Zər Tla nə Bəjingha
32
1 Ma nda nji inda tə səkə Musa tərkus tsa səya kyo mə nda, ngə nda tsəmtə dzə ga ɓandə Haruna ga na, <<Tərashili ka ɓatlə tə ea hyel nda kwa təra man ea. Aka Musa kuvan ea nda tə fa'abiya zəbiya vu Masar, a ea zəndə nda mi tə ɗa na cha wa.>>2 Ngə Haruna tə wum nə nda, <<Səɗəbiya ma sər ha ku himi nə bəjingha ingə ku hima mahi'i kəhi, nguli shili kəhi, ana ku'i kəhi inga.>> 3 Kəl ngə dəhə nji inda tə fa'abiya sər ha ku himi kənda ga shili ni nə Haruna. 4 Ngə cha fa'atə sər ha ku himi inda nja nə nyi nda ga lə'uya ga ɓatlətə katə nda tə pabiya zər tla ni, kəl nda na, <<Nənnə ngə hyel nghə ja Isra'ila, nda tə həbiya nghə vu Masar.>>
5 Nda Haruna tə la'a ənga, ngə cha hərtə dzəgana biyamar zər tla nda ga bəzəya, <<Əzəkəu ladər da nə Tlakəu!>> 6 Aka ənga vanya zəkəu nji tə hya'tə ga handa təmachi nə nginda ana nə lə ga'a. Ahir nga nda ngya ka səma ana sa ga wi, ga hya'atə ga go utsa.
7 Kəl ngə Tlakə tə nar nyi nə Musa, <<Ma'i səya, aka nji nghə inda ka zəbiya nə vu Masar inda səwa ti. 8 Nda sha ta nda kuskus tsa sə inda ya tsaunda bar kwa, ga ɓatlətə nyi katə pabiya zər tla nə kərnənda. A uzhi tə nda nə nyi ga hatəmachi nə nyi ga na, <Nənnə ngə hyel nghə ja Isra'ila, nda tə həbiya nghə zəbiya vu Masar.>
9 Ngə Tlakə tə nar nyi Musa, <<Ya la'a nji ina, dura'a nda. 10 Sakan ja, ngyaɗa tsa'aka huɗatla ɗa səya tə kəra nda, ya zhazhinda nda. Ba ya shandə nyandəla ka ka hə'i dəgal.>>
11 Kəl ja, Musa tə gədi kwambiyakur tsa Hyel Tlakə nyi. Cha na, <<Tlakəu, mya gwa'atə huɗatla ngha kwa səya kəra nji nghə nda ka fa'abiya vu Masar na gyalkur cha ka? 12 Mya gwa'atə njir Masar kwa nda na, <Ana ɗimikur ka fa'abiya nda, ka ka tsəya nda ku kəram i'i ka zhazhinda nda ku dunəya? Ngyari gəna huɗətla, shari jigadəma ngha, ngwa ka da shili na ɓwaɓwatə nə nji nghə wa. 13 Ɗənghatə mava nghə Ibrahim, Ishaku ana Isra'ila, nda ka səmnda fəla nənda na kərngha, ga na, <Yo mərtə nyandəla hi ka nji ɗanghəu wi sasəlga kya huɗamələm, ya yo nə hi dəhə hə'i na nə nyandəla hi, a mərtə ya alkawal, cho ɗa ka sər fa'aki kəhi ba'anawa.> >> 14 Ngə Tlakə tə shar jigadəma nyi ga ngyar shili na ɓwaɓwatə təkəra nda wi nda cha hari cho nda məra.
15 Ngə Musa tə sha ga səya kyo mə nda ana təmbəl fafa mətləu nə matauli Mbandər ku cha cha ana tsəfə tə təwa bama cha ana dagərya cha. 16 Təmbəl fafa inda tlər Tlakə nga, tsəfə nda tə nda tsəfə Hyel nga nda cha tsəfətə tə təmbəl inda.
17 Manda Joshua tə ngatə kurakə njo ləla, ngə cha nar nyi nə Musa, <<Ula kurakər pa kyo ta mələm.>>
18 Ngə Musa tə ɓəlakə nyi:
<<A da kurakər kwas ngə wa,
a da kurakər nja kura nda ngə wa;
kurakər miya ngə yo ngati.>>
19 Manda Musa kaɗə ɗa ləhə dzər nji inda, ngə cha la'a zər tla fətəfəta ana njo utsa, ngə huɗa cha tla 'ual'ualəu, ngə cha vakənda təmbəl nda ku cha nda, nga hubə ga njinjiɗiya dzə tə sara mə nda. 20 Ngə cha hətə tla fətəfətə nda nda ɓatlətə nda ga nginda ku hu'u, ga ha'agwa kəɓətə, ga pəti gwatə ɓiti ga nar nyi nə njir Isra'ila nda sanya.
21 Ngə cha nar nyi Haruna, <<Mi nji na mərtə ngha, nda ka fu nda ku chul səpəla'a dəgala na?>>
22 Ngə Haruna tə wuma, <<Kəma ngwa huɗakə da tla wa, kwa zəndə kə nji inə na chul ɗimikur kənda. 23 Nda nar ɗa, <Ɓatlətə ea hyel inda kwa nəuna ea. Aka nacha Musa nda tə fa'abiya ea zəbiya vu Masar, a da ea zəndə ndara mya ɗa na cha wa.> 24 Aka əna ya nar nda, <Kala ndə nda na sər ha ku himi nə bijingha, cha həbiya.> Ngə nda na'a bijingha, ngə ya pəti gwatə hu'u, ga fətəbiya nəna zər tla ni!>>
25 Ngə Musa tə la'a nji inda kwa tləmwali, aka Haruna da nau gəlati nda wa, ngə nda ɗa ka sər gwa'a gyaɗi nə njir dawa kənda. 26 Ngə Musa tə ta'itanyi tə lakur gwa tə mbwar ngya kənda nda, ga na, <<Dəhə ndə nda nə Tlakə cha shili da ya.>> Kəl dəhə njir Levi tə yi ɓandə nyi.
27 Kəl ngə cha nar nda, <<Janə sənda Tlakəu, Hyel njir Isra'ila tə na, <Kala ndə cha hawulya katsakər nyi, cha biya tə ɓəlkər mbwar ngya na cha ɓəla shili, kala ndə cha tsəya zamə nyi, bazhi nyi ana təwul nyi.> >> 28 Ngə njir Levi inda mər wi nda Musa tə nar nda, pəshinda nji 3,000 tə kuɗa. 29 Kəl ngə Musa tə na, <<A dzəviya hi tə nji nə Tlakə ənya, təwa kuɗənda ma'a ka nguli kəhi ka zamən hi, ya səkə hi tə cha papa'akur ənya.>>
30 Vanya zəkə Musa tə nar nyi nə nji, <<A mər tə hi səpəla'a dəgaləu. Kəl ja, sakana yo gya da Tlakəu, ndara tsə'u ya nau chirnya nyi kəpal cha far bəkə nə hya mər na.>> 31 Aka ənga Musa tə ɓəl gya da Tlakə ga na, <<Kirpəu nji inə na səpəla'a dəgal nə nda mər na! Nda ɓatlətə katə bəjingha nə kərnənda. 32 Kəl ja, yo gədi nghə sakana ka farbikər səpəla'a kənda, ma'a əngə wa zhazhibiya tləm ɗa ngə ka tsəfətə ku likatəkatə ngə ka tsəfə tləmər nji nghə kwa nga.>>
33 Kəl ngə Tlakə tə nar nyi nə Musa, <<Kala ndə nda mər səpəla'a nacha ngə yo zhazhibiya tləm nyi ku likatəkatə ɗa. 34 Sakana ma'i ka səya ma'i na nji ngə kya tə mbwa nda ya na nda, chama ɗa kwa təra ma ngha. Madangə ma bəji tə ɗa nda yo ɓu nda, yo nə nda ɓwaɓwatəu ka səpəla'a kənda.>>
35 Kəl ngə Tlakə tə dəgə nji inda na təmachi aka nda həsəli nə zər tla nda Haruna tə ɓatlətə nda.