Mbandər Nyabiya tə dza
24
1 Kəl ngə Tlakə tə nar nyi nə Musa, <<Zədə da ya naka ana Haruna, Nadab ana Abihu, ana njirawawa'a Isra'ila məɗəfəkumnyi. Tsəu hi naɗəu hya uzhi hya həsəli na'a, 2 kəl Musa sənyi ngə kwa ɗa ləhə dzər Tlakəu. Ngwa nji da zədə kə'icha wa.>>3 Ma nda Musa səya dəkar nyi dəhə ɓwanya ana gadlagadla Tlakə nə nji, ngə nda wum na kurakə zhang ga na, <<Kala sənda Tlakə tə na eo məra.>> 4 Təma ngə Musa tə tsəfətə kala sənda Tlakə tə nar nyi. Vanya zəkə kaɗə mbudla ngə cha hya'atə ga hərtə dzəgana tə sara mə nda, ga chiya shimbal hangu i kwabəmətlə nda tə ngya ka nyavi Isra'ila kwabəmətləu. 5 Təma ngə cha sə nguli tlakala nə Isra'ila, ngə nda handa ga'a nə təmachi ana nguli daləu ka cha ɗa ka daɓədzə nə mənakəkur ka Tlakəu. 6 Ngə Musa tə hətə makəmanya mashi nda ga pəu go shala, vanya makəmanyi nda tsə'u cha zhizhivəya dzəgana nda ni. 7 Ngə cha hətə Likatkatə nə alkawal nda ga kəratsəntə nyi nə nji inda. Ngə nda ɓəlakənyi, <<Eo mər kala sənda Tlakə tə na; eo nəuwa.>>
8 Ngə Musa tə hətə mashinda, ga zhizhifəkənyi nə nji inda ga na, <<Nənnə ngə mashi nə alkawal nda Tlakə tə mar kahi, tsa'atsa'a na dəhə sə inga ku gadlagadla na.>> 9 Musa ana Haruna, Nadab ana Abihu, ana njirawawa'a məɗəfəkumnyi nə Isra'ila tə gi 10 ga gi la'a Hyel nə Isra'ila. A da kiɗa hya cha kəl janə təmbəl yahiyahya, nda nja mər na safaya kwa mbəl wi ɗihir huɗamələm. 11 A Hyel da tsəkar njirawawa'a Isra'ila wa, madangə a la'atə nda Hyel, ngə nda səm ga sa a mar Hyel.
12 Tlakə tə nar nyi nə Musa, <<Zədə dzə ɗa zədə tə mə na ka ngya tangna, ya yo nə nghə təmbəl fafa i'i, ana gadlagadla ana tsaubar nda ya tsəftə ka ga nja dlədləɓətə nda.>>
13 Kəl ngə Musa ana Joshua ndər vala nyi tə ɓatliya, ngə Musa tə təra gyo mə Hyel. 14 Cha nar nyi nə njirawawa'a inda, <<Səkətə ea ma tangnə kəl ea shili. Haruna ana Hur kwa ngya tang ngə kə'i hi, kala ndə nda gwa ku kəpal na kuvanyi cha yi da nda.>>
15 Nda Musa tə təra gyo mə nda, kəl ləmbəkə tə haɗiya mə nda, 16 ya səlir Tlakə tə ngya kyo Mə Sinai nda. Hanyi kwah ləmbəkə tə haɗiya mə nda, ya pəshir hanyi məɗəfəkunyi Tlakə tə nga Musa ku ləmbəkə nda. 17 Nda səlir Tlakə tə chabiyadzə kyo mə nda, ma njir Isra'ila kwa la'a wi hu'u gəɗəgəɗə nda kwa gəɗa. 18 Kəl Musa tə təra gwa ku ləmbəkə nda nda cho lakur gi. Cha ngya kyo mə nda hanyi fwaɗəkumnyi ɓupəchi fwaɗəkumnyi.