Njir Isra'ila tə Ngyar Sinai
33
1 Tlakə tə nar nyi nə Musa, <<Ngyar ma mbwa na, naka ana nji inda ka zəbiya nə vu Masar nda, hya təra ya tə hə'i nda ya mər alkawal ga səmfəla nə Ibrahim, Ishaku ana Jakop ənda yo nə nyi nə nyandəla nda. 2 Yo sətə chama cha təra biyama ngha, ka cha gədləbiya njir Kan'ana, njir Hitti, njir Amori, njir Periz, njir Hivi ana njir Jebusi. 3 Ma'i ma gwa tə hə'i nda 'ua ana mwamwa kwa hwi kwa. Kəl ja a da yo ma'i kə'i hi wa, aka nahi nji kəra ngatəndər hi, a tsa ya da kuɗənda hi ku laku.>4 Nda nji tə ngatə mafakə ɗimiɗimi nga, nda ghəya sə'ingu madawa tə ngyar pəndzə kar gaɗagaɗa. 5 Aka Tlakə tə nar nyi nə Musa, nar nyi nə njir Isra'ila, <<Nahi nji kəra ngatəndər hi, ma ya ma'i kə'i hi mada nə bəji kushiu, yo kuɗənda hi. Sakana səɗənda ma kar gaɗagaɗa kəhi ga ya ndzamar sənda yo mər nə hi. 6 Aka ənga njir Isra'ila tə səɗənda kar gaɗagaɗa kənda kyatə dəgəl Horeb.
Madləɓa Tsəmdza
7 Musa tə liya madləɓa biya tiya mbwar ɓəlsar nda tsatsal da biya, cha fəndzə nyi tləm, <Madləba Tsəmədza.> Kala ndə nda kwa gwa'a Tlakə kwa təra yo Madləɓa Tsəmdzə biyahir mbwar ɓəlsar. 8 Kala bəji nda Musa tə yo madləɓa nda, dəhə nji kwa hya'atə tə ta'i nya madləɓa kənda, nda kwa ndzam Musa kəl saka nda cha gu madləɓa nda. 9 Ma Musa təra gu madləɓa nda kəl ləmbəkə ndalndal kwa səya ngyatanyi nya madləɓa nda ma Tlakə kwa ndər na Musa. 10 Ma nji tə la'a ləmbəkə ndalndal nda tə lakur gu madləɓa nda, dəhə nda kwa hya'atə kwa həsəli, kala ndəu a nya madləɓa nyi. 11 Tlakə kwa ndər na Musa nya na nya wi nda ndə kwa ndər nə bazhi nyi. Kəl Musa kwa ɓəl shili tə mbwar ɓəlsar, kəl ja tlakala nda kwa vala nyi Joshua zər Nun kwa ngya ku madləɓa nda.
Musa ana Səlir Tlakəu
12 Ngə Musa tə nar nyi nə Tlakəu, <<Ko maka nar ɗa, <Nəu na nji'ina,> kəl ja, naka ta ngya ɗa ya zəndə ndara na ea na wa ko sə wa. Ka na, <Kwa zəndə ya tləm ngha, ya uyatə kə kwambiyakur tsa ya.> 13 Macha ngatə tə kə mənakə na ya, dlədləɓar ɗa laku ngha, ga ya zəndə nghə ya biyama na uya kwambiyakur tsa ka. Ka ɗənghatə ənda jul nji na, nji nghə na.>>
14 Ngə Tlakə tə ɓəlakə nyi, <<Naya na kərɗa yo ma'i tsa'a naka, ya yo nə nghə ɓəlsar.>> 15 Kəl ngə Musa tə nar nyi, <<Macha a ko ma'i ka ea wa, ngwa ka hya'andə ea nə wa. 16 Aka aman njo ɗa na zəndə ndara ngatə tə kə mənakə naya ana nji ngha ma'a da ka ma'i ka ea wa? Mi sə nda kwa mərtə ɗa ana nji nghə pam matsa alenya nji'inda tə dunəya?>>
17 Kəl ngə Tlakə tə nar nyi nə Musa, <<Yo mər sə ngə ka gədi nga, aka a ngatə tə ya mənakə naka ya a zəndə nghə tə ya na tləm.>>
18 Musa tə wuma, <<Char ɗa səli nghə sakan ja.>>
19 Kəl ngə Tlakə tə na, <<Yo gwa'atə mənakəkur ɗa təra biyama ngha, naya Tlakəu, yo bəzəya tləm ɗa, a biyama ngha. Yo char ɗanghali ɗa nə ndə nda yo char nyi ɗanghali, ya yo char nyi təhuɗə nə ndə nda yo ngatə təhuɗə nyi.>> 20 Kəl ja, cha na, <<A da ko la'a huɗəma ya wa, aka kala ndə nda tə la'a huɗəma ya cho tah.>>