Madləɓa Həsəli
26
1 Ngə Tlakə tə na, <<Ka ɓatlətə madləɓa na miɗi kuma nda nja mər na linən ləmələmə mənakəu ya dza cha dzargina dzargina, lipəlalipəla, ana dəzəu, nja uya ndə tlalwa cha ɓatlətə səlirma cherubim tə miɗi nda. 2 Dəhə miɗi dzəgamkura cha cha ɗa hi fwaɗəkumnyi parnya mətləu, dlaɓəkura cha hi kwah. 3 Ka daɓətə miɗi tufəu tə mbwar zhang, əngə ma həyadzər təfəu inda. 4 Ka ɓatlətə sər hakə na pa'ua nda dza cha dzargina dzargina a nya chira cha nda ka daɓətə nda, əngə ma'a vanyi nda tsəu. 5 Ka ɓatlətə sər hakə tufəkumnyi tə kala miɗi inda nja daɓətə nda, sər hakə inda tsə'u kwa ndzamdzəa. 6 Kəl ba'a ka ɓatlətə sə'i mba nyi tufəkumnyi nə bəjingha, ka daɓətə miɗi inda ni, ga Madləɓa nda ɗa daɓədaɓənyi.7 <<Ka ɓatlətə miɗi kwabəzhang na shishi kua nda ɗa ka sər haɗə nya madləɓa nda. 8 Dəhə miɗi kwabəzhang inda nda ɗa sə zhang, dzəgamkura cha hi fwaɗəkumnyi, dlaɓəkura cha hi kwah. 9 Ka daɓətə miɗi tufə nda ɗa ka miɗi zhang, ka ngumtə alenya miɗi kwah inda mətləu ga nda ɗa biyamar madləɓa nda. 10 Ka ɓatlətə sər hakə tufəkumnyi nya chira cha bangətiti ana vanyi nya chira cha nda. 11 Kəl ba'a ka ɓatlətə sər hakə tufəkumnyi nə ndzəa, ka fəu zhang ku kala sər hakə inda ga nda mbatə madləɓa nda a ɗa daɓədaɓənyi. 12 Həyadzər miɗi nə madləɓa nda, mar miɗi nda tə həyadzə nda ka hakəya biyahir madləɓa nda. 13 Hi zhang na manyi nə kala miɗi ko ngyar zurup səya hu'i kwa sə shalizha, ga cha haɗiya madləɓa nda. 14 Ka ɓatlətə sər haɗə nya madləɓa nda na chi kətəng nda nja pugu dəzəu, ka ɓatlətə sər haɗə nya cha nda biyabibiya ana chi tata.
15 <<Ka ɓatlətə udzəm nya madləɓa inda njo chiu ku hə'i na wur hyachi. 16 Kala udzəm, dzəgamkura cha cha ɗa hi kwabətufəu, dlaɓəkura cha hi mətlə na manyi, 17 ana cha cha mətləu. Əngə ko ɓatlətə dəhə udzəm nyavi madləɓa nda. 18 Ka ɓatlətə udzəm nyavi mətləkumnyi ka nyavi inda təwa holma. 19 Ka ɓatlətə sənda udzəm nyavi inda kwa ta'i tə fwaɗəkumnyi ana azurfa, ka fiya zhang tə kiɗa kala udzəm nyavi inda. 20 Ka ɓatlətə udzəm nyavi mətləkumnyi ka nya madləɓa nda təwa vwa, 21 ana sə inda nda kwa ta'i tə fwaɗəkumnyi, mətlə tə kiɗa kala udzəm. 22 Ka ɓatlətə udzəm kwah ka dagərya madləɓa nda təwa zədərpəchi, 23 ana udzəm mətlə ka məngum nə madləɓa nda biyatiya cha. 24 Aku məngum mətlə ina, cha ɗa udzəm mətlə təkətəkənyi kyo ndəl, kəl ja, daɓədaɓənyi kyo kəra cha ku tangərmar tsəshiu nda. 25 Cho ɗa udzəm chisəu ana sə inda ndəla nda kwa ngya tə nə azurfa kwabəkwah, mətlə tə kiɗa kala udzəm.
26 <<Ətsəu ka ɓatlətə mədlakə nə wur hyachi tufəu ka udzəm nyavi nə madləɓa barazhang. 27 Tufəu tsə'u barazhang, ana tufə aka udzəm nyavi inda biyahir madləɓa nda təwa təɗərpəchi. 28 Mədlakə nda tə ghada kwa ɗa fwatə nya chira cha tsa'a biyatə udiya nyi. 29 Ka yahitə dza udzəm nyavi inda na bəjingha, ka mərtə tsəshiu i'i na bəjingha ga nda gəziya mədlakə inda. Ətsəu ka yahitə dza mədlakə inda na bəjingha.
30 <<Ka kukuya madləɓa ngə wi sə nda nja char nghə kyo mə nda.
31 Ka ɓatlətə miɗi ana dza cha dzargina dzargina, lipəlalipəla ana dəzəu nda nja mər na linen ləmələmə mənakəu, ana səlirma cherubim tə nda ndə tlalwa tə ɓatla. 32 Ka hakəya miɗi tə shimbal fwaɗənə wur hyachi inda nja yahitə dza cha na bəjingha inda tə sər ta'i fwaɗə nə azurfa nda. 33 Ka hakəya miɗi nda tə sər mba nyavi madləɓa nda, ka shili na Gwarara Mbandər nda ka fiya biyahir miɗi nda. Miɗi nda kwa təkəbiya pama Mbwa Karti ana Mbwa nda Ndiya na Karti. 34 Ka fiya sər haɗə nya cha nda sər hənda səpəla'a a tə Gwarara Mbandər nda ku Mbwa nda Ndiya na Karti. 35 Ka fiya teɓər biyahir miɗi nda təwa vwa nə madləɓa nda ana ka fiya chaka'i təkəsə tə bama cha təwa holma.
36 <<Lakur gwa ku madləɓa nda tsəu, ka ɓatlətə miɗi nda na dza cha dzargina dzargina, lipəlalipəla ana dəzəu nda nja ləm na pa'ua linən mənakəu, nda na ɓatlə nda ndə tlalwa tə tsa na chi ti. 37 Ka ɓatlətə shimbal na wur hyachi tufəu, ka miɗi nda, ka yahitə dza cha na bəjingha. Ka ɓatlətə sər ta'i tufəu nə ndzəa aka nda.