Lukutə Fərist
28
1 Ka nga Haruna zamə ngha, tsa'a na nguli nyi Nadab ana Abihu, Eliyazar ana Itamar, zəbiya ku huɗa njir Isra'ila ka ga nda mər tlər fərist na'a. 2 Ka mbətə nyi daura nda karti nə zamə nghə Haruna, ga cha nənyi dəgalkur ana səli. 3 Nar nyi nə dəhə nji tlalwa inda ya nə nda dəma ku mər chul sə'inga, ənda nda mbətə nyi daura nə Haruna, aka ga nja dzəviya nyi ka cha mər tlər na'a. 4 Janə chul daura nda njo mbəti, sər mbu hatləu, efod, sə'i, ləkutə tsatsa, pahuɗə mba kər ana sər mba dza. Ndo mbətə nyi ləkutə karti nə zamə nghə Haruna ana nguli nyi ga nda ɗa ka fərist i'i njir mər tlər na'a. 5 Nda mər tlər na bəjingha, ana pa'ua nda dzargina dzargina, lipəlalipəla ana dəzəu, ana pa'ua linən mənakə nyi.Efod
6 <<Hya uya nji tlalwa nda ɓatlətə efod nə bəjingha ana pa'ua dzargina dargina, lipəlalipəla ana dəzəu ana linən ləmələmə mənakəu. 7 Njo mərtə badlabadla cha mətləu, nja daɓtə ku məngum nyi ga nja nau mbati. 8 Njo mərtə nyi sər mbadzə na chul sə'inda nja ɓatlə ləkutə nda ni, pa'ua dzargin dzargina, lipəlalipəla ana dəzəu, ana linən ləmələmə mənakəu, nja mərtə nyi tlalwa gagaɗa.
9 <<Nja uya hangu onis mətləu, nja tsəfətə tləmər nguli Isra'ila ti, 10 tləm kwah a tə kala hangu onis nda, ka dəgal ka dəgal wi nda nja yah nda. 11 Njo tsəfiya tləmər nguli Isra'ila a tə hangu onis mətlə inda wi nda ndər dzəɗə hangu kwa tsəf hatimi. Njo daɓəu hangu inda ku shimbal nə bəjingha 12 kəl ba'a nja mbatə tə badlabadla efod aka hangu ɗənghatə na nguli Isra'ila. Haruna hakəya tləm inda tə badlabadla cha aka sər ɗənghatə mar Tlakəu. 13 Nja mərtə sər ɓatlə nə bəjingha 14 ana dzəra lyang ləmələma nə bəjingha tsa'amunyi, wi sə'i, kəl ba'a nja mbandzə nyi nə sər batlə nda.
Hipə Hatləu
15 <<Hya nar nyi nə nji tlalwa nda ɓatlətə hipə hatlə aka wum jau tsa Tlakəu. Tuku nja mərtə nyi na sənda nja ɓatlə efod nda ni, bəjingha, pa'ua dzargina dzargina, lipəlalipəla ana dəzəu, ana linən ləmələmə mənakəu. 16 Cha ɗa məlmələu, ya njo dlətə zhaka mətləu ga cha ɗa dzəgamkur nyi ana dlaɓəkurnyi sə zhang. 17 Ndə tlalwa bərdləya hangu inda na səli fwaɗə ti. Tangərmar zotamin nda cha ɗa karneliyan, ana tofaz, ana zumurudu. 18 Mətləkunya zotamin nda nja fəu turkos, ana safaya, ana daimon. 19 Makərkunya zotamin nda, nja fəu, jasinta, ana agate, ana ametis. 20 Fwaɗəkunya zotamin nda nja fəu, beril, ana onis, ana jaspa njo fəu nda ku sər ɓatlə nə bəjingha. 21 A tə hangu kwabəmətlə inda njo tsəftə nguli Isra'ila wi nda tə nyandəla nda kwabəmətləu. Njo tsəftə tləm inda wi hatimi.
22 <Hya ɓatlətə hipə hatlə tsə'u na dzəra lyang ləmələmə nə bəjingha tsa'amunyi wi sə'i. 23 Hya ɓatlətə tsəshiu mətlə nə bəjingha hya mbiya ku məngum mətlə nə hipə hatlə nda. 24 Hya nbatə dzəra lyang nə bəjingha nda tə tsəshiu inda ku məngum nə hipə hatlə nda, 25 vanyi dzəra lyang nda tsə'u nja mbatə tə sər ɓatlə nə bəjingha nda, nja mbatə tə badlabadla efod ana a biyama. 26 Hya ɓatlətə tsəshiu mətlə nə bəjingha hya mbiya ku alenya məngum mətlə nə hipə hatlə nda kwakwa. 27 Hya ɓatlətə alenya tsəshiu nə bəjingha hya mbiya tə kiɗa badlabadla efod nda ana a biyama, ləhə dzər gyarakən. 28 Tsəshiu nə hipə hatlə nda, nja mbandzə nyi nə tsəshiu nə efod nda, ana sə'i dzargina dzargina, nja daɓətənyi na sər mbadzə nda, tsa'aka hipə hatlə nda do biya ku efod nda wa.
29 <Təwa ənga kala bəji nda Haruna tə gwa ku Mbwa Karti, tləmər nguli Isra'ila huɗə Tlakəu wa'atanyi ku hipə hatlə nda, ka ga cha ɗa ka sər ɗənghatə mar Tlakəu. 30 Ətsəu, hya pəu Urim ana Tummin ku hipə hartlə nda cha ɗa ku ɗufwa Haruna bəji nda cho gwa mar Tlakə ti. Təwa ənga Haruna kwa maka gwa na sə inda kwa wendə njir Isra'ila huɗə Tlakəu.
Tsaubar təkəra alenya Ləkutə Fərist
31 <Ka ɓatlətə ləkutə nda njo hakər efod nda təkəri ana pa'ua dzargina dzargina. 32 Njo tlabiya tə ghada ka banda njo ha ti, njo tsatə wulya cha tsa cha da ta. 33 A nyachira ləkutə nda ka ɓatlətə sə wi yayar Pomegranat ana pa'ua dzargina dzargina, lipəlalipəla ana dəzəu cha ɓandə nya ləkutə nda, ana tatang bəjingha ku pama nda. 34 Njo mbau tatang bəjingha inda ku pama kala sə nda wi yayar Pomegranat nda. 35 Tuku Haruna handzə ma cho mər tləra. Njo ngatə kuraka tatang inda ma cho gwa ku Mbwa Karti nda huɗə Tlakəu, ana ma cho zəbəya, tsa cha da tah.
36 <Hya ɓatlətə təmbəl bəjingha tsa'amunyi, nja tsəfətə tsəf chul nə hatimi tə əna, KARTI A NƏ TLAKƏU. 37 Nja mbatə tə sə'i dzargina dzargina nja mbiya biyama. 38 Haruna kwa fiya ku nyama cha. Təwa ənga macha njir Isra'ila mərtə bikə ku ha təmachi karti, Haruna kwa həti. Wa'atanyi Haruna kwa maka fiya ku nyama cha ga cha ɗa sər dləu nə Tlakəu.
39 <Hya tsatə ləkutə dzəgam na pa'ua linən mənakəu, ana sər mba kər ana gyarakən, nda ndə tlalwa tə məra. 40 Nar nda nda ɓatlətə ləkutə dzəgam ana sər mba sar ana dwara nə nguli shili Haruna, ga cha mərtə nda na səli ana dəgalkur. 41 Ka pəndzə nyi kar ingə nə zəmə nghə Haruna ka nguli nyi. Ka pəu nda mal ku kəra nda ka dzəviya nda ka Fərist.
42 <Ka ɓatlətə nda sə nda ndo handzə da gwa hya'atə ku sara nda səya tə ea nda tsa'aka a njo la'a bama nda wa. 43 Haruna ka nguli nyi kwa handzə ma ndo gwa ku madləɓa tsəmdza ndara ma ndo ɗa ləhə dza dzəgana ka mər tlər ku Mbwa Karti, tsa nda da mər bikə nda kwa gwa'atə ndo tah.
Nənnə kwa ɗa ka gadlagadla nə Haruna ana nyandəla cha ba'anawa.