓəku ndalndala, ga gwazhiya jigadəma kənda. 25 Tlakə tə shandə ganga charkaina taku Masar, ga mərtə dzau tsa nda da dləbiya, ngə nda na, <<Mən hwi tamən tsa njir Isra'ila! Tlakə kwa pah njir Masar tə nyanda !>>

26 Manda dəhə njir Isra'ila tə biya nyabam, ngə Tlakə tə nar nyi nə Musa, <<Har cha ka yatə kəra fa'a ngə səkəu, ga ɓiti nga ɓəl shili cha haɗiya njir Masar ana charkaina taku ana njir dlə taku.>> 27 Ətsəu nda pəchi tə ghəya zəɗi, Musa tə har cha cha yatə kəra fa'a nda, kəl ɓiti nda ɓəl shil tə mbwa nyi wi nda cha haaɗa. Njir Masar kwa gwa'a hwibiya, kəl ja, Tlakə tə mbəlau nda gwatə fa'a nda. 28 Kəl ɓiti nda tə ɓəl ga haɗiya dəhə njir dlə charkaina taku ana njir dlə taku dəhə ka ləvaləva Fir'auna. Dəhə njir Masar inda tə gədlə njir Isra'ila gwatə fa'a nda, mada zhang da tə mbəɗə wa.

29 Kəl ja, njir Isra'ila tə ma'i biya tə ghadar fa'a tə hə'i 'ul'ula, aka ɓiti nda tə ta'i wi bangu mada təwa bari. 30 Təwa əngə ngə Tlakə tə dləuya njir Isra'ila ku cha njir Masar pəshi nda. Kəl njir Isra'ila kwa la'a dza njir Masar biya nyabam. 31 Manda njir Isra'ila tə la'a gyalkur dəgal nda Tlakə tə char təkəra njir Masar, kəl ləvər tə səya nda huɗə Tlakəu. Ngə nda nənyi jiri nə Tlakə ana mava nyi Musa.