DƏLABIYA 36

1 Bezalel ana Oholiyab ana kala ndə nda Tlakə tə nə nyi dəma ana lakur ngabiya ənda cho mərtə kala chulkə tləra, ndo ɓatlətə mbwa karti wi nda Tlakə tə na.

2 Aka Musa tə nga Bezalel, Oholiyab ana dəhə njir nau tlər chi inda Tlakə tə nə nda nau, ya kwa i nda nda vala, ga nar nda nda ghəya tləra. 3 Na nda tsə'u nda dləutsə dəhə ga'a nda njir Isra'ila tə shili nə ka mər tlər madləɓa karti nda. Ngə nji tə biyama na shili na ga'a kənda nə Musa kala mbudla. 4 Kəl dəhə njir nau tlər chi nda kwa mər tlər madləɓa karti nda tə ta'ində tlər nda ga təra ya da Musa. 5 Nda nar nyi nə Musa, <Nji kwa shili na sə nda ndiya sə nda njo gwa'a ka tlər nda Tlakə tə na nja məra.>

6 Kəl Musa tə na nja bəziya bəra, <Ngwa sal ndara mala tsakətə shili na ga'a ka tlər madləɓa karti wa.> Kəl nji tə ta'ində shili ni, 7 aka sənda nda tsəmtə ndiya tə sə nda njo gwa'a ka tlər nda.

Madləɓa Həsəli

8 Dəhə njir nau tlər chi ku huɗa njir mər tlər nda tə ɓatlətə madləɓa həsəli na miɗi gumaguma kumah, ana pa'ua dzarginadzargina, lipəlalipəla ana dəzəu, ana səlirma nə cherubim nda ndə tlalwa tə tsatə ti. 9 Pələkəkura kala miɗi hi fwaɗəkumnyi parnya mətləu, dlaɓəkuracha tsə'u hi kwah, dəhə miɗi inda sə zhang. 10 Nja daɓiya miɗi tufu ga mbətə ka zhang, ya əngə nja ɗa na alenyi inda tufu inda. 11 Kəl ngə nda ɓatlətə səlirma dzarginadzargina a nya chira tangərmar miɗi inda ana mətləkunyi inda. 12 Nda fətə səlirma tufəkumnyi tə tangərmar miɗi nda ya əngə nda mər na mətləkunyi inda, dəhə səlirma inda kwa dzam dza. 13 Kəl ngə nda ɓatlətə sər mba nə bəjingha tufəkumnyi ga mbatə dzukə mətlə nə miɗi inda ga madləɓa nda ɗa zhang.

14 Ngə nda ɓatlətə miɗi kwabəzhang inda ana shishi kua aka mbu madləɓa həsəli nda. 15 Ya miɗi kwabəzhang inda dəhə sə zhang, pələkəkur kənda hi fwaɗəkumnyi parnya tufu, dlaɓəkur kənda hi kwah. 16 Nda daɓətə miɗi tufu aka dzuk zhang, həyadzər kwah inda tsə'u nda daɓətə ka vanya dzuku. 17 Kəl ngə nda fətə səlirma tufəkumnyi tə nyachira dzuk miɗi zhang nda, əngə nda mər na vanya nyachira dzuk miɗi inda tsəu. 18 Nda ɓatlətə sər mba nə ndzəa tufkumnyi ga mbatə madləɓa nda nə aka zhang. 19 Kəl ngə nda ɓatlətə sər haɗə madləɓa na chi kətəng ga pəgu dəzəu, ga haɗiya na alenya chi nda nja tasiya.

20 Ngə nda ɓatlətə udzəm na wur hyachi aka madləɓa nda. 21 Kala udzəm pələkəkur nyi hi kwabətufu, dlaɓəkur nyi hi zhang na manyi. 22 Nda cha cha mətlə kyo ndəla kala udzəm ga nja daɓətə tə nda, əngə nda mər na dəhə udzəm inda. 23 Nda ɓatlətə udzəm mətləkumnyi təwa holma nə madləɓa nda, 24 ga ɓatlətə sər ta'i nə azurfa tə kiɗa nda, sər ta'i mətlə ka kala udzəm, zhang tə kiɗa kala cha cha. 25 Təwa vanya yimbilya cha nda təwa vwa nə madləɓa nda, nda ɓatlətə udzəm mətləkumnyi, 26 ana sər ta'i nə azurfa fwaɗəkumnyi, mətlə ka kala udzəm. 27 Nda ɓatlətə udzəm kwah biyahir madləɓa nda təwa təɗərpəchi nə madləɓa nda, 28 ana udzəm mətlə ka məngum inda biyahir madləɓa nda. 29 Aku məngum mətlə inda, nda daɓiya udzəm mətləmətləu fwatə ki hə'i ta'i kyo kər ga pəu nda ku tsəshiu zhang, kya'a məngum inda əngə nda ɓatləti. 30 Aka ənga, a biyahir madləɓa nda udzəm chisəu ana sər ta'i nə azurfa kwabəkwah, mətləu tə kiɗa kala udzəm.

31 Ətsəu, nda ɓatlətə mədlakə na wur hyachi tufu aka yimbilya madləɓa nda, 32 tufu aka vanya yimbilya cha nda, ana tufu aka ya cha nda təwa təɗərpəchi. 33 Ngə nda ɓatlətə mədlakə nə ghada cha fwatə tə ghəya nyi tsa'a tə ɓəlkə nyi. 34 Nda ɓəsəndzə nyi bəjingha nə udzəm inda ga ɓatlətə tsəshiu ka gəzə mədlakə inda. Nda ɓəsəndzə nyi bəjingha nə mədlakə inda tsəu.

35 Ngə nda ɓatlətə miɗi na pa'ua dzarginadzargina, lipəlalipəla ana dəzə nyi, ana linən gumaguma, ga tsatə səlirma nə cherubim ti. 36 Nda ɓatlətə sər hakə miɗi na wur hyachi ga ɓəsəndzə nyi bəjingha. Nda ɓatlə sənda njo hakəya sər hakə miɗi nda ti, ga ɓatlətə sər ta'i kənda fwaɗə na azurfa. 37 Ngə nda ɓatlətə miɗi na pa'ua dzarginadzargina, lipəlalipəla ana dəzə nyi, ana linən gumaguma nda ndə tlalwa tə ɓatla. 38 Ngə nda ɓatlətə sər hakə miɗi tufu ana sər mba nyi. Nda ɓəsəndzə nyi bəjingha nə sər hakə miɗi nda ana sər mba inda, ga ɓatlətə sər ta'i nə ndzəa tufu.