Tlakə tə ɓəla nə nyi Gadlagadla nyi nə Musa
34
1 Kəl ngə Tlakə tə nar nyi nə Musa, <Dzəɗəbiya təmbəl fafa mətlə wi tangərma nyi inda, yo tsəfətə ɓwanya inda ya tsafətə tə tangərma nyi inda ka huɓənda nda. 2 Ka ɓatliya əmbudla ka zədə tə dəgəl Sinai. Ka na'a kərnghə kinda kyo kəra mə nda. 3 Ngwa vanya ndə zədə tsa'a nakə wa, ya ngwa nja da la'a vanya ndə pa'a ku mə nda wa, ngwa nja da la'a mada kətəng, kua ndara tla kwa ɓəla ləhə dza mə nda wa.>4 Kəl ngə Musa tə dzəɗəbiya təmbəl fafa mətləu wi inda tangərma inda ga təra gyo Mə Sinai nda kaɗə mbudla, wi nda Tlakə tə nar nyi, ana təmbəl fafa mətlə inda ku cha cha. 5 Kəl Tlakə tə səya ku ləmbəkə ndalndal nda ga ta'i na cha tangnda ga bəziya ənda nacha nga, Tlakəu. 6 Ngə cha tərabiya mar Musa, ga bəziya, <Naya ngə Tlakəu, Hyel Tlakəu, ndər təhuɗə na ɗanghali, a huɗa ya do tla ɗəɗəu wa, ya nyida ɗa bwaɓə tanyi nə ndər jiri tsəu. 7 Yo nyida nji fa dubu dubu, yo farbikər təutətəutəkur, mwali ana səpəla'a. Madangə a da cho ngyar ɓu njir bikə wa, kəl ja yo ɓu ngulisha'a aka bikər njir yan nda tsa'a tə makərkunyi ana fwaɗəkunya nyandəla nda.>
8 Ɗəɗəu tanyi kəl Musa tə uzhi səya hu'i ga hətənyi səli. 9 Cha na, <Tlakəu, macha uya tə ya kwambiyakur tə lya ka, ma'i tsa'a na ea. Madangə nji kəra ngatəndər ina, farbikər təutətəutəkur kəea ana səpəla'a kəea, ka hətə ea ka sərfa'aki ngha.>
10 Kəl ngə Tlakə tə na, <Yo mbandər na ka. A tə lya dəhə nji ngha yo mər sər məngəl nda a nji da ta mər ku dunəya ndara ku pama alenya jul nji wa. Dəhə nji inda hyo ngya kə'iri, kwa la'a sər məngəl wawa'a inda naya Tlakə kwa mər nəhi. 11 Ɓəlatə ma sə inda ya nar hi ənya. Yo gədlənda njir Amori, Kan'ana, Hitti, Periz, Hivi ana njir Jebusi. 12 Hya gəla ngwa hya mbandər ka nji inda na ngya tə dəhə hə'i nda hya yi tə wa, tsa nda da ɗa ka ləbam nəhi. 13 Hya huhuɓənda dzəgana kənda, hya wazənda shimbal karti kənda, hya gəganda katə kənda i'i. 14 Ngwa hya da həsəli nə vanya sər həsəli wa, aka Tlakəu, ndər sələkəkur cha.
15 Hya gəla ngwa hya da mbandər ka njir hə'i nda wa, aka ma ndo həsəli təwa kasalikur na kərnənda nə katə kənda, ndo hatəmachi nənda, ndo gədiya hi ya hyo yi səm sərsum nda nda hatəmachi ni. 16 Ma hya həbiya ku'imahi'i kənda nə nguli kəhi ka mahi'i kənda, ya ngə mahi'i inda kwa həsəli nə katə kənda, ndo pətəu nguli kəhi yo həsəli nə katə kənda.
17 <Ngwa hya da həsəli ndara hya ɓatlə katə fətəfətə wa.
18 Hya ɓəlatə ladər Gwazhilakə kəla Tləlam. Hanyi məɗəfa hyo səm gwazhilakə kəla tləlam wi nda ya nar hi. Hya mər əngə tə bəjibəjinyi a tə hya Abib aka a tə hya ngə hya zəbiya vu Masar.
19 <Kala zərsal yar tangərma nə ndə ndara sərshishi na'a nga, dəhə ka yar tangərma nə tla, kətəng ana kua na'a nga. 20 Yar tangərma nə Kwara hyo pəliya na zər gam, kəl ja ma a da hya pəliya wa, hya ɓəliya wulya cha. Hya pəliya zərsal yar tangərma kəhi. <<Ngwa hya da shili huɗə ɗa twatwa'a chi wa.
21 <Hanyi kwah hyo mər tləra, kəl ja pəshir hanyi məɗəfəkunyi hya ɓəliyasar, mada ku bəjir zwa ndara bəjir mər fah tuku hya ɓəliyasar.
22 <Hya ɓəlatə ladər mər yar tangərmar alkama, ana ladər tsəm sakədar fah ku batəbatər fa. 23 Dəhə shili kəhi kwa tsəmdzə huɗə Tlakə Ndər Gyalkur zhaka makər ku kala fa. 24 Yo gədlənda nji nda na ngya tə hə'i nda, yo mərtə hə'i kəhi kwa ɗa 'ualəu, ya a vanya hə'i da kwa kura hi ku fa makər ingə hyo tsəmdzə huɗə Hyel Tlakə ngə wa.
25 <Ma hyo hatəmachi na sərshishi, ngwa hya da ha na gwazhilakə nda na tləlam wa, ya ngwa hya ngyar kumur gam nda hya mər Ladər Dləgəlnda nə nda, a hanyi wa. 26 <Hya shili na tangərmar sə zwazwa shili ku ki Hyel Tlakən hi. Ngwa hya ta zər kua ana 'ua ama nyi wa.>
27 Kəl ngə Tlakə tə nar nyi nə Musa, <Tsəfətə ɓwanya ina, aka məlməl nda na ɓwanya alkawal nda ku pama ma na ka, ana njir Isra'ila.> 28 Musa tə ngya kyo kəra mə nda na Tlakəu, ɓupəchi fwaɗəkumnyi ana hanyi fwaɗəkumnyi, a da cha səm sursum ndara cha sa ɓiti wa. Cha tsəfətə ɓwanya mbandəra, nacha ngə Gadlagadla Kuma a tə təmbəl fafa nda.
Huɗəma Musa
29 Sakanda Musa tə səya tə kyo Mə Sinai nda ana təmbəl fafa mətləu nə Mbandər inda ku cha cha, a da cha zəndə ənda huɗəma cha kwa mbəl wa, aka ndər nda cha ndər na Tlakə nda. 30 Manda Haruna ana dəhə njir Isra'ila tə la'a Musa, huɗəma cha kwa mbəla, ngə ləvər tə səya nda tsa shili ləhə dzə nyi. 31 Kəl ngə Musa tə nga nda, təma ngə Haruna ana dəhə njirawawa'a Isra'ila tə ɓəl shili da cha, ngə cha ndər na nda. 32 Ahir nga dəhə njir Isra'ila tə shili ləhə dzə nyi, ngə cha nənda dəhə gadlagadla nda Tlakə tə nənyi kyo Mə Sinai nda.
33 Manda Musa tə wurandə ndər na nda, ngə cha haɗiya huɗəma cha na pahuɗə mba kər. 34 Kəl ja, dəhə sakanda cha gwa ku Madləɓa nda ka cha ndər na Tlakəu, cho pakənda pahuɗə mba kər nda kəl biji nda cha zəbiya ti. Ma sakanda cha zəbiya ga nar nyi sənda Tlakə tə nar nyi nə njir Isra'ila, 35 ndo la'a ənda huɗəma cha kwa mbəla. Kəl ba'a Musa ɓəla mbunda huɗəma cha kəl sakanda cha ɓəla gwa ndər na Tlakə ti.