Manna ana Takulashəu
16
1 Kəl dəhəkura njir Isra'ila tə biya vu Elim ga təra gwatə dadil takə Sin, nda ku pama Elim ana dəgəl Sinai. Nda yatə mbwa ngə pishir hanyi kwabətufəu nə hya mətləu, hya zhang ahir nda ngyar hə'i Masar. 2 Kəl dəhə njir Isra'ila tə jiganya təkəra Musa ana Haruna ku dadil takə nda. 3 Nda na, <<Chim kəea Tlakə nda tə kuɗənda ea vu Masar! Hinda kum da eo ɗəa, ya eo kwasə dəhə chul sərsum nda eo i, ngə ka shili na ea ku dadil takə na, ga huɓa kuɗənda ea.>>4 Kəl Tlakə tə nar nyi nə Musa, <<Yo pətə gwazhilakə səya ki huɗamələm wi ngə par kwa təɗa. Nji kwa biya tatsə kala pəchi aka ɓupəchi nda. Təwa ənga yo dzətə nda ya la'a ndara kwa nəu nda tsaubar ɗa. 5 Pəshir kwakunya hanyi nda tatsə səndo nji ka hanyi mətləu.>>
6 Kəl ngə Musa ana Haruna tə nar nyi nə dəhə njir Isra'ila, <<Aba akəu hyo zəndə ənda Tlakə ngə tə zəbiya nahi vu Masar, 7 ya əmbudla hyo la'a səlir Tlakəu, aka a ngatə tə cha huhuni kəhi təkəra cha. Wa ea nda hyo huhuni təkəra ea?>> 8 Musa tə na tsəu, <<Tlakə kwa nə hi kum aba akəu ka hya ɗəa, əmbudla tsə'u cho nəhi gwazhilakə sənda kwa nji hi, aka Tlakə ngatə tə huhuni nda hyo huhuni təkəra cha. A təkəra Tlakə ngə hyo huhuni a da təkəra ea wa, wa ea?>>
9 Təma ngə Musa tə nar nyi nə Haruna, <<Nar nyi nə dəhə njir Isra'ila, <Shili ma mar Tlakəu, aka a ngatə cha huhuni kəhi.> >>
10 Ma Haruna kwa ɓwanya nə dəhə njir Isra'ila, ndo nəɗə biya təwa dadil takəu, kəl janə səlir Tlakə tə biya ku ləmbəkəu.
11 Kəl ngə Tlakə tə nar nyi Musa, 12 <<A ngatə tə ya jiganya njir Isra'ila, ka nar nda, <Aba akəu ndo uya kum ndo ɗəa, ana əmɓudla ndo uya dəhə gwashilakə nda ndo i. Təwa ənga hyo zəndə naya ngə Hyel Tlakəu.> >> 13 Aba akə pəshi nda kəl takulash ɗang tə səya, ga haɗiya mɓwanda nda tə nda, aba mbudla tsə'u kəl kuchikəpa tə haɗiya hə'i. 14 Ma kuchikəpa nda kwa pəa, kəl alenya sə pərtəu wi upursa tə haɗiya hə'i. 15 Nda njir Isra'ila tə la'a nda na səu, kəl nda na nə kərnənda, <<Min sə na?>> A da nda zəndə ndara sər mi ngə wa.
Musa tə nar nda, <<Nənnə ngə gwazhəlakə nda Tlakə tə nə hi ka hya səma. 16 Janə sənda Tlakə tə na, <Kala ndə kwa tatsə sənda kwa nji nyi, kətas dəkə sə mətlə ka kala ndəu, tsa'atsa'a na nji nda ku madləɓa ngha.> >>
17 Njir Isra'ila tə mər wi nda nja nar nda, alenya nji tə tatsə 'ualəu alenya nji kushiu. 18 Ya nda nda dəkətə na kətasəu, ndə nda tatsə 'ualəu a da ɗa 'ual gagaɗə wa, ya ndə nda tatsə kushiu a da tutə wa matsa sənda cho gwa'a wa.
19 Kəl ngə Musa tə nar nda, <<Ngwa kala ndə da fiya ka mbudla wa.>>
20 Kəl ja, alenya nji da səhimi da Musa wa, nda ɗəwanda alenyi ka mbudla, kəl ja a yah hwa'ami ga ghəya shi'uni, ngə huɗa Musa tə tla tsa nda.
21 Kala mbudla madawa kwa tatsə sənda kwa nji nyi, ya ma pəchi tə dəda, həyadzə nyi nda kwa lə'ua. 22 Pəshir kwakunya hanyi, ndo tatsə zhaka mətlə nə sənda nda tsəlna ta, kala ndə kətasə dəkə sə fwaɗəu, təma ngə njirawawa'a mələm tə shili nar nyi sənda tə ɗa nə Musa. 23 Ngə cha nar nda, <<Janə sənda Tlakə tə na, <Əzəkəu pəchir ɓəlsar nga, Pəchir Ngyaməngya karti nə Tlakəu. Aka ənga, səltə ma sənda hyo kina səla, hya ɓagu sənda hyo kina ɓagu. Hya fiya sənda həyadzə ka mbudla.> >>
24 Aka ənga nda fiya ka mbudla wi nda Musa tə nar nda, ya a da yiɗa ndara a yah hwa'ami wa. 25 Ngə Musa tə nar nda, <<Kwasə ma ənya aka ənya Pəchir Ngyaməngya nə Tlakə na. A da hyo biya uya tə kəra hə'i ənya wa. 26 Hanyi kwah hyo tsəma, kəl nda pəshir kwakunya hanyi a da hyo uya wa.>>
27 Kəl ja, pəshir məɗəfəkunya hanyi nda, alenya nji tə biya ka nda tatsi, ya a sə da nda uya wa. 28 Kəl ngə Tlakə tə nar nyi nə Musa, <<Ba'a sakaman hyo ngyar ɓəlatə gadlagadla ɗa ana tsaubar ɗa? 29 Hya fəu ku kəra hi ənda Tlakə tə nə hi Pəchir Ngyaməngya, nacha gwa'atə pəshir kwakunya hanyi cho nə hi gwazhilakə nə hanyi mətləu. Kala ndə cha ngya tangnda cha tə pəshir məɗəfəkunya hanyi, ngwa madawa biya wa.>> 30 Aka ənga, nji tə ɓəliyasar pəshir məɗəfəkunya hanyi.
31 Kəl njir Isra'ila tə nga gwazhilakə nda manna. Pərtə cha wi mali, məsɗakə wi mwamwa chiɗi. 32 Ngə Musa tə na, <<Janə sənda Tlakə tə na, <Dəkətə ma kətasə mətlə nə manna hya fiya ka zamin nda kwa shili, ga nda la'a chulkə gwazhilakə nda ya nə hi nda ya fa'abiya hi zəbiya vu Masar.> >> 33 Kəl ngə Musa tə nar nyi nə Haruna, <<Hətə jadla ka pəu kətasə mətlə nə manna kwa. Ka fiya mar Tlakəu ka zamin inda kwa shili.>>
34 Ngə Haruna tə pəu manna ku jadla nda ga fiya biyamar Gwarara Mbandər nda, ka nja fiya. 35 Njir Isra'ila tə kwasə manna fah fwaɗəkumnyi, kəl nda nda shili tə hə'i nda njo nau ngya kwa, nda kwasə manna kəl nda nda həya ɓəlkər hə'i Kan'ana.
36 (Njo nga kətasə mətlə kunya njir Ibrani) <<Oma.>>