Gadlagadla Hyel kuma
20
1 Təma ngə Hyel tə pə ɓwanya ina,2 <<Naya ngə Hyel Tlakən ngha, nda həbiya nghə zəbiya vu Masar, aku hə'i mavakur.
3 <<Ngwa ka da həsəli nə alenya hyel wa kəl naya.
4 <<Ngwa ka da ɓatlə katə i'i nə kərnənghə pabiya da vanya sə kya huɗamələm ndara tə dunəya kyo dəla hə'i ndara ku ɓiti a kyo ndəla dəl wa. 5 Ngwa ka da uzhi nə nda ndara ka həsəli nə nda wa, aka naya Hyel Tlakən hi, Hyel ya nda na səlkəkur, yo ɓu ngulisha'a ka səpəla'a Adan nda yi kwa'a nə jival ana jimarngilang nə dəhə nji nda tə ngya ɗa, 6 kəl ja, a nə nji inda kwa nyida ɗa, kwa ɓəlatə gadlagadla ɗa yo char nyida nə nyadəla zamin dəbu dəbu.
7 Ngwa ka nga tləmər Hyel Tlakə nghə ɓwa'atanyi wa, aka Tlakə kwa ɓu kala ndə nda kwa nga tləmə nyi ɓwa'atanyi.
8 <<Ka ɗənghatə Pəchir Ngyaməngya ka ɓəlatə nyi na karti. 9 Hanyi kwah ko mər tlər nghə dəhəu, 10 kəl nda pəchir məɗəfəkunyi Pəchir Ngyaməngya ngə nə Hyel Tlakə ngha. Pishinda a da ko mər kala tlər wa, mada nakə təkərngha, mada zər ngha ndara kwa ngha, mavi'i ngha, sərshishi ngha, ndara alenya mihiɓi inda kwa ngya kə'i ka. 11 Aka ku hanyi kwah Tlakə tə ɓatlətə huɗamələm ana hə'i, dəl dəgal, ana dəhə sə inda kwa, kəl ja, cha ɓəliya sar pishir hanyi məɗəfəkunyi. Aka ənga Tlakə tə səkər papa'akur təkəra pəchi nga ga mər tənyi karti.
12 <<Ka hətənyi səli nə ada ngha ana ama ngha, tsa'aka hanyi nghə ɗa ɗang ku hə'i nda Hyel Tlakə nghə kwa nə ngha.
13 <<Ngwa ka da tsa ndə wa.
14 <<Ngwa ka da mər kasalikur wa.
15 <<Ngwa ka da həl wa.
16 <<Ngwa ka da tla gəzhi təkəra təwul nghə wa.
17 <<Ngwa ka ndahuɗə ki təwul nghə wa. Ngwa ndahuɗə mala təwul nghə wa, ndara mava nyi, ndara kwatəra nyi, tla nyi, kwara nyi ndara kala sənda nə təwul nghə n wa.>>
18 Nda nji tə la'a nghənghəɗi ana dəradlər par ga ngatə tələm ga la'a mə nda tə ɗəzətə ear kəl dza nda tə tsamətlaɗə na ləvəra. Ngə nda ta'i ta nda naɗəu, 19 ngə nda nar nyi nə Musa, <<Ndər nəea na kərnghə eo səhimi da ka. Kəl ja, ngwa ka da ngyar Hyel cha ndər na ea wa, ma əngə wa eo kuɗa.>>
20 Ngə Musa tə na, <<Ngwa hya da ləvər wa. Hyel tə shili ka dzə hi nga, ga ləvər Hyel ɗa nya ta hi, cha katə hi tsa mər səpəla'a.>>
21 Nji tə ta'i ta nda naɗəu, ngə Musa kwa ghəza dzə ya dza kutlə ɗimiɗimi nda, tangnda Hyel ti.
Gadlagadla təkəra Dzəgana i'i
22 Kəl ngə Tlakə tə nar nyi nə Musa, <<Janə sənda ko nar nyi nə njir Isra'ila, <A la'a tə hi na kərnəhi ənda ya ɓwanya nə hi səya ki huɗamələm. 23 Ngwa hya da ɓatlətə alenya hyel nə azurfa ndara nə bəjingha, hya həsəli nə nyi təvira naya wa.
24 << <Hya ɓatlətə ɗa dzəgana nyingha, hya hatəmachi ti, hatəmachi kəhi təwa nginda ana ga'a nə daɓəkər, kətəng kəhi ana ku kəhi ana tla kəhi. Dəhə mbwa nda ya fiya ga nja həsəlir tləm ɗa ti, yo shili da hi ba'a səkə hi papa'akur. 25 Ma hyo ɓatlətə dzəgana na hangu na'a, ngwa hya da ɓatlə na hangu nda nja dzəɗiya wa, aka hyo dyaɓəndi ma hya tsəkar na kar tləra. 26 Əngwa hya da hərtə ɗa dzəgana na mbwar gi wa, tsa dura'akur kəhi da chabiyadzə ma hyo gi ti.>