Dzəgana Hatəmachi
38
1 Nda hərtə dzəgana hatəmachi təwa nginda ana wur hyachi, pələkəkura cha hi məɗəfə na manyi, dlaɓkura cha hi məɗəfə na manyi, dzəgamkura cha hi fwaɗə na manyi. 2 Nda ɓatlətə tələm ku kala məngum fwaɗəu daɓədaɓə nyi na dzəgana nda, ngə nda ɓəsəndzə nyi ndzəa a nə dzəgana nda. 3 Nda ɓatlə dəhə kar nyi na ndzəa, təm nyi, choɓur, kyawa, sər chaku kum, ana ki ta hu'u. 4 Nda ɓatlətə hiɗi nə ndzəa ga fətə tə ghada dzəgana nda. 5 Nda fətəbiya tsəshiu nə ndzəa ka gəzə udzəm inda ku məngum fwaɗə nə dzəgana nda. 6 Nda ɓatlətə udzəm wur hyachi ga ɓəsəndzə nyi ndzəa. 7 Ngə nda fəu udzəm inda gu tsəshiu tə kala yimbəlya dzəgana nda ka hə dzəgana nda. Nda mərtə ta udzəm nda fwanghəu.Ki Waɗa
8 Aku ɗauragal mahi'i inda kwa mər tlər nya Madləɓa Həsəli nda, nda ɓatlətə ki waɗa ana kwaɓash nyi na ndzəa.
Babal Madləɓa Həsəli
9 Vanya zəkə cha tsabiya babal madləɓa nda təwa holma ana linən tsa'amunyi ləmləm nyi mənakəu, pələkəkura cha hi gharəu na tufəkumnyi, 10 nja hakəya miɗi nda tə shimbal nə ndzəa mətləkumnyi, inda nja ta'ində tə sər ta'i kənda mətləkumnyi. Sər hakə ana sər mba miɗi nda nja ɓatlə nyi na azurfa. 11 Təwa vwa tsə'u nja ɓatlətə miɗi hi gharəu na tufəkumnyi, ga hakəya tə shimbal nə ndzəa mətləkumnyi, nda nja ta'ində tə sər ta'i kənda nə ndzəa mətləkumnyi. Sər hakə nyi ana sər mba nyi, nja mər na azurfa.
12 Dlaɓəkura babal nda nda təwa təɗər pəchi hi məɗəfəkumnyi parnya tufəu, ana miɗi nyi, ana shimbal kuma, ana sər ta'i kənda kuma, ana sər hakə nyi ana sər mba nyi inda nja mər na azurfa. 13 Dlaɓəkura babal nda təwa zədər pəchi təwa lakur gwa hi məɗəfəkumnyi parnya tufəu. 14 Miɗi barazhang nə lakur gwa hi mətləkumenyi parnya mətlə na manyi nja hakəya tə shimbal makərəu, inda nja ta'ində tə sər ta'i kənda makərəu. 15 Əngə miɗi nda təwa bangətiti tsə'u nja hakəya tə shimbal nda dzəgamkur nyi hi mətləkumənyi parnya mətlə na manyi nda nja ta'ində tə sər ta'i kənda makərəu. 16 Dəhə miɗi nə mbwa nda nja ɓatlə nyi na linən ləmləm mənakə nyi. 17 Nja ɓatlə sər ta'i inda ana ndzəa kəlnda sər hakə kənda ana mbwar mba nja ɓatlə nda na azurfa, nja yahitə kəra cha na azurfa. Dəhə shimbal mbwa nda ana mbwar mba nda nja ɓatlə na azurfa.
18 Miɗi nə lakur gwa nda nja ɓatlə nyi na linən ləmləm mənakəu, nda ndə tlalwa tə tsa na pa'ua linən dzarginadzargina, lipəlalipəla ana dəzəu. Pələkəkura miɗi nda hi makərkumənyi ana dlaɓəkuracha hi məɗəfə na manyi məlməl na miɗi nə ɓəlkər babal nda. 19 Nja hakəya tə shimbal fwaɗəu nda nja ta'ində tə sər ta'i kənda fwaɗəu inda nja ɓatlə na ndzəa, sər hakə ana sər mba miɗi nda nja ɓatlə na azurfa ngə nja yahitə kəra cha na azurfa. 20 Dəhə məkukwa madləɓa inda tə ɓandə babal nda nja ɓatlə nda na ndzəa.
Kar tləra
21 Ja'inə ɗangkura kar inda nja ɓatlə madləɓa həsəli nda ni, inda Musa tə nar nyi nə njir Levi nda jigabiya, nda Itamar zər Haruna fərist. 22 Bezalel zər Uri, ajinya Hur, nyandəla Yahuda tə mərtə dəhə sə'inda Tlakə tə nar nyi nə Musa. 23 Ndər vala Bezalel nacha ngə Oholiyab, zər Ahisamak, nyandəla Dan. Oholiyab ndər nau tlər chi ana tə sə təta. Cha ɓatlətə linən pərtəu, ga ɓatlətə nyi ɓatlə na pa'ua dzarginadzargina, lipəlalipəla ana dəzə nyi. 24 Dəhə bəjingha nda nja shili nə ka nja mər tlər nə ku madləɓa həsəli, kwa ɗa kilo dubu zhang məlməl na sər dəkə səu nə Mbwa Karti.
25 Azurfa nda nja dləutsə tsa nji inda nja jigabiya ku bəjir jiga nji kwa ɗa talent 100 ana shekel 1,775 məlməl na sər dəkə səu nə Mbwa Karti. 26 Kala ndə nda nja jigabiya tə shili na mar shekel, dəhə ndə nda fa nyi mətləkumnyi ndara ndiya nja jigabiya, nja uya shili 603,550. 27 Nja mər tlər na azurfa talent 100 ka hər mbwa karti ana miɗi madləɓa nda, nja mər tlər na talent 100 ka hər hya cha, talent zhang ka kala hya cha. 28 Nda mər tlər na shekel 1,775 ka ɓatlə sər hakə səu, ka shimbal i'i, ana ka yahi kəra shimbal inda, ana sər mba.
29 Ndzə nda nja tsəmtə kwa ɗa talent 70 ana shekel 2,400. 30 Ana ndzəa, nja ɓatlə sər ta'i ka lakur go Madləɓa Həsəli, ana dzəgana hatəmachi nə ndzəa, ana hiɗi nyi nə ndzəa, ana dəhə kar mər tlər tə dzəgana nda. 31 Ana ndzə tsə'u nja ɓatlə sər ta'i shimbal nda tə ɓandə babal madləɓa nda, ana lakur gwa tə babal madləɓa nda, ana dəhə məkukwa hya madləɓa nda, ana nə inda tə ɓandə babal madləɓa nda.