Gadlagadla nə Pəchir Ngyaməngya
35
1 Musa tə tsəmtə dəhə njir Isra'ila ga nar nda, <Janə sə'inda Tlakə tə na hya məra. 2 Aku hanyi kwah njo mər tləra, kəl ja pəshir hanyi məɗəfəkunyi pəchi karti nga, Pəchir Ngyaməngya nə ɓəlsar a nə Tlakəu. Kala ndə nda tə mər tlər tə pəchi nga nja tsəya nyi. 3 A da hyo gəɗə mada hu'u tə Pəchir Ngyaməngya tə mbwar səkardzə kəhi wa.>>Ga'a ka Ɓatlə Madləɓa
4 Kəl ngə Musa tə nar nyi dəhə njir Isra'ila, <Janə sə'inda Tlakə tə na, 5 aku sənda hi ni, hya həbiya nyi ga'a nə Tlakəu. Kala ndə nda kwa i cha shili na nyi ga'a nə, bəjingha, azurfa ana ndzəa, 6 linən mənakə pərtə nyi dzarginadzargina, lipəlalipəla ana dəzəu ana shishi kua, 7 chi kətəng nda nja pəgu dəzə ana chi kua ana wur hyachi, 8 Mal zaitun, kar yaji, mal dzəvə səu ana sənda kwa shiuni kwitəkwitə ka ɗəza, 9 ana hangu onis ana mangu inda njo ndaɓəndzə nyi nə efod ana hipə hatləu nə efod.
10 <Dəhə nji inda kwa nau tlər chi ku pama hi cha shili mərtə dəhə sənda Tlakə tə na, 11 <Madləɓa həsəli ana madləɓa nyi, ana sər haɗə nya cha, sər haka i'i, ana ɓangtili nyi i'i ana zəwa nyi i'i ana sər ta'i nyi kənda, 12 ana gwarara ana zəwa nyi i'i ana sər haɗə nya cha nda sər hənda səpəla'a, ana miɗi nda kwa təkəbiya pama Mbwa Karti ana Mbwa nda ndiya na Karti, 13 taɓər ana zəwa nyi i'i ana kar nyi dəhəu, ana gwazhilakə karti nda nja kwa fiya biyamar Hyel, 14 chaka'i aka təkəsəu ana dəhə kar nyi, təkəsə i'i ana mal kənda, 15 dzəgana ngi sə nda kwa shiuni kwitəkwitəu ana zəwa nyi i'i, mal dzəvə səu nda kwa shiuni kwitəkwitəu ana sə shiuni kwitəkwitəu, ana miɗi nya madləɓa həsəli, 16 ana dzəgana hatəmachi təwa nginda, ana hiɗi nyi nə ndzəa ana zəwa nyi i'i, ana dəhə kar nyi, ana ki waɗa nə ndzəa ana sər ta'i nyi, 17 ana miɗi i'i nda tə ɓandə mbwa nda, ana udzəm nyi i'i ana mbwar ta'i kənda, ana miɗi lakur gwa ku mbwa nda, 18 məkukwa madləɓa, ana məkukwa mbwa nda, ana sə'i nyi, 19 ləkutə tsatsa nə mər tləra ku Mbwa Karti, ləkutə Haruna fərist ana ləkutə nguli shili nyi nə mər tlər fərist.>
20 Kəl dəhə njir Isra'ila tə əngwa ta nda dza Musa. 21 Dəhə ndə nda kwa i ana nji nda ɗufwa nda tsukutə nda tə shili na ga'a nə Tlakə aka mər tlər Madləɓa Həsəli nda ana dəhə tlər nyi, ana dzaki inda karti. 22 Dəhə ndə nda kwa i, shili ka mahi'i, tə shili na sər ɓatlə pampaməu, sər daɓə tə ləkutəu, sər ha ku himi, tsəshiu, sər ha tə wulya, ana dəhə chul kala sə nda nja ɓatlə na bəjingha, ga lətə nyi nə Tlakəu. 23 Kala ndə tə shili na, pa'ua dzarginadzargina, lipəlalipəla, dəzəu, ndara linən gumaguma, ndara shishi kua, ndara chi kətəng nda nja pəgu dəzə ndara vanya sənda nja ɓatlə na shishi kua. 24 Kala ndə nda kwa nau tə shili na ga'a nə azurfa ana nə ndzəa nə Tlakəu. Ətsəu, kala ndə nda na wur hyachi nda kwa nau mərtə sakəda ku tlər nda, tə shili ni. 25 Kala mahi'i tlalwa nda kwa nau tsa ləkutə tə shili na bəratsən dzarginadzargina, lipəlalipəla, ndara dəzə nyi nda nda shibiya. 26 Ya dəhə mahi'i tlalwa nda kwa i'i tə shibiya pa'ua ana shishi kua. 27 Gavərma i'i tə shili na hangu onis ana alenya hangu ndaɓə tə efod ana hipə hatləu nə efod. 28 Ətsəu nda shili na kar yaji ana mal zaitun ka təkəsəu, ana mal dzəvə səu ana sənda kwa shiuni kwitəkwitəu. 29 Dəhə njir Isra'ila shili ka mahi'i nda kwa i, tə shili na ga'a wi sənda ɗufwa nda tə char nda ka dəhə tlər Tlakəu wi nda cha tsau nyi bar nə Musa.
Bezalel ana Oholiyab
30 Kəl Musa tə nar nyi nə njir Isra'ila, <Ndzamə ma, Tlakə tabiya tə Bezalel zər Uri, zər Hur nə nyavi Yahuda, 31 ya nyandə nyi tə cha na Shanguɗə Hyel, dəma, ngabiya, zəndi, ana tlalwakur nə dəhə chul tlər chi. 32 Aka ga cha nau ɓatlətə sə pampam na bəjingha, azurfa ana ndzəa. 33 Ka cha nau tlabiya hangu kwa bərdliya, ana cha fiɗəbiya kala sə ku wua ana tlalwakur ku kala tlər chi. 34 Tlakə tə nə nyi dəma nə ka Bazalel ana Oholiyab zər Ahisamak ku nyavi Dan ka dlədləɓar nyi tlər nə alenya nji. 35 Cha nyandə nda na dəma nə fiɗə sə fiɗəfiɗa, tə sə təta ana mbə sə na pa'ua dzarginadzargina, lipəlalipəla, dəzəu ana linən gumaguma, ana tsa səu. Kwa nau nda dəhə chulkə tlər tə sə təta.