DƏLABIYA 30

Tsaubar ka Dzəgana Hatəmachi nə nginda

1 <<Hya ɓatlətə dzəgana na wur hyachi ka ngi sənda kwa shiuni kwitəkwitəu. 2 Pələkəkura cha ana dlaɓəkura cha hi zhang na manyi, kəl nda dzəgamkura cha hi makərəu, njo daɓəya təlma cha ka sə zhang na dzəgana nda. 3 Hya ɓəsəndzə nyi bəjingha tsa'amunyi nə kəra cha ana dəhə dza cha ana təlma cha inda, ana hya təbiya ɓəlkə nyi na bəjingha nda. 4 Hyo mərtə tsəshiu i'i tə ɓəlkə nyi nda, zhang ku kala məngum ga cha gəzəya zəwa nda njo hə ti. 5 Hya ɓatlətə udzəm na wur hyachi hya ɓəsədzə nyi bəjingha. 6 Hya fiya dzəgana ngə biyahir miɗi nda nja hakəya biyamar gwarara mbandər ana sər haɗə nya cha, tangnda yo ndər na ka.

7 <<Tuku Haruna nginda sənda kwa shiuni kwitəkwitə tə dzəgana nda kala mbudla ma cho ɓatlə təkəsə i'i. 8 Tuku cha ɓəla nginda sənda kwa shiuni kwitəkwitə səkəu ma cho gəɗə hu'u təkəsə i'i 9 Ngwa nja ngi kala sənda kwa shiuni kwitəkwitə ndara nja hatəmachi təwa nginda tə dzəgana ngə wa, ya ngwa nja da ha təmachi nə sə uhi uhi ndara nə sə sasa wa. 10 Zhang ku fa Haruna kwa zəba tlal nə mərtə dzəgana nda karti. Ngəna zəba sə cha kwa mər təwa pəndzə nyi mashi nə təlma dzəgana nda ka hənda bikər səpəla'a nji. Ngəna zəba səu Haruna ana nyandəla cha kwa mər wa'atanyi, aka dzəgana ngə ndiya tə na karti nə Tlakəu.

Tsaubar Təkəra Kwaba Mirga

11 Kəl ngə Tlakə tə nar nyi nə Musa. 12 <<Ma hyo jiga njir Isra'ila, kala ndə cha kinda kwaba nə Tlakəu ka mbəɗandə pya cha, ku bəji nda njo jiga nyi ti, ya təmachi da kwa shili təkəra nda ma njo jiga nda wa. 13 Kala ndə nda nja jigabiya kwa kinda kwaba mar shekel wi sənda nja kwa mər tlər nə ku mbwa karti. Kwaba mar shekel nga, ga'a nga a nə Tlakəu. 14 Kala ndə nda fa nyi tə ɗa mətləkumnyi cha nə nyi ga'a nga nə Tlakəu. 15 Ngwa njir gəna da ki sənda ndiya mar shekel wa, ya ngwa njir ɗali ki sənda səya mar nga, ma ndo mər ga'a ngə nə Tlakə ka mbəɗandə pya nda wa. 16 Njirawawa'a kəhi kwa tsəmtə kwaba ka mirga tsa njir Isra'ila ka nja mər tlər nə ku Madləɓa Tsəmdza. Sə ngə kwa ɗa ka sər ɗənghatə nə njir Isra'ila huɗə Tlakəu, aka mbəɗandə pya nda.

Taubar təkəra Shala chi dza

17 Kəl ngə Tlakə tə nar nyi nə Musa, 18 <<Hya ɓatlətə shala ndzəa, ana sər ta'i nyi na ndzəa, aka chi dza. Hya fiya ku pama Madləɓa Tsəmdza ana dzəgana, hya gəu ɓiti kwa. 19 Haruna ka nguli shili nyi kwa chi nda cha nda ka hya nda kwa. 20 Kala sakanda nda kwa gwa ku Madləɓa Tsəmdza ndara ndo ɗa ləhə dza dzəgana ka mər tlər hatəmachi nə sərsum nə Tlakəu, kəl nda waɗa tsa nja da tsəya nda. 21 Nda chinda cha nda ka hya nda tsa nda da tah. Hurana ka nyandəla cha kwa ɓəlatə sə'ingə tsa'a ku zamin nda kwa shili biyama.

Mal Dzəvə Səu

22 Kəl ngə Tlakə tə nar nyi nə Musa, 23 <<Hətə ɓitiɓitir mur nə shekel 500, ana kirshi nda kwa shiuni məsəɗakəu nə shekel 250, ana sənda kwa shiuni kwitəkwitəu nə 250, 24 ana sə nda kwa shiuni kwitəkwitə ana tləm nyi kashiya nə shekel 500 məlməl na kwaba shekel nə mbwa karti, ana shikmal zhang nə mal zaitun. 25 Ana sə inga hyo ɓatlətə mal dzəvə səu nda karti wi nda ndər ɓatlə sənda kwa shiuni kwitəkwitə kwa ɓatla, cho ɗa ka mal dzəvə səu nda karti. 26 Kəl ba'a ka dzəviya Madləɓa Tsəmdza, Gwarara nə Mbandəra, 27 teɓər ana kar nyi, chaka'i ana kar nyi, dzəgana ngi sənda kwa shiuni kwitəkwitəu, 28 dzəgana hatəmachi ana dəhə kar nyi ana shala nda ana sər ta'i nyi. 29 Hya dzəviya nda ga nda ɗa na karti gagaɗa, ya kala sənda tsəka nda kwa ɗa karti.

30 Ka dzəviya Haruna ka nguli shili nyi ga nda ɗa karti ka nda ka nda mər tlər na'a. 31 Ka nar nyi nə njir Isra'ila, <<Nənnə kwa ɗa ka mal dzəvə səu nda karti ka zamin nda kwa shili. 32 Ngwa ka da pəkə nyi nə kala ndə wa, ya ngwa ka da ɓatlə vanya mal wi chul ngə wa. Karti cha ya tuku nja hətənyi karti. 33 Kala ndə nda ɓatlətə mal wi nga ga pəkə nyi nə kala ndə matsa fərist njo təkəbiya nda ka jikə nda.>>>

Sə nda kwa Shiuni Kwitəkwitəu

34 Kəl ngə Tlakə tə nar nyi nə Musa, <<Ka hətə kar yaji nda kwa shiuni məsəɗakəu, sakte, onika, galbanum tsa'a na lubban, nda ɗa məlməl dəhəu, 35 əngə njo ɓatlətə sənda kwa shiuni kwitəkwitə wi nda njir mər nyi kwa ɓatla. Nja fəu wuna, cha ɗa chichi nyi ya karti. 36 Hya gwa'arə kushi kwa hya ha'agwa hya fiya biyamar Gwarara Mbandər nda ku Madləɓa Tsəmdzə nda, tangnda yo ɓə na ka.Tuku cha ɗa karti nə ngha. 37 Ngwa da ɓatlətə sənda kwa shiuni kwitəkwitə wi na, nə kərnghə wa, ka hətənyi ka sə nda karti nə Tlakəu. 38 Kala ndə nda ɓatlətə sənda kwa shiuni kwitəkwitə wi nacha nda, tuku nja təkəbiya nyi ka njikə nda.>>