21
1 <<Janə gadlagadla nda ko fiya nda.Mava nda ndər Ibrani
2 <<Ma hya ɗəlbiya mava nda ndər Ibrani, cho mər mavakur nə fa kwah. Kəl ja aku məɗəfəkunya fa, cho ɗa dimur ndəu, ya a da cho ki sə wa. 3 Macha zhangtanyi nja ɗəlbiya nyi, zhangtanyi kwa təra ka dimur ndəu, kəlnda macha mala tsa cha ma nja ɗəl nyi, ndo təra kya'anda. 4 Ma tlakə nyi tə nə nyi mala ya ngə cha yiyah nyi zərsal ndara kwamalakəu, mala nda ana nguli nyi kwa ɗa nə tlakə nyi, kəl ndə nda tanyi kwa təra.
5 Kəl ja, ma mava nda tə biya tə babal ga na, <Yo i tlakə ɗa ana mala ɗa ana nguli ɗa a da yo i dimukur wa,> 6 kəl ba'a tlakə nyi yi na cha huɗə Hyel. Cho yi na cha nya vi ndara dzər sər haɗə nya vi ba'a bədziya hima cha na sər bədza himi. Kəl cho ɗa ka mava nyi ba'anawa.
7 <<Ma ndə tə ɗəlnda kwa nyi ka mava, a da cho ɗa ka dimu wi nda mavi'i shili kwa ɗa wa. 8 Macha a da cha ɗa nə tlakə nyi nda tə ɗəl nyi nda wa, kəl ba'a cha ngyar nja pəliya nyi. A da cha na gyalkur ɗəlnda nyi nə mihiɓi wa, aka a da cha mərtə nyi mənakə wa. 9 Macha cha ɗəlbiya nyi ka cha ɗa ka mala zər nyi tsəu, tuku cha hətənyi wi kwa nyi. 10 Macha ndə nda ɗəlbiya nyi nda tə həbiya nyi ka mala nyi ya ngə cha hə vanya mala, a da cho katə nyi sərsuma, sər handzi ndara cha ngyar piya na mava nda wa. 11 Ma a da cha nənyi sə makər ingə wa, cho təra ya a da cho ki sə wa.
Takasa
12 <<Kala ndə nda dəgə ndə ga tsəya nyi nacha ma'a nja tsəya nyi. 13 Kəlnda macha a da na ikur nyi wa, Hyel ngə tə ngyar cha ɗa ənga, cha hwi tanyi ya tə mbwa nda yo ɓatliya. 14 Kəl ja macha ana ikur ndə cha ɓatliya ka cha tsəya vanya ndəu, hya hənda nyi tsa dzəgana ɗa hya tsəya nyi.
15 <<Kala ndə nda dəgə ada nyi ndara ama nyi tuku nja tsəya nyi.
16 <<Kala ndə nda tə həltə vanya ndəu ndara ga ɗəlnda nyi ndara tsəutanyi tsa cha tuku nja tsəya nyi.
17 <<Kala ndə nda tə ngəl ada nyi ndara ama nyi tuku nja tsəya nyi.
18 <<Ma nji tə zəa, ngə vanya ndə tə dəgə vanyi ndə na hangu ndara ana chi ya a da cha tə wa, kəlnda tə pinda nyi, 19 ma ndə nda tə ɗa wahyang kwa nau ma'i na zəwa, ndə nda dəgə nyi nda kwa mbəɗa, kəlnda cho ki səu aka cha səwandə nyi bəji, ətsəu cha shilkəbiya nyi cha mbə kwalanghəu.
20 <<Ma vanyi ndə tə dəgə mava nyi ndara kwatəra nyi na zəwa, ya ngə mava nda ndara kwatəra nda tə tah ku cha cha, tuku nja nə nyi ɓwaɓwatəu, 21 kəlnda ma mava nda tə mbəa ahir hanyi zhang ndara mətləu, a da njo nə nyi ɓwaɓwatə manda sər cha cha nda mava nda wa.
22 <<Ma nji mətlə kwa pa ngə nda dəgəya mala huɗə ga səyandə huɗə da cha, ya a mala nda da takasə gagaɗə wa, ndə nda takasiya mala nda kwa kinda dəhə sənda sal mala nda tə tlanda ma tə ɗa tsa'atsa'a na sənda njir nəuma tə ɓatliya. 23 Kəlnda ma takasə nda tə ɗa gagaɗa, hya həbiya pi təvira pi, 24 li təvira li, hir təvira hir, chi təvira chi, hi təvira hi, 25 kəti hu'u təvira kəti hu'u, kəti təvira kəti, kəti dəgə təvira kəti dəga.
26 <<Ma ndə tə dəgə mava nyi ndara kwatəra nyi ku lya cha ga səwandi, tuku cha ngyar mava nda ndara kwatəra nda cha təra təvira lya cha nda. 27 Ətsəu macha badləbiya hira mava nyi ndara kwatəra nyi, tuku cha ngyar mava nda ndara kwatəra nda cha təra təvira hira cha nda.
28 <<Ma gyal tla tə dzaviya sal ndara mala ya ngə cha tah, nja vakənda gyal tla nda hangu cha tah, ya ngwa nja ɗə kumkumnyi wa. Kəl ja, a nji do fəkə nyi bikə nə tlakər tla nda wa. 29 Ətsəu macha gyal tla nda tsəltə na dzavə nji ya nar nyi tə nji nə tlakə nyi ya a da cha mbiya nyi wa, ya ngə tla nda tə tsəya ndəu, njo vəvakənda gyal tla nda ba'a tlakə nyi, ana hangu nda kuɗa. 30 Ma nja gwa'a cha kinda tsəu, cho nau pəliya pya cha təwa kinda dəhə sənda nja na cha kinda. 31 Əngə tsəu, ma gyal tla tə tsəya zərsal ndara kwamalakəu, nəuma kənda sə zhang. 32 Ma gyal tla tə dzaviya mava ndara kwatəra, tlakər gyal tla nda kwa kinda azurfa makərkumnyi nə tlakər mava nda, ya tuku njo vəvakənda gyal tla nda na hangu.
33 <<Ma vanyi ndə tə labiya ka'u ga ngyar shikəti, ya ngə gyal tla ndara kwara tə təɗə gu ka'u nda, 34 tuku tlakər ka'u nda cha kinda tlakər sərshishi nda, kəl ja sərshishi tətə nda kwa ɗa ka nənyi.
35 <<Ma tla vanya ndə tə takasiya nə vanya ndə ya nga tah, Nda ɗəlnda nda na pi nda, nda təkəya kwaba dəhə ka tətənyi nda məlmələu. 36 Kəlnda macha ɗəɗəm a zəndə tə nji tla nda na dzavə alenyi, ya ngə a tlakə nyi da mbiya wa, tlakə nyi kwa kinda, sərshishi təvira sərshishi, ya tətənyi nda tsə'u kwa ɗa nənyi.