Miya ka Musa ana Miriyam
15
1 Ngə Musa ana njir Isra'ila tə na miya fal Tlakəu,<<Yo na miya nə Tlakəu,
aka ana səli cha gagaɗa.
Cha mbəlau
taku ana ndər dlə gwatə fa'a.
2 Tlakə ngə dunama ɗa ana miya ɗa, a ɗa tə cha ka dləuya ɗa.
Nacha ngə Hyel ɗa,
ya kwa fal nyi,
Hyel nə ada ɗa, yo hətənyi səli.
3 Tlakə ndər nau pa cha,
tləm nyi Tlakəu.
4 Cha mbəlau charkaina taku Fir'auna ana ləvaləva nyi
gwa tə fa'a.
Ləvaləva ɗəmɗəm nə Fir'auna
tə sa ku Fa'a Dəzəu.
5 Ɓiti tə sanda nda wi mandzəa,
nda təra səyo ndəla ɓiti wi hangu.
6 <<Tlakəu, gyalkur chisəmaka
'ual gagaɗa.
Tlakəu, chisəmaka
tə ɓəɓəlnda njir dawa.
7 Aku dəgalkur səlir təlkur ngha,
ka wiɗənda njir mər dawa naka.
Aku iza'ur huɗatla ngha
ka nginda nda wi ngə hu'u kwa nginda sar 'ul'ula.
8 Ana dunamar səpi nə chiraka,
ɓiti tə mərtə bangu.
Ɓiti hwihwi tə hya'atə tə ta'i wi bangu,
ndzuɗakər kwardəl tə shəi wi hangu tə ghadar fa'a.
9 <<Ndər dawa tə bu kərnyi,
<Yo gədlə nda, yo ndəɗiya nda.
Yo təkəya kwazhalɓi nda ya fa'aya tsa nda,
dəhə sə nda yo i yo dləuya.
Yo tsəbiya katsakər ɗa,
ya yo kuɗənda nda.
10 Kəl ja, nda ka fatar səpi ngha
ngə fa'a tə haɗiya nda.
Nda təra səya ku dəla ɓiti wi hangu dəgal.
11 Wa ngə pabiya da ka
ku huɗa hyel ingə ja Tlakəu?
Wa wi naka ana səli ku kartikur,
sər ləvəra ku gyalkur, ndər mər sər muniya?
12 Ka har chisəma ka
ngə hə'i tə ndasənya njir dawa kə ea.
13 <<A ku nyida ngha nda kəla kwa wura ko nəuna
nji inda ka mbəɗandi.
14 Nda alenya nji tə ngati, nda go tsamətlaɗəu;
ləvər tə səya njir Filisti.
15 Ləmba təl i nə njir Edom tə tləa,
njirawawa'a nə Moab kwa tsamətlaɗəu,
nji nda na ngya vu Kana'ana tə lə'ua na ləvəra.
16 Ləmba nda tə tləa, ngə ləvər tə səyanda.
Ana gyalkur cha ka,
nda ta'i hərtsəkə wi ngə tə mangu,
kəl sakanda njingha tə tərabiya, ja Tlakəu,
kəl sakanda nji nghə inda ka pəliya tə tərabiya.
17 Ko səgwa na nda ko chiya nda
kyo mə nghə nda ka fiya ka ki ngha,
mbwa nda nakə Tlakəu, ka mərtə ka mbwar ngya ngha.
Mbwa'alə ngha, nakə Tlakəu, nda ka fiya na cha kərngha.
18 Tlakə kwa səm təlkur,
aka ba ba'anawa.>>
19 Sakanda taku nə Fir'auna i'i, ana charkaina taku i'i ba'a njir dlə taku tə gwa tə fa'a nda, Tlakə tə ɓəlandə ɓiti nda shili təkəra nda səkəu, kəl ja, njir Isra'ila tə tərabiya tahəu fa'a nda tə hə'i 'ul'ula.
20 Ngə Miriyam mala nda kwa takər, kwamənya Haruna, tə hətə tamborin ga tləya miya, ngə mahi'i tə nəu nyi na tamborin ndo utsa. 21 Miriyam tə nar nda miya,
<<Fala ma Tlakəu,
aka səli nyi 'ual gagaɗa.
Taku ana ndər dləa
satə kwatə fa'a.>>
Ɓiti Ɗəwatə vu Mara
22 Kəl ngə Musa tə nəu na nda hya'atə ku Fa'a Dəzə nda nda təra gu dadil takə Shur. Hanyi makər nda ma'i ku dadil takə nda, a da nda uya ɓiti wa. 23 Manda nda shili Mara, a da nda nau sa ɓiti mələm nda wa, aka ɓitiɓitinyi ɗəwatəu. (Nacha gwa'atə njo nga mələm nda Mara.) 24 Ngə nji tə ghəya huhuni nə Musa ndo na, <<Mi eo sa?>>
25 Kəl Musa tə tiwi nə Tlakəu, ngə Tlakə tə char nyi wu tutləu. Cha vakəu gu ɓiti ɗəwatə nda, kəl ɓiti nda tə ɗa nənəməu. Tangnda Tlakə tə tsau nda bar ga nə nda gadlagadla, ya tangnda tsə'u cha dzə nda. 26 Cha na, <<Ma hya səhimi na sənam da Tlakə ga mər sə nda tsa'atsa'a tə lya cha, ya ngə hya ɗa kəriwa nə tsaubar nyi ga ɓəlatə gadlagadla nyi, a da yo shili na shilkə nda ya shili nə təkəra njir Masar nda wa, aka naya ngə Tlakə nda kwa mbandə hi.>>
27 Kəl ngə nda shili Elim, tangnda tsədzəɗə ɓiti kwabəmətləu ana wur dyabino məɗəfəkumnyi, ngə nda ngya tangnda ləhə nya ɓiti.