Ləkutə Fərist
39
1 Nda mbətə ləkutəu ana pa'ua dzarginadzargina, ana lipəlalipəla ana dəzə nyi, ana ɓatlə mənakə nda nja tsa ti, aka zəba ku Mbwa Karti nə Haruna, wi nda Tlakə tə nar nyi nə Musa.Efod
2 Nja mbətə efod na pa'ua nə bəjingha, ana dzarginadzargina, ana lipəlalipəla ana dəzə nyi ana linən ləmləm mənakəu. 3 Nda dlaɓəya bəjingha tə ɗa wi pili, nja hihiya tə ɗa wi pa'ua ka ga nja mərtə ɓatlə tsa na chi tsa'a na pa'ua dzarginadzargina, ana lipəlalipəla, ana dəzə nyi ana pa'ua linən ləmləm mənakə nda ndər tlər chi nda tlalwa tə məra. 4 Nda ɓatlətə sər hakə efod a tə kala badlabadla cha, nda nja daɓətə ku məngum nyi i'i ga nja nau mbati. 5 Nja tsatə gyarakən tlalwa, ana chul pa'ua nda nja tsa efod nda ni, nacha ngə pa'ua dzarginadzargina ana lipəlalipəla ana dəzə nyi, ana linən tsatsa mənakəu.
6 Nda hətə hangu onis ga tsəfətə tləmər nguli Jakop inda kwabəmətlə inda ti, ga hakəya tə shimbal bəjingha. 7 Kəl ngə nja ndaɓətə hangu nda tə sər hakə efod nda, a tə badlabadla cha, aka hangu ɗənghatə na nyavi kwabəmətlə nə Isra'ila, wi sə nda Tlakə tə nar nyi nə Musa.
Hipə Hatlə nə Efod
8 Ngə nda mərtə hipə hatləu, ana chul kar nda nja mər efod nda ni. Nda ɓatlə nyi ana bəjingha, dzarginadzargina, lipəlalipəla ana dəzə nyi ana linən mənakəu ləmləm nyi. 9 Pələkəkur nyi ana dlaɓəkur nyi məlmələu, ngə nja dlətə mətləu ngə tə ɗa pələkəkur nyi ana dlaɓəkur nyi gwangula chi dləa. 10 Ngə nja tətə zotamin fwaɗə ana hangu inda na səli, tangərmar zotamin, nja ndaɓətə rubi, topaz ana beril, 11 mətləkunya zotamin nda nja ndaɓətə kirisolat ana safaya ana emaral, 12 makərkunya zotamin nda nja ndaɓətə jakinta ana agat ana ametis. 13 Aku fwaɗəkunya zotamin nda ndaɓətə beril, onis ana jaspa. Kala hangu nja fu zərzər frem nə bəjingha. 14 A tə hangu kwabəmətlə inda, nja tsəfətə tləmər nguli Isra'ila kwabəmətlə inda wi hatimi, aka ga cha char nyavi kwabəmətlə nə Isra'ila.
15 Nja ɓatlətə sər ha tə wulya ana bəjingha tsa'amunyi, wi sə'i. 16 Nja ɓatlətə hipə bəjingha ana tsəshiu nə bəjingha mətləu, nda fiya ku məngum mətləu inda kyo kəra hipə hatlə nə efod nda. 17 Nja tsəwu sə'i dzəra lyang mətlə nə bəjingha inda ku tsəshiu mətlə nə bəjingha nda nja fiya ku məngum mətlə inda kyo kəra hipə hatlə nə efod nda. 18 Ngə nda ndaɓətə nyachira sə'i mətlə nə dzəra lyang inda nya hipə mətlə nə bəjingha inda, ga nja mbatə tə badlabadla efod nda a biyama. 19 Nda ɓatlətə tsəshiu mətləu nə bəjingha ku alenya məngum mətlə nə hipə hatlə inda, səyo ndəla hipə nda ləhə dza efod nda. 20 Nda ɓatlətə tsəshiu nə bəjingha mətlə səkəu, ga ndaɓətə səyo ndəla cha a biyamar badlabadla efod nda ləhə dza mədaɓa gya mar gyarakən nda. 21 Nja mbatə tsəshiu nda tə hipə hatlə nə efod nda ga gi mbatə tə tsəshiu efod nda ana sə'i dzarginadzargina, ga cha ɗa gya mar gyarakən nə efod nda tsa cha da pəlnda dzə tə efod nda, wi nda Tlakə tə nar nyi nə Musa.
Alenya Ləkutə Fərist
22 Kəl ngə nda tsatə ləkutəu, ana pa'ua dzarginadzargina. 23 Nja tlabiya wulya ncha, nja tsatə ga mərtə nyi səsəm tsa cha da ta. 24 A nya chira ləkutə kya hu'i nja ɓatlətə nyi ɓatlə nda tə pabiya nguli Pomegranat ana pa'ua dzarginadzəargina, lipəlalipəla ana dəzə nyi, ana pa'ua linən mənakə ləmləm nyi. 25 Ngə nda ɓatlətə tatang na bəjingha tsa'amunyi, nja ndaɓəu ku pama pomegranat inda. 26 Nja fəu tatang zhang ahir kala pomegranat a ka Haruna handzə ka mər tləra wi sə nda Tlakə tə nar nyi nə Musa.
27 Nda ɓatlətə ləkutə kushiu nda na ɓatlə tsa na chi ana pa'ua linən mənakə nda ndə tlalwa tə tsa. 28 Ətsəu, nda ɓatlətə pahuɗə kər, ana dora ana durosəu ana pa'ua linən mənakəu ləmləm nyi. 29 Nda ɓatlətə gyarakən ana pa'ua dzarginadzargina, lipəlalipəla ana dəzə nyi, ana ɓatlə tsa na chi mənakəu ti, wi nda Tlakə tə nar nyi nə Musa.
30 Nda ɓatlətə təmbəl tsəfə kushiu ana bəjingha tsa'amunyi ga tsəfətə tsəfə tə wi hatimi bəra, KARTI NƏ TLAKƏU, ga ndaɓətə ti. 31 Ngə nda mbatə gang na nyama pahuɗə kər nda ana pa'ua dzarginadzargina, wi sə nda Tlakə tə nar nyi nə Musa.
Musa tə Ndzamətə Madləɓa Həsəli nda
32 Əngə nja wurandə dəhə tlər Madləɓa Tsəmdzə nda. Njir Isra'ila tə mərtə dəhə wi sə nda Tlakə tə nar nyi nə Musa. 33 Kəl ngə nda shili na madləɓa nda nə Musa, ana dəhə kar nyi, sər hakə nyi i'i, udzəm nyaki nyi, mədlakə nyi, shimbal nyi, mbwar ta'i nyi i'i, 34 sər mbu nyi nda nja mər na chi kətəng nda nja pugu dəzəu, sər haɗə nyi nda nja mər na chi kətəng ana nə kua, ana miɗi nda, 35 ana Gwarara Mbandər ana udzəm nyi ana sər haɗə nya cha, nda sər hənda səpəla'a, 36 ana teɓər ana dəhə kar tlər nyi ana gwazhilakə nda nja dzəviya, 37 ana chaka'i təkəsə nə bəjingha tsa'amunyi ana təkəsə nyi ana dəhə kar nyi, ana mal ka təkəsə nda, 38 ana dzəgana nə bəjingha tsa'amunyi, mal dzəvə səu, sə nda kwa shiuni kwitəkwitəu ana miɗi ka lakur gwa ku madləɓa nda, 39 ana dzəgana nə ndzəa ana hiɗi nyi nə ndzəa, ana udzəm nyi ana kar tlər nyi, ana ki waɗa ana kwaɓash nyi, 40 ana miɗi nə ɓəlkər babal nda ana shimbal nyi ana sər ta'i nyi, ana miɗi nə lakur gwa tə babal nda, sə'i i'i ana məkukwa nə ɓəlkər babal nda, ana dəhə kar tlər nə Madləɓa Tsəmdzə nda, 41 ana ləkutə mər tlər ku mbwa karti, a nə Haruna ka mər tlər fərist, ana ləkutə nə nguli shili nyi ma ndo mər tlər fərist.