Gwarara Mbandəra
37
1 Bezalel tə ɓatlətə gwarara na wur hyachi, pələkəkur nyi hi makər na manyi, dlaɓəkur nyi hi mətlə na manyi ana dzəgamkura cha hi mətlə na manyi. 2 Ngə cha ɓəsəndzə nyi bəjingha tsa'amunyi, ta cha ana ya cha, ga təbiya nyachira cha na bəjingha. 3 Cha ɓatlətə tsəshiu fwaɗəu ga fiya zhang ku kala məngum fwaɗə inda mətlə təwa kala yimbilya cha. 4 Kəl ngə cha ɓatlətə udzəm mətləu ana wur hyachi ga ɓəsəndzə nyi bəjingha. 5 Ngə cha tsəwu udzəm inda go tsəshiu nda ka hə gwarara nda.6 Cha ɓatlətə sər haɗə nya cha nda sər hənda səpəla'a na bəjingha tsa'amunyi, pələkəkura cha hi makər na manyi, dlaɓəkura cha hi mətlə na manyi. 7 Kəl ngə cha ɓatlətə cherubim mətlə na bəjingha a nya chira sər haɗə nya cha nda. 8 Cha ɓatlətə cherubim zhang nyachira cha ana mətləkunya cherubim nda nya vanya nyachira cha. Cha ɓatlə nda tə daɓə na sər haɗə nya cha nda təwa nyachira cha barabara. 9 Cherubim inda mbəɗiya babəka nda kagikagi, ga fəkə nyi shanguɗa nə sər haɗə nya cha nda na babəka nda inda. Cherubim inda kwa ndzam dza, bama nda səya kəra sər haɗə nya gwarara nda.
Teɓər
10 Nda ɓatlətə teɓər na wur hyachi, pələkəkura cha hi makərəu, dlaɓəkura cha hi zhang ana manyi, dzəgamkura cha hi mətlə na manyi. 11 Kəl ngə nda ɓəsəndzə nyi bəjingha tsa'amunyi ga təbiya nyachira cha na bəjingha. 12 Nda ɓatlətə ganga wi huɗə cha ndə na dlaɓəkur, ngə nda təbiya nyachira cha na bəjingha. 13 Nda ɓatlətə tsəshiu bəjingha fwaɗəu aka teɓər nda, ga ndaɓiya ku kala məngum fwaɗə inda, tangnda hya cha fwaɗə inda ti. 14 Tsəshiu inda nda fiya ləhə dzər ganga nda, ka ga nja tsəwu udzəm kwa, ka hə teɓər nda. 15 Ngə nda ɓatlətə udzəm na wur hyachi ka hə teɓər nda ga ɓəsəndzə nyi bəjingha. 16 Ngə nda ɓatlətə kar teɓər nda i'i ana bəjingha tsa'amunyi, kə'i paranti kətasəu, shala ana pəla ka hatəmachi sə sasa.
Chaka'i Təkəsəu
17 Nda ɓatlətə chaka'i təkəsəu ana bəjingha tsa'amunyi. Nda ɓatlətə sər ta'i nyi ana dagwara nyi ana bəjingha fətəfəta, ga ɓatlətə ɗeɗika nyi ana mədla'a nyi ana mambəl nyi nja mərtə nda daɓədaɓə nyi na sər hakə təkəsə nda. 18 Cha chaka'i təkəsə nda təkətəkə nyi kwah, makər banga makər banga. 19 Kala zhang ku huɗa cha cha kwah inda ana mədla'a makərəu pabiya mambəl almon, dəhə cha cha na mədla'a ana mambəl ti. 20 A tə chaka'i təkəsə nda tsə'u ɗeɗika fwaɗəu pabiya mambəl almon ana mədla'a ana mambəl. 21 Mədla'a da tə kiɗa kala chi mətləu nə dəhə chi kwah inda tə hya'atə tə chaka'i təkəsə nda. 22 Mədla'a inda ana cha chaka'i inda, ɓatləbatlə nyi na bəjingha tsa'amunyi.
23 Ana bəjingha tsa'amunyi nda ɓatlə təkəsə məɗəfə inda, ana lagwani nyi ana pəli nyi. 24 Nda ɓatlətə chaka'i təkəsə nda ana dəhə kar nyi ana bəjingha talent zhang.
Dzəgana Ngi Sə nda kwa Shiuni Kwitəkwitəu
25 Nda ɓatlətə dzəgana ngi sənda kwa shiuni kwitəkwitə na wur hyachi məlmələu, pələkəkura cha hi zhang na manyi, dlaɓəkura cha hi zhang na manyi, dzəgamkura cha hi makərəu. Təlma cha daɓədaɓə nyi na dzəgana nda. 26 Nda ɓəsətə kəra cha ana dəhə dza cha na bəjingha tsa'amunyi, ga təbiya nyachira cha na bəjingha. 27 Nda ɓatlətə tsəshiu i'i nə bəjingha tə kiɗa nyachira cha nda ka gəzə udzəm inda njo hə ti. 28 Nda ɓatlətə udzəm i'i na wur hyachi ga ɓəsəndzə nyi bəjingha.
29 Ətsəu nda ɓatlətə mal dzəvə səu nda karti, ana sə nda kwa shiuni kwitəkwitə tsa'amunyi wi nda ndər batlə kwa batla.