Gadlagadla Təkəra Ki Səu
22
1 <<Ma ndə tə həltə gyal tla ndara kətəng ga tsəya ndara cha ɗəlnda, tuku cho kinda na tla təfu atəvira tla zhang ana kətəng fwaɗə atəvira kətəng zhang.2 Ma nja səya ndər həl cho həl ga dəgə nyi ngə cha tah, a da njo fə bikər pənda mashi təkəra madawa wa, 3 kəl ja macha ahir pəchi zədə ti, bikər pənda mashi tsa ndə nda dəgə nyi nda. <<Tuku ndər həl nda ɓəlandə sənda cha həltə nda, kəl ja macha sə da tsa cha wa, tuku nja ɗəlnda nyi nja kinda sənda cha həltə nda ni.
4 Ma nja uya sərshishi həlhəl nda na pi tsa cha ndara tla ndara kwara ndara kətəng tuku cha kinda zhaka mətləu.
5 <<Ma ndə kwa ɓəla sərshishi nyi tə babal fa, ndara fa anap ngə cha ngyar sərshishi nyi tə gu fa vanya ndəu, tuku cha gwa'arə sə zwazwa nda ndiya ɗa mənakə ku fa nyi, cha ɓəlandə nyi nə tlakər fa nda sərshishi nyi tə səwandə nda.
6 <<Ma vanyi ndə tə ngi fa nyi ngə a gwa ku fa vanyi ndə ga nginda uhi nda nja ɓutə ndara nda tə ta'i, ndara fa nda, tuku ndər hakə hu'u nda ɓəlandə dəhə sə nda nja tlanda nyi.
7 <<Ma ndə tə nənyi azurfa nyi ndara kar nyi nə təwul nyi cha fiya nyi, ya ngə nja həltə ku ki təwul nyi nda, ma nja səya ndər həlti, tuku cha kinda zhaka mətləu. 8 Kəl ja ma'a ɗa a da nja uya ndər həl nda wa, tuku nja yi na tlakər ki nda nja həl kwa nda huɗə Hyel ndara cha cha ku həl nyi nda nja həl nyi nda. 9 Kala kəpal nda tə gwa ku pama nji təkəra tla, kwara, kətəng daura ndara kala vanya sə nda tə sa, kəl nda shili mar njir nəuma kya'a nda, ndə nda njir nəuma tə səya na bikəu, tuku cha kinda zhaka mətlə nə təwul nyi.
10 <<Ma ndə tə nə nyi kwara, tla, kətəng ndara kala sərshishi nə təwul nyi ka cha gəziya nyi, ya ngə a tah ndara tə takasa ndara nja həlti, 11 nja ɓatliya pama nda təwa səmfəla mar Tlakəu, ənda cha təwul nyi nda da ku sar sər vanya ndə nda wa. Tlakər sənda cha dləukəri, ya a da njo gwa'a cha ɓəlandə wa. 12 Kəl ja macha həltə nja həltə sərshishi nda tsa təwul nyi nda, tuku cha ɓəlandə nyi sər tlakə nyi. 13 Macha kum takə ngə tə səya ga kutlanda tsəu, cho shili na həyadzənyi nda ka matauli ya a da njo gwa'a cha ki wa.
14 <<Ma vanya ndə tə həya saru na sərshishi tsa təwul nyi ya ngə a takasa ndara tə tah, ku bəji nda a tlakə nyi da tangnda wa, tuku cha ɓəlandi. 15 Kəl ja macha tlakər sərshishi nda tangnda a ndər həsaru nda da kwa ki wa. Macha təkəra kwaba cha həa, kwaba nda nda ɓatliya nda nji tə ka kinda asar nda.
Gadlagadla nə Ngyar nji
16 <<Ma ndə tə shandənyi kər nə kwapəlyakə nda pa'a nja mbandər ni, ga piya nacha, tuku cha kinda gəna gadla cha ɗa ka mala nyi. 17 Ma ada nya kwa nda tə ngyar nə nyi nə sal nda, tuku sal nda kinda gəna gadlə nə kwapəlyakəkur kwa nda.
18 <<Ngwa nja ngyar mala nda kwa bushin na pi wa.
19 <<Kala ndə nda piya na sərshishi tuku nja tsəya nyi.
20 <<Kala ndə nda tə hatəmachi nə vanya sənda njo həsəli nə nyi matsa Tlakəu, tuku nja tsəya nyi.
21 <<Ngwa ka da ɗali na mihiɓi ndara hya ɗiya nyi wa, aka haaɗa mihiɓi hi vu Masar.
22 <<Ngwa ka da ɗali na malafi ndara zər mahə wa. 23 Ma hya ɗali na nda ya ngə nda tiwi na'a, vəlvəl yo ngatə tiwi kənda. 24 Huɗətla ɗa kwa ɗa 'ual təkəra hi, ya yo kuɗənda hi na katsakər, mahi'i kəhi kwa ɗa mahi'ifi ya ngulisha'a kəhi kwa ɗa ka nguli maha.
25 <<Ma ka nənyi məl kwaba nə vanya ndə ɗaliɗali ku pama hi, ngwa ka da ɗa wi ndər tlənda məl nda kwa gwa'a zhar wa. 26 Ma ka dləutsə sərtul təwul ngha nda cha nə nghə ka dangul, ka ɓəlandə nyi təvi pəchi kwa təɗa, 27 aka sərtul nyi nda ngə huɗəkər sə nda cho mbu dza cha ni. Mi sə nda cho piya kwa səka? Ma cha tiwi na'a, yo ngati, aka ndər təhuɗə ya.
28 <<Ngwa hya da pəa ɓwanya həyatəvi nə Hyel ndara hya ngəl gavərma nə nji wa.
29 <<Ngwa hya da shivi na lə ga'a kəhi nə uhi, ɓitir anap ana mal zaitun wa.
<<Hya na'a zərsal nda hya yah tangərma. 30 Hya mər əngə na tla kəhi ana kətəng kəhi. Hya ngya nda nda ngya ka aman nda hanyi məɗəfa, kəl ja, hya na'a nda pəshir hanyi chisəkunyi.
31 <<Hya ɗa ka nji karti ɗa. Aka ənga, ngwa hya da ɗə kumur sərshishi nda kumtakə tə ndalkər wulya wa, vakətə nyi ma nə həya.