Dzəgana Hatəmachi
27
1 <<Ka hərtə dzəgana na wur hyachi, dzəgamkura cha hi məɗəfə na manyi, pələkəkura cha ana dlaɓəkura cha cha ɗa məlmələu, hi fwaɗə na manyi fwaɗə na manyi. 2 Ka ɓatlətə tələm tə kala məngum nyi, ga tələm inda ana dzəgana cha ɗa zhang, ka yahitə dza cha na ndzəa. 3 Ka ɓatlətə kar nda njo mər tlər nə tə dzəgana nda ana ndzəa, təm ka tsəkə pətsəɗəu, choɓur i'i ana shala wawa'a, ana sər chaku kum ana sər fa'a hahir. 4 Ka tsatə hiɗi nə ndzəa, ana tsəshiu ndzəa aku kala məngum fwaɗə nə dzəgana nda. 5 Ka fiya hiɗi nda a da siyamar kəra dzəgana nda, ga cha ɗa tə ghadar dzəgana nda. 6 Ka ɓatlətə zəwa na wur hyachi ka ɓəsəndzə nyi ndzəa. 7 Zəwa inda njo tsə'u gu tsəshiu inda nda kwa ɗa barazhang ma njo ha.Ɓəlkər Babal Madləɓa
9 <<Ɓatlətə babal ka madləɓa həsəli. Pələkəkura cha təwa holma cha ɗa hi məɗəfəkumnyi parnya tufəu ana miɗi nda nja tsa na pa'ua linən mənakəu, 10 ana shimbal ndzə mətləkumnyi ana mbwar ta'i shimbal nə ndzə mətləkumnyi ana sər hakə miɗi i'i nə azurfa nda nja mbandzə nyi nə shimbal inda. 11 Pələkəkura babal nda təwa vwa tsə'u cha ɗa hi məɗəfəkumnyi parnya tufəu ya ana miɗi i'i, ana shimbal mətləkumnyi ana mbwar ta'i nə ndzə mətləkumnyi ana sər hakə miɗi nə azurfa nda nja mbandzə nyi nə shimbal inda.
12 <<Dlaɓəkura ɓəlkər babal nda təwa təɗərpəchi cha ɗa hi məɗəfəkumnyi parnya tufəu, ana shimbal kuma ana sər ta'i kənda kuma. 13 Dlaɓəkura ɓəlkər babal nda təwa zədərpəchi cha ɗa hi məɗəfəkumnyi parnya tufəu. 14 Pələkəkura miɗi təwa barazhang nə lakur gwa cha ɗa hi mətləkumnyi parnya mətlə na manyi, njo hakəya a tə shimbal makər ana sər ta'i kənda makərəu, 15 təwa barazhang nə lakur gwa nda tsə'u miɗi nyi cha ɗa hi mətləkumnyi parnya mətlə na manyi, njo hakəya tə shimbal makər ana sər ta'i nyi makərəu.
16 Aku lakur gwa tə babal nda tsəu, nja gwa'ar miɗi nda dzəgamkuracha hi makərkumnyi, nda nja tsatə na pa'ua dəzəu ana nda dzargina dzargina ana lipəlalipəla, nda nja ɓatlətə ɓatlə tə ana chi, nja hakəya tə shimbal fwaɗə ana sər ta'i kənda fwaɗəu 17 Dəhə shimbal inda tə ɓandə babal madləɓa nda njo ɓatlətə nda sər mba nda nə azurfa. Sər hakə kənda tsə'u nə azurfa ana sər ta'i kənda nə ndzəa. 18 Pələkəkura ɓəlkər babal nda cha ɗa hi gharəu na tufəkumnyi, dlaɓəkura cha, hi məɗəfəkumnyi parnya tufəu, dzəgamkura cha tsə'u hi məɗəfə na manyi, njo ɓandə babal na linən mənakəu ana sər ta'i nə ndzəa. 19 Dəhə alenya sə'inda njo mər tlər nə ku madləɓa nda, mada mi tlər kənda, dəhə ka məkukwa hya madləɓa nda, ana dəhə məkukwa hya ɓəlkər babal madləɓa nda, cha ɗa nə ndzəa.
Ənda njo Tsamartə Təkəsəu
20 Ka nar nyi nə njir Isra'ila nda shili na mal zaitun nda tsa'amunyi ka təkəsəu, ga təkəsə gəɗə wa'atanyi. 21 Njo fiya təkəsəu ku Madləɓa Tsəmdza a biyamar Gwarara nda, Haruna kə'i nguli nyi kwa tsamartə təkəsə inda, ga təkəsə inda gəɗə mar Tlakəu fwatə ba akəu ba'a mbudla, nənnə kwa ɗa ka gadlagadla nə njir Isra'ila tsa'a tə batəbatər nyandəla nda.