A kyo Mə Sinai
19
1 Aku makərkunya hya ahir njir Isra'ila tə ngyar Masar, ngə nda shili ku Dadil Takə Sinai. 2 Ahir nda ngyar Refidim, nda gwa ku dadil takə Sinai, ngə njir Isra'ila tə ngya tangnda ku dadil takə nda a biyamar mə Sinai.3 Kəl ngə Musa tə təra gyo mə nda ka nda gi ɓə na Hyel, ya ngə Hyel tə nga nyi kyatə mə nda ga na, <<Jan sənda ko səya nar nyi nə ki Jakop ana sənda ko nar nyi nə njir Isra'ila.>>
<<Ngə Tlakə tə nga nyi kyo mə nda ga nar nyi cha nar nyi nə njir Isra'ila, nyadəla Jakop. 4 <Nahi na kərnəhi la'a tə sənda ya mər nə njir Masar, ana ənda ya fa'abiya hi wi a tə babəka duku ga shili na hi da kərɗa. 5 Sakanə ja ma hya nəu nya ya tsatsa'a ga ɓəlatə mbandər ɗa, ku pama dəhə hə'i hyo ɗa ka nji ɗa nda ndiya na səli. Mada ngə dəhə dunəya na'a nga. 6 Hyo ɗa ka Fərist inda kwa hə səli na'a ana hə'i nda karti.> Nacha ngə ɓwanya nda ko par nda.>>
7 Kəl ngə Musa tə ɓəl ga səya tsəmiya njirawawa'a njir Isra'ila inda ga dəkar nda dəhə ɓwanya nda Tlakə tə tsau nyi bar cha dəka. 8 Dəhə nji inda tə wuma, <<Eo mər kala sənda Tlakə tə na.>> Kəl ngə Musa tə ɓəl na wumə kənda gya da Tlakəu.
9 Ngə Tlakə tə nar nyi nə Musa, <<Yo shili da kə ku ləmbəkə ndalndala, tsa'aka nji kwa ngatə nda yo ndər nakə ga ɗa na jiri ku ka.>> Kəl Musa tə nar nyi nə Tlakəu sə nda nji tə na.
10 Ngə Tlakə tə nar nyi nə Musa, <<Ma'i yada nji ingə ka yi dzəviya nda ənya ana əzəkəu. Ka nar nda nda chinda ləkutə kənda 11 nda ɓatliya kərnənda tə makərkunya pəchi, aka pəshi nga Tlakə kwa səya kyo Mə Sinai a tə lya dəhə nji. 12 Ka tiya gəl nə nji a dza mə nda, ka nar nda, Hya gəla ngwa hya da ya dzər mə nga ndara hya tsəkar wa. Kala ndə nda tsəkar mə nga vəlvəl njo tsəya nyi. 13 Vəlvəl njo vakənda nyi na hangu ma əngə wa njo həya nyi na hafa, a nji do tsəkanyi na chi wa. Mada ndəu ndara sərshishi, a da njo ngya nyi na pi wa.> Kəl nda sakanda nja mbəɗiya tələm, nda dzəgwa gyo mə nda.>>
14 Ahir Musa tə səya kyo mə nda, cha dzəviya nda, ngə nda chinda ləkutə kənda. 15 Ngə cha nar nyi nə nji, <<Ɓatliya ma kərnəhi pəshir makərkunya hanyi. Hya ɗa naɗə tsa piya na mahi'i.>>
16 Əmbudla pəshir hanyi makərkunyi kəl jan nghənghəɗi ana dəradlər par, ana ləmbəkə kutləkutlə kya tə mə nda, ana kurakər tələm 'ual'ualəu. Ləvər tə səya kala ndə tangnda dza nda kwa tsamətlaɗəu. 17 Kəl Musa tə nəu na nji biya ku madləɓa kənda ka nda ɓə ka Hyel, ya ngə nda yi ta'ita nda dza mə nda. 18 Kəl dəhə Mə Sinai nda tə hadiya dzə na ear, aka Hyel tə səya ku hu'u. Ear tə hya'atə 'ual'ualəu, kəl dəhə mə nda tə dzədzi 'ual'ualəu, 19 ya kəl tsakə kurakər tələm nda kwa tsaka. Kəl Musa tə ndəra, ya ngə kuraka Hyel tə wum nənyi təwa dəradla.
20 Kəl ngə Tlakə tə səya kyo Mə Sinai ga nga Musa gyo kəra mə nda. Ngə Musa tə təra gi 21 ngə Tlakə tə nar nyi, <<Ma'i ka səya nar nyi nə nji inga ngwa nda da dləgəlbiya gəl ngə ka nda la'a Tlakə wa, ma əngə wa ɗang ku huɗa nda kwa kuɗa. 22 Mada fərist inda kwa maka ɗa ləhə dzər Tlakəu, tuku nda dzəviya kərnənda, ma a da wa, yo kuɗənda nda.>>
23 Ngə Musa tə nar nyi nə Tlakəu, <<A nji do gyo Mə Sinai wa, aka nakə na kərnghə tə təɗəhimi nəea ənda, <Fiya gəl dzər mə nga ka dzəviya cha ɗa karti.> >>
24 Ngə Tlakə tə wuma, <<Ma'i səya ka zədə na Haruna tsa'a naka. Kəl ja, fərist ka nji inga, ngwa nda da gwa'a laku tuku ka nda zədə da Tlakə wa, ma'a əngə wa yo kuɗənda nda.>>
25 Kəl ngə Musa tə səya dəkar nda.