Ɓiti hya'atə ku məa
17
1 Dəhə njir Isra'ila tə hya'atə tə Dadil Takə nə Sin, nda ma'i hya'atə vanya mbwa ya tə vanya mbwa wi nda Tlakə tə tsau nda bar. Ngə nda yi ngya hi Refidim, kəl ja, ɓiti sa dawa. 2 Kəl ngə njir Isra'ila tə ɓəla jiganya təkəra Musa, <<Nə ea ɓiti ea sa.>>Musa tə ɓəlakə nda, <<Ka mi ho jiganya təkəra ya? Ka mi hyo dzə Hyella?>>
3 Kəl ja, nji inda kwa ngatə hili, ya nda jiganya təkəra Musa səkəu. Nda na, <<Ka mi ka həbiya ea zəbiya vu Masar ka ka kuɗənda ea, ngulisha'a kəa ana sərshishi kəa na hila?>>
4 Kəl Musa tə tiwi nə Tlakəu, <<Mi yo mər na nji na? Batləya tə nda ka nda vəvakənda ɗa na hangu!>>
5 Kəl ngə Tlakə tə nar nyi nə Musa, <<Ma'i biyamar nji inga. Hətə alenya njirawawa'a nə Isra'ila ka hətə tamba nda ka dəgəya Nilu nə nda ku cha ka. 6 Yo yi ta'i biyama nghə hyadza mə Horeb, ka dəgəya mə nda, ɓiti kwa biya kwa ka nja sa.>> Əngə Musa tə mər tə lya njirawawa'a njir Isra'ila. 7 Cha nga mbwa nda Masa ana Meriba aka njir Isra'ila tə huhuni ana aka nda dzə Tlakəu, nda na, <<Tlakə ku pama məm zəma aa da wa?>>
Nja kura njir Amalek
8 Njir Amalek tə shili pa njir Isra'ila vu Refidim. 9 Ngə Musa tə nar nyi nə Joshua, <<Ɗəmtsə shili ka nda biya pa njir Amalek. Əzəkəu yo ta'ita ɗa kyatə dəgəl ana tamba Hyel ku cha ya.>>
10 Joshua tə mər sənda Musa tə nar nyi, cha pa njir Amalek, ya Musa, Haruna ana Hur tə təra gyo kəra dəgəl. 11 Ma dəhə sakanda Musa tə ndəɗabiya cha cha shi huɗamələm, njir Isra'ila kwa kura pa, kəl ja, ma cha həya cha cha, kəl njir Amalek kwa kura. 12 Manda cha Musa tə həɗa, ngə nda hətə hangu ga fiya ku ngala cha ngə cha ngyatanyi ti. Ngə ka Haruna ana Hur tə ta'i, ndə zhang təwa matsal, ndə zhang təwa chisəm, nda gəziya cha cha ga ndəɗabiya shi huɗamələm, ga cha cha ta'i tə mbwar zhang, dlar pəcho hə'i. 13 Təwa ənga Joshua tə kura njir Amalek ana katsakər.
14 Kəl ngə Tlakə tə nar nyi nə Musa, <<Tsəfətə sə na, aka cha ngya ka sər ɗənghati, ka kəratsəntə nyi Joshua cha ngati, aka yo zhazhinda Amalek ku dunəya njo far na nda.>> 15 Musa tə hərtə dzəgana ga fəndzə nyi tləm, <<Tlakə ngə tatawal ɗa.>> 16 Cha na, <<Har ma tatawal Tlakə shi, Tlakə kwa pa njir Amalek ka ba'anawa.>>