Tsaubar Ənda njo Kina Ngya
23
1 <<Ngwa hya da ma'i na gəzhi wa. Ngwa hya da vala ndə kəmangər hya ɗa ka matauli nə gəzhi wa.2 <<Ngwa hya da mər sə kəla ɗa aka dlama nji kwa mər wa. Ngwa hya da tla gəzhi a mar njir nəuma aka ga hya pinda nyi ɗəfwa dlama nji, hya gwa'atə nja tyati tsa jiri wa. 3 Ngwa hya da cha tazhira nə ndər ɗali atə mbwar nəuma wa.
4 <<Maka la'a tla ndara sang nə ndər dawa nghə sasanyi, kəl ka shili na nyi. 5 Maka la'a sang ndər dawa nghə tə dla na kar tədəɓəu, ngwa ka da ngya nyi tangnda wa, kəl ka vala nyi ka hya'andə nyi.
6 <<Ngwa hya da ngyar char nyi jiri nə ndər ɗali tə mbwar nəuma wa. 7 Ɗa ma naɗə tsa tladzənyi gəzhi nə ndəu, ngwa hya da tsa ndə kəla bikə ndara ndər jiri wa, aka a da yo ngyar tlanda nyi nəuma ndə ɗimi wa. 8 Ngwa hya dləu vagula wa, aka vagula kwa wulfənda nji inda kwa la'a səu, ya nda kwa shabiya ɓwanya njir jirikur.
9 <<Ngwa hya da ba ɗali na mihiɓi wa, zəndə tə hi sə nda mihiɓikur təkəri, aka ɗaka tə hi mər mihiɓikur vu Masar.
Gadlagadla Pəchir Ngyaməngya
10 <<Fa kwa hya kwa zwa fa kəhi hya kwa mərəya, 11 kəl ja fa məɗəfəkunyi hya ngyar cha fa hu'i ngwa hya da zwa wa, ga nji ɗaliɗali uya sərsum ti, ya kum takə kwa səm sənda nda ngyari. Hya mər əngə na fa anap ana fa zaitun kəhi.
12 <<Hya mər tlər hanyi kwah, kəl ja hanyi məɗəfəkunyi ngwa hya mər tlər wa, ka ga tla kəhi ka kwara kəhi ɓəliyasar, ana mavi'i inda nja yah ku ki kəhi, ana mihiɓi tsəu, nda ɓəliyasar.
13 <<Hya gəla hya mər dəhə sə nda ya nar hi. Ngwa hya da nga tləmər alenya sə inda njo həsəli nə nda wa, ngwa nja da ngatə ku nya hi wa.
Ladər Ka fa Ka fa Makərəu
14 <<Makər ku fa hyo mər ladər na'a.
15 <<Hya mər ladər gwazhilakə kəla tləlam, hanyi məɗəfa hya səm gwazhilakə nda a tləlam da kwa wa, wi nda ya tsauhi bar. Hya mər ku bəji tsa'atsa'a a tə hya Abib aka ku hya nda ngə hya zəbiya vu Masar.
<<Ngwa kala ndə shili huɗə ɗa na chi jwajwa wa.
16 <<Hya mər ladər nə mərəya sakədar fa ana tangərma yah nə sə zwazwa nda hya tləkanda ku fa kəhi.
<<Ana hya ɓəlatə ladər nə udiya mər fa.
17 Makər ku fa dəhə shili kwa shili huɗə Tlakə Ndər Gyalkur.
18 <<Ngwa hya da lə mashi sər hatəmachi na'a tsa'a na kala sə nda na tləlam kwa wa.
<<A da njo fiya mal sərshishi nda nja hatəmachi nə nda kwa səkətə mbudla wa.
19 Hya shili na yar tangərma nə sə zwazwa nghə nda ndiya na mənakə ku ki Hyel Tlakən hi. <<Ngwa hya da ta zər kua ana 'ua ama nyi wa.
Chama Hyel kwa Ɓatliya Laku
20 <<La'a, yo sətə hi chama, ga cha ɓəla hi cha shili na hi tə mbwa nda ya ɓatliya hi. 21 Hya səhimi da cha hya ngatə sə nda cho na. Ngwa hya tləmwali nə nyi wa, a da cho farbikər tləmwali kəhi wa, manda tləm ɗa ku cha. 22 Ma hya səhimi da sə nda cho dəkə na sənam, yo ɗa ka ndər dawa nə njir dawa kəhi, ya yo mər dawa na nji nda kwa mər dawa na hi. 23 Chama ɗa kwa təra man hi ya cho shili na hi ku hə'i njir Amori, Hitti, Perizzi, Kan'ana, Hivi, ana Jebusi ya yo kuɗənda nda. 24 Ngwa hya da uzhi nə katə kənda ndara hya həsəli nə nda ndara hya nəu sə'inda ndo mər wa. Tuku hya kuɗənda nda hya huɓəya hangu vi həsəli kənda kəcha kəcha'a. 25 Hya həsəli nə Hyel Tlakən hi, ya papa'akur nyi kwa ngya təkəra sərsum kəhi ana ɓiti. Yo hənda shiləkə ku huɗa hi, 26 ya a ndə da kwa səyandə huɗəu ndara cha ɗa mala kəla yah ku hə'i kəhi wa. Yo mərtə pya hi pələkəu.
27 <<Yo fəu ləvər ɗa ku ta nji təvi hyo yi, yo gwazhiya kəra kala hə'i nda hyo ɓə kə'iri. Yo mərtə dəhə njir dawa kəhi kwa sha yahi ana hwi. 28 Təvi hyo yi, yo sətə sənda kwa gwa'atə ndo wi kəɓanghəu ga cha gədlənda njir Hivi, Kan'ana ana njir Hitti ku laku kəhi. 29 Kəl ja, a da yo gədlənda nda ku fa zhang wa, aka mələm nda kwa ɗa jwajwa, ya kumtakə kwa ɗa ɗang təkəra hi. 30 Kanyabəra kanyabəra yo gədlənda nda man hi, kəl sakanda hya tsakə ɗa ɗang pəlakər kura nda ba'a fa'atə ki na hə'i nda.
31 <<Yo fiya hi gəl fwatə nya fa'a dəzəu tsa'a nya fa'a njir Filisti, fwatə ku dadiltakə tsə'u gwa tsa'a nya dəl Yifəratus. Yo mərtə hyo kura njir hə'i nda, ya hyo gədlənda nda man hi. 32 Ngwa hya mbandər ka nda ndara sə'inda nda kwa həsəli nə nda wa. 33 Ngwa hya ngyanda nda ngya tə hə'i kəhi wa, ma'a əngə wa ndo gwa'atə hyo mər səpəla'a na'a, aka həsəli nə katə kənda kwa ɗa ka ləbam nə hi.>>