Bezalel ana Oholiyab
31
1 Kəl Tlakə tə nar nyi nə Musa, 2 <<Ndzama, a tabiya tə ya Bezalel zər Uri, zər Hur ku nyavi Yahuda, 3 ya a nyandə nyi tə ya na Shanguɗə Hyel, dəma, ngabiya, zəndi ana dəhə chulkə tlər chi, 4 ga cha ɓatlətə sə pampam na bəjingha, azurfa ana ndzəa, 5 ana dzəɗə hangu nda na səli, ana fiɗə wua ana kala tlər chi. 6 Ətsəu, a tabiya tə ya Oholiyab zər Ahisamak, nda ku nyavi Dan ka cha vala nyi. A nə nyi tə ya dəma nə dəhə njir tlər chi ka nda ɓatlətə dəhə sənda ya nar ngha, 7 Madləɓa Tsəmdza, Gwarara Mbandəra ana sər haɗə nya cha, ana dəhə sə inda ku madləɓa nda, 8 teɓər ana kar nyi, chaka'i təkəsəu nə bəjingha tsa'amunyi ana kar kənda, dzəgana sə shiuni kwitəkwitəu, 9 dzəgana lə ga'a təwa nginda ana dəhə kar nyi, shala ana sər ta'i nyi, 10 ana ləkutə tsatsa, kya'a na ləkutə karti nə Haruna fərist ana ləkutə nguli shili nyi ma ndo mər tlər fərist 11 ana mal dzəvə səu ana sə inda kwa shiuni aka Mbwa Karti. Nda ɓatlətə wi sə nda ya nar ngha.>>Pəchir Ngyaməngya
12 Kəl ngə Tlakə tə nar nyi nə Musa, 13 <<Nar nyi nə njir Isra'ila, <Tuku hya ɓəlatə Pəchir Ngyaməngya ɗa. Nacha ngə sənda kwa char mbandər ɗa kə'i hi tsa'a tə nyandəla kə nda kwa shili hi, ga hya zəndə ənda naya ngə Tlakəu, nda tə mərtə hi karti.>>>
14 <<<Ɓəlatə ma Pəchir Ngyaməngya, aka karti cha nə hi. Dəhə ndə nda tə dyaɓəndə nja tsəya nyi, madawa tə mər kala tlər tə pəchi nga nja gədləbiya nyi ku pama nji kənda. 15 Nja mər tlər hanyi kwah, kəl ja, hanyi məɗəfkunyi Pəchir Ngyaməngya nə ɓəlsar nga, ya karti nə Tlakəu. Madawa tə mər tlər tə Pəchir Ngyaməngya tuku nja tsəya nyi.>>> 16 Njir Isra'ila ɓəlatə Pəchir Ngyaməngya, hya ɓəlatə na karti ku dəhə ngya kəhi, alkawal nda pa'a kwa wur nga. 17 Cho ɗa ka muniya ku pama ea ka njir Isra'ila ba'anawa, aka aku hanyi kwah Tlakə tə mər dunəya ana huɗamələm pəshir hanyi məɗəfkunyi cha ta'ində tləra ga ɓəliyasar.>>>
18 Manda Tlakə tə wurandə ndər na Musa kyatə Mə Sinai, cha nənyi təmbəl fafa mətləu ana gadlagadla nda Hyel tə tsəfəti na chacha.