Jetro tə ya da Musa
18
1 Jetro fərist nə Midiyan, səlkənya Musa, tə ngatə dəhə sə inda Hyel tə mər a nə Musa ana njir Isra'ila, ana ənda Tlakə tə fa'abiya njir Isra'ila vu Masar.2 Aka ənga Jetro tə shili da Musa, cha shili na Zipora mala Musa, nda cha ɗaka yi fiya. 3 Ətsəu cha mari nguli shili Musa mətləu, zhang tləm nyi Gashom, aka Musa tə na <<Ya ɗa mihiɓi tə mihiɓir hə'i,>> 4 ana tləmər vanya zər nda Eliyazar, aka cha na, <<Hyel kə'i jival ɗa ngə ndər vala ɗa, cha dləuya ɗa tsa katsakər Fir'auna.>>
5 Jetro səlkənya Musa, tsa'a na nguli Musa ana mala nyi, tə shili da cha kwa dadil takəu, tangnda cha na ngya tə dza mə Hyel. 6 Jetro tə sətənyi kurakəu, <<Naya səlkə ngha, mala ngha ana nguli shili nghə tsa'a mətləu kwa shili da ka.>>
7 Kəl Musa tə biya ka ndo ɓə na səlkə nyi, cha uzhi ga gapətə nyi. Nda usar dzə ga təra go madləɓa. 8 Musa tə dəkar nyi dəhə sə inda Tlakə tə mərtə nyi nə Fir'auna ana njir Masar a tə dəbar njir Isra'ila, ana a təkəra ɓwaɓwatə nda nda sa ku laku ana ənda Tlakə tə mbəɗandə nda.
9 Jetro tə mər hirgyaɗi na ngatə dəhə sə mənakə nda Tlakə tə mər aka njir Isra'ila, aka dləuya nda nda Tlakə tə dləuya nda ku cha njir Masar. 10 Ngə Jetro tə na, <<Fal ngyatə nə tlakəu, nda dləuya hi ku cha njir Masar, ana nə ndə nda tə dləuya nji ku cha njir Masar. 11 Sakana a zəndə tə ya ənda Tlakə ngə na gyalkur ndiyamatsa dəhə alenya sə inda njo həsəli nə nda, aka cha dləuya njir Isra'ila ku cha njir Masar nda tə ɗa məndzəau na nda.>> 12 Kəl Jetro səlkənya Musa, tə handa təmachi nə nginda ana alenya sər hatəmachi nə Hyel, ngə Haruna ana dəhə njirawawa'a nə njir Isra'ila tə shili ka nda səm sərsum ka səlkənya Musa a huɗə Tlakəu.
13 Vanya zəkə Musa tə uya mbwar ngya ka nəuma nə nji, nda ta'i ga ɓandə nyi fwatə mbudla tsa'a akəu. 14 Nda səlkənya Musa tə la'a dəhə sə'inda Musa kwa mər nə nji inda, cha na, <<Sər minə ko mər nə nji əna? Mya gwa'atə ko mər sə nə zhangta ngha? La'a nda nja ta'i ga ɓandə nghə fwatə mbudla tsa'a akəu!>> 15 Ngə Musa tə wuma, <<Aka nji kwa shili gwa'a sənda Hyel kwa i. 16 Ma dəhə bəji nda nda na kəpal ku pama kərnənda, ndo shili nə huɗə ɗa, yo shili ɓatliya pama nda ba'a dəkar nda tsaubar ana gadlagadla Hyel.>>
17 Ngə səlkənya Musa tə ɓəlakə nyi, <<Sə nə ko mər nə a da ɗa wa. 18 Nakə na kərngha ana nji'inə kwa shili da kə na, hyo tsəya kərnəhi. Tlər ngə ɗatə 'ual nə ngha, a da ko nau tlər nə zhangta nghə wa. 19 Səhimi da ya sakana yo dəkətə nghə dəma, Hyel tsə'u cha ngya tsa'a naka. Tsa'atsa'a tanyi ka ɗa ka ndə nda kwa ta'i ku pama Hyel ka nji, aka ga ka shili na kəpal kənda nə Hyel. 20 Ka dlədləɓə tə nda tsaubar ana gadlagadla, ana ka char nda ənda ndo ngya ana sə inda ndo kina məra. 21 Kəl ja, ɗəmtsə nji inda ki ku pama dəhə nji ina, nji nda kwa ləvər Hyel, nji inda njo dləukər ni, ana nji inda pa'a kwa dləu vangula ka fiya nda ka njirawawa'a təkəra nji dəbu dəbu, gharəu gharəu, tufkumnyi tufkumnyi ana kumə kuma. 22 Ngya nda nda ɗa ka njir nəuma nə nji kala bəji, kəl ja nda shili na nəuma nda dza'u huɗə ngha, nəuma inda kusəu ndo nau wurandə ku pama kərnənda. Nacha ngə kwa gwa'atə tlər kwa ɗa kaf nə ngha, aka ndo vala ngha. 23 Ma ka mər ənga, ana ma Hyel tə tsau nghə bar na mər ənga, ko nau səsə'uti, ya dəhə nji tsə'u kwa uya sənda ndo gwa'a.>>
24 Musa tə səhimi da səlkə nyi ga mər wi nda cha na. 25 Cha ɗəmtsə nji inda ki ku pama dəhə njir Isra'ila, ga mərtə nda ka gavərma nə nji, njirawawa'a təkəra dəbu dəbu, gharəu gharəu tufkumnyi tufkumnyi ana kumə kuma. 26 Nda ɗa ka njir nəuma nə nji kala bəji. Nəuma inda dza'u ndo shili nə huɗə Musa, kəl ja inda kusəu ndo wurandi.
27 Kəl Musa tə səu səlkə nyi ku laku, ya ngə Jetro tə ɓəl yatə hə'i nyi.