Ga'a ka Madləɓa Həsəli
25
1 Tlakə tə nar nyi nə Musa, 2 <<Nar nyi nə njir Isra'ila nda shili na ɗa ga'a. Ka dləutsə ɗa ga'a ngə tsa kala ndə nda ɗufwa cha tə char nyi cha na'a. 3 Janə ga'a nda ko dləutsə tsa nda, bəjingha, azurfa ana ndzəa, 4 ana pa'ua nda wi dzargina, lipəlalipəla ana dəzə nyi, ana linən gumaguma ana shishi kua, 5 ana chi kətəng nda nja pugu dəzəu ana chi mənakəu i'i ana wur hyachi, 6 ana mal zaitun ka təkəsəu, ana kar yaji ka mal dzəvə səu ana sə shi'uni kwitəkwitəu, 7 ana hangu onis ana alenya hangu nda na səli ka ga nja ndaɓəndzə dza efod ana hipə hatləu nə efod.8 <<Kəl nda ɓatlətə ɗa madləɓa həsəli, ya naya tsə'u yo ngya ku pama nda. 9 Hya ɓatlətə madləɓa həsəli nga ana dəhə sə inda kwa wi nda yo char ngha.>>
Gwarara Mbandəra
10 <<Nda ɓatlətə gwarara na wur hyachi, pələkəkura cha hi makər na manyi, dlaɓəkura cha hi mətlə na manyi, dzəgamkura cha hi mətlə na manyi 11 Ka yahitə dza, ta cha ana ya cha, ana bəjingha tsa'amunyi, ka təbiya nya cha ana bəjingha. 12 Ka mərtə tsəshiu fwaɗə ka hatə tə hya cha fwaɗə inda, tsəshiu mətlə mətlə kala bangətiti. 13 Kəl ba'a ka ɓatlətə zəwa mətlə na wur hyachi ka ɓəsəndzə nda bəjingha. 14 Tsəwu zəwa inda gu tsəshiu inda ga nja uya nja hətə ti. 15 Zəwa inda kwa ngya ku tsəshiu gwarara nda, ngwa nja da həbiya wa. 16 Kəl ba'a ka fəu tsəftsəfər gadlagadla nda yo nə ngha.
17 <<Ka mərtə sər haɗə nya cha nda nacha ngə mbwar hənda səpəla'a nji ana bəjingha tsa'amunyi, dzəgamkura cha hi makər na manyi dlaɓukura cha tsə'u hi mətlə na manyi. 18 Ka ɓatlətə cherubim mətlə na bəjingha zhang təwa chisəma gwarara nda zhang təwa matsal. 19 Ka ɓatlətə cherubim zhang ki təwa kəra gwarara nda zhang ki təwa ndəla cha nja ɓatlətə daɓədaɓə nyi na sər haɗə nya cha. 20 Babəka cherubim inda kwa ɗa wunwunə nyi kwa fəkə nyi shanguɗa nə sər haɗə nya gwarara nda. Cha ɗa cherubim inda kwa ndzam dzəa təwa sər haɗə nya cha nda. 21 Ka pəu Təmbəl Mbandər nda yo nə nghə ku gwarara nda ka fərnya sər haɗə nya cha. 22 Tangnda, kya təkəra sər haɗə nya gwarara nda, ku pama cherubim inda təkəra Gwarara Mbandər nda, yo ɓə na ka yo nə nghə dəhə gadlagadla aka njir Isra'ila.
Gwarara
23 <<Ka ɓatlətə teɓər na wur hyachi, pələkəkura cha hi makərəu, dlaɓəkura cha hi zhang na manyi, dzəgamkura cha tsə'u hi mətlə na manyi. 24 Ka haɗiya na bəjingha tsa'amunyi ka təbiya sər haɗə nya cha na bəjingha. 25 Ka mərtə udzəm teɓər nda wi dlaɓəkura huɗəchi, ka nəunda nya cha na bəjingha. 26 Ka ɓatlətə tsəshiu fwaɗə ka teɓər nda ka fiya ku kala məngum fwaɗə nə teɓər nda, a dzər hi fwaɗə inda. 27 Tsəshiu inda kwa ɗa ləhə dzər udzəm teɓər nda ga cha gəzəya zəwa nda nja kwa hə gwarara nda ti. 28 Ka ɓatlətə zəwa na wur hyachi, ka ɓəsəndzə nda bəjingha ka ga hya hə gwarara nda ni. 29 Ka ɓatlətə halba ana kətasə i'i ana bəjingha tsa'amunyi, ana pəla hatəmachi. 30 Kala bəji ko fəu gwazhilakə nda nja dzəviya a tə teɓər a biyama ɗa.
Chaka'i Təkəsəu
31 <<Ka ɓatlətə chaka'i təkəsə nə bəjingha tsa'amunyi, ana sər ta'i nyi ana kwaɓash nyi ana ɗeɗika nyi wi mambəl almon ana hima mambəl nyi ana mədla'a nyi tə mbwar zhang. 32 Chaka'i təkəsə nga kwa ɗa na cha cha kwah, kwa tərabiya shi, makər bangətiti, makər bangətiti. 33 Ɗeɗika makər nda pabiya mambəl almon, ana hima mambəl nyi ana mədla'a nyi kwa ɗa tə kala cha chaka'i təkəsə nda tə təra shi nda. 34 A tə chaka'i təkəsə nda tsəu, cha ɗa na ɗeɗika fwaɗə nda pabiya da mambəl almon ana mədla'a ana hima mambəl nyi. 35 Njo mərtə mədla'a mambəl zhang tə kiɗa kala chi mətlə nə chaka'i təkəsə nda zhaka makərəu. 36 Mədla'a nda, ana chi inda, ana chaka'i təkəsə nda njo ɓatlətə nda na bəjingha tsa'amunyi tə ɗaɓa.
37 <<Ka ɓatlətə təkəsə nyi məɗəfa ka hakəya ga cha mbəl təwa bama cha. 38 Sər chi təkəsəu, ana pili wawa'a ka ɓatlətə nda na bəjingha tsa'amunyi. 39 Ka ɓatlətə chaka'i təkəsə nga ana dəhə kar tlər inga ana bəjingha tsa'amunyi kilo makərkumnyi parnya tufəu. 40 Ka mərtə tsa'atsa'a na sənda nja char nghə kyo mə nda.