Gadlagadla nə dzəvə Fərist
29
1 <<Janə sənda hyo mər ga hya dzəviya Haruna ka nguli nyi ka fərist, ka hətə zər daləu ana gam mətlə inda kəla tyakəm inda, 2 ana sərsum kəla tləlam, ana gwazhilakə gwaɗəgwadə nyi na mal zaitun, ana zər gwazhilakə kəla tləlam nda nja pəndzə mal. 3 Ka pəu ku tsəla ka shili nə tsa'a na zər daləu nda ana gam mətlə inda. 4 Kəl ba'a ka shili na Haruna ka nguli nyi ku lakur gwa ku madləɓa tsəmdzə nda, ba'a chinda nda na ɓiti. 5 Ka handzə nyi dzaki inda nə Haruna, ka ghəya na handzə nyi ləkutəu, kəl daura, efod nda na hipə hatlə nda, ka mbabiya nyi sara cha na gyarakən nda nji tlalwa tə tsa nda. 6 Ka mbanda nyi kər na pahuɗə kər ka ndaɓətə təmbəl bəjingha nda karti nda. 7 Ka hətə mal ka pəu nyi ku kəra cha ka dzəviya nyi. 8 Ka shili na nguli shili nyi tsə'u ka handzən ləkutəu 9 ka mbu nda dwara ka mbabiya nda sara nda na gyarakən, təwa əngə ko dzəviya Haruna ka nguli shili nyi. Əngə tlər fərist kwa ngya ka nəkənda ba'anawa.10 <<Ka shili na gyal tla nda mar madləɓa tsəmdza, Haruna ka nguli nyi tsə'u kwa piya cha nda gyal tla nda. 11 Ka tlakər wulya mar Tlakəu ku lakur gwa ku Madləɓa Tsəmdza. 12 Ka gətsə mashi gyal tla nda ka ɓəsətə tə təlma dzəgana nda na kwalinghar cha ka, ba pənda həyadzə nyi nda dza hya dzəgana nda. 13 Ka fa'abiya mal inda tə sərhuɗəu, mal nda tə mbəla, ana hushiu ana mal nda ti, ka nginda tə dzəgana nda. 14 Kəl ja, kumur gyal tla nda ana chi nyi ana halya cha, ko ki nginda biyahir mələm. Hatəmachi ka səpəla'a nga.
15 <<Ka hətə gam nda zhang, Haruna ka nguli nyi kwa piya cha nda tə gam nda. 16 Ka tlakər wulya ka uchiya ku dəhə məngum fwaɗə nə dzəgana nda. 17 Ka tlətliya gam nda shiɗəɗəu. Ka chinda sərhuɗəu ana hya cha, ka daɓətə na kəra cha ana tlətlatlətla nyi nda. 18 Kəl ba'a ka nginda zumkura gam nda tə dzəgana. Hatəmachi təwa nginda nda kwa shiuni kwitəkwitə ngə nə Tlakəu.
19 <<Ka hətə vanya gam nda, kə'i Haruna kə'i nguli shili nyi nda piya cha nda tə kəra gam nda. 20 Ka tlakər wulya ka gətsə mashi nda ba'a ɓəsətə nyi tə hima Haruna ana hima nguli nyi təwa chisəm, ana a tə təl cha nda ana təl hi nə chisəma nda. Kəl ba'a uchiya həyadzər mashi nda dza dzəgana nda. 21 Ka gətsə mashi ngə tə dzəgana nga, ana mal dzəvə səu, ka uchəkənyi nə Haruna ana ləkutə nyi, ana nguli shili nyi ka ləkutə kənda, ka dzəviya nda ana ləkutə kənda na'a.
22 <<Ka fa'abiya mal gam nda, ana mal dangshiu, ana mal nda tə sərhuɗəu, ana mal nda tə mbəla cha, ana husha cha, ana ea cha nə chisəm, aka gam nga nə dzəvə sə nga. 23 Ka hətə takwara gwazhilakə kəla tləlam nda mar Tlakə nda, ana gwazhilakə nda gwaɗəgwaɗənyi na mal zaitun nda, ana zər gwazhilakə kəla tləlam. 24 Pəu dəhə sə'ingə ku cha Haruna ka nguli shili nyi, ka nar nda nda har shi nda velari aka ga'a nə dzəviya nga. 25 Kəl ba'a ka dləutsə ka nginda tsa'a na sər hatəmachi təwa nginda aka ga cha shiuni məsəɗakə nə Tlakəu, nacha ngə hatəmachi təwa nginda nə Tlakəu. 26 Ko hətə hatla gam nda nja tlakər wulya nda ka dzəvə Haruna nda ka har shi mar Tlakəu aka hatəmachi nə velari nda, ngəng nga mbaɗə nghə nga.
27 <<Ka dzəviya hatlə ana ea gam nə dzəvə sə nə Haruna ka nguli nyi nda, nda nja velari ana ea nda nja dzəviya nda. 28 Nacha ngə mbaɗə Haruna ka nguli wa'atanyi hya'atə tsa njir Isra'ila ku dəhə sərshishi nda nda shili nə ka lə ga'a nə daɓəkər nə Tlakəu.
29 <<Lukutə Haruna nda nja dzəviya nda kwa ɗa ka nə nyandəla cha. Ana ləkutə ngə njo pəu nda mal ku kəra nda ba'a dzəviya nda. 30 Zər nyi nda kwa fa'aki fəristkur nyi kwa shili ku Madləɓa Tsəmdza ka mər tlər ku Mbwa Karti, kwa handzə dzaki inda nə hanyi məɗəfa.
31 <<Ka hətə gam dzəvə sə nda ka tagu ku mbwa karti. 32 Haruna ka nguli shili nyi kwa kwasə kum gam nda, ana gwazhilakə nda ku tsəla nda, ku lakur go Madləɓa Tsəmdza. 33 Ndo kwasə sər hatəmachi nə hənda səpəla'a kənda, ku nda nja dzəviya nda ga chinda nda. Ndə do səm wa aka wurtə ɗa karti. 34 Kəl ja, ma kum nə dzəvə sə nda, ndara gwazhilak tə həyadzə ga hanyi, ka nginda na hu'u, ngwa ndə da wuriya səm wa, aka a wurtə ɗa karti.
35 <<Ka mərtə nyi dəhə sə'ingə ya na ngə nə Haruna ka nguli shili nyi, hanyi məɗəfə ko hətə ka dzəvə nda. 36 Kala pəchi ka handa təmachi na gyal tla aka farbikəu. Ka chinda dzəgana ku bəji nda ko hatəmachi nə farbikə ka cha, ka dzəviya na mal zaitun ga ka mərtə nyi karti. 37 Hanyi məɗəfə ko hətə tə mbwar mər mirga nə dzəgana nda ba'a dzəviya. Kəl dzəgana nda kwa ɗa na karti gagaɗa, ya kala sə nda tsəkari kwa ɗa karti.
38 <<Jan sənda ko maka hatəmachi nə tə dzəgana ngə kala pəchi: nguli gam fa zhang tsa'a mətləu. 39 Ka lətə zhang mbudla ana vanyi nda ba akəu. 40 Tangərmar zər gam nda njo daɓətə na upə alkama zhizhi nyi kilogram zhang zukuzuku nyi na mal zaitun nda nja shishirbiya lita zhang, ana ɓitir anap lita zhang aka sər hatəmachi chulkə nə sa. 41 Njo hatəmachi na vanyi zər gam nda a ba akəu ana alkama ana hatəmachi chulkə nə sa wi nda mbudla nda aka sər hatəmachi sə shi'uni kwitəkwitə nə Tlakə ana hu'u.
42 Wa'atanyi nyandəla nji nda kwa shili, kwa hatəmachi chulkə nə nginda anya lakur gwa ku Madləɓa Tsəmdzə mar Tlakəu. Tangnda yo ɓə ka hi kwa ndər na hi, 43 tangnda tsə'u yo ɓə ka njir Isra'ila, ya səli ɗa kwa mərtə mbwa nda karti.
44 Aka ənga yo dzəviya Madləɓa Tsəmdzəa ana dzəgana, ya yo dzəviya Haruna ana nguli shili nyi ka nda mər tlər fərist na'a. 45 Kəl yo ngya ku pama njir Isra'ila yo ɗa ka Hyel kənda. 46 Ndo zəndə ənda naya ngə Hyel Tlakən nda, nda fa'abiya nda zəbiya vu Masar ka ga ya ngya ku pama nda. Naya ngə Hyel Tlakən nda.>>