Nja Kukuya Madləɓa Həsəli
40
1 Kəl ngə Tlakə tə nar nyi nə Musa, 2 <<A tə tangərmar pəchi nə tangərmar fa ka kukuya Madləɓa Həsəli. 3 Ka fiya Gwarara Mbandər kwa, ka hakəya miɗi ndo mbunda gwarara nda. 4 Ka fəu teɓər nda kwa ka piya dəhə kar nda njo mər tlər nə ku madləɓa nda. Ka fəu chaka'i təsəu nda ka hakətə təkəsə ti. 5 Ka fiya dzəgana bəjingha nda ka ngi sə nda kwa shiuni kwitəkwitəu a mar Gwarara Mbandər nda, ətsəu, ka hakəya miɗi nda ku lakur gwa ku madləɓa nda.6 Ka fiya dzəgana hatəmachi təwa nginda a biyamar lakur gwa ku Madləɓa Tsəmdzə nda. 7 Ka fiya ki waɗə nda ku pama Madləɓa Tsəmdzə nda ana dzəgana nda, ka pəu ɓiti kwa. 8 Ka ɓandə ɓəlkər babal nda na shimbal ka hakəya miɗi nda ku lakur gwa tə babal nda. 9 <<Ka hətə mal dzəvə səu nda ka dzəviya madləɓa nda ana dəhə sə nda kwa, ka chinda ya cho ɗa karti. 10 Ka dzəviya dzəgana hatəmachi ngi sə nda kwa shiuni kwitəkwitəu ana dəhə kar nyi nda, ka chinda dzəgana nda ya cho ndiya ɗa karti. 11 Ka dzəviya ki waɗə nda ana kwaɓash nyi nda, ka chinda ya cho ɗa karti.
12 <<Ka shili na Haruna ana nguli shili nyi ku lakur gwa ku Madləɓa Tsəmdzə nda, ka chinda nda na ɓiti. 13 Ahir nga ka handzə nyi ləkutə inda na karti nda nə Haruna, ka dzəviya nyi, ka chinda nyi, ka ga cha mər tlər fərist na'a. 14 Ka shili na nguli shili nyi ka handzə nda ləkutəu. 15 Ka dzəviya nda wi nda ka dzəviya adan nda nda, ka ga nda mər tlər fərist na'a. Dzəvə nda ko dzəvə nda kwa ɗa ka dzəvə nə mər tlər fərist ku dəhə ngya kənda.>> 16 Musa tə mərtə tang wi sə nda Tlakə tə nar nyi.
17 Aka ənga nja kukuya tə Madləɓa Tsəmədzə nda pəshir tangərmar hanyi nə tangərmar hya nə mətləkunya fa. 18 Nda Musa tə kukuya Madləɓa Tsəmədzə nda, cha kukuya hya cha ga chiya udzəm ta'i ta'iu, ga dlakəu mədlakə ga dlətə kəra cha. 19 Ngə cha mbukər chi tlərəm təkəra Madləɓa Tsəmədzə nda, ga mbuya kəra madləɓa nda, wi nda Tlakə tə nar nyi.
20 Cha hətə təmbəl fafa inda ga pəu ku Gwarara Mbandər nda, ga tsəwu udzəm hə gwarara inda fərnya sər haɗə nya cha nda sər hənda səpəla'a. 21 Kəl ngə cha shili na gwarara nda shili ku madləɓa həsəli nda, ngə dlakəya miɗi mar Gwarara Mbandər nda wi nda Tlakə tə nar nyi.
22 Musa tə fiya teɓər ku Madləɓa Tsəmdzəa təwa vwa nə madləɓa həsəli nda, a biyahir miɗi nda 23 ga fiya gwazhilakə mar Tlakəu, wi nda Tlakə tə tsaunyi bar.
24 Cha fiya chaka'i təkəsə ku Madləɓa Tsəmdzə nda a gya mar teɓər nda təwa holma nə madləɓa həsəli nda 25 ga fiya təkəsə i'i wi nda Tlakə tə tsaunyi bar.
26 Musa tə hərtə dzəgana bəjingha ku Madləɓa Tsəmdzə nda a biyamar miɗi nda 27 ga nginda sə nda kwa shi'uni kwitəkwitə ti, wi nda Tlakə tə tsaunyi bar. 28 Ngə cha mbiya miɗi nda tə lakur gwa ku madləɓa həsəli nda.
29 Ngə cha fiya dzəgana hatəmachi ngi sə ngingi ləhə dza lakur gwa ku madləɓa həsəli nda, Madləɓa Tsəmdza nda ga handa təmachi nə nginda ti, ana lə ga'a nə sə uhiuhi, wi nda Tlakə tə tsaunyi bar.
30 Ngə cha fiya ki waɗə nda ku pama Madləɓa Tsəmdzə nda ana dzəgana ga pəu ɓiti kwa ka waɗa, 31 ngə Musa ana Haruna ana nguli nyi tə mər tlər nə ka chi cha nda ana hya nda. 32 Kala bəji nda ndo go Madləɓa Tsəmdzə nda, ndara ndo ɗa ləhə dza dzəgana nda, kəl nda waɗa, wi nda Tlakə tə tsaunyi bar nə Musa. 33 Kəl ngə Musa tə həya babal dzər madləɓa həsəli nda ana dzəgana nda ga hakəya miɗi tə lakur gwa tə babal nda. Əngə Musa tə wurandə tlər inda.
Səlir Tlakə tə Səya Təkəra Madləɓa Tsəmədza
34 Kəl ngə ləmbəkə tə haɗiya Madləɓa Tsəmdzə nda, kəl səlir Tlakə tə nyandə madləɓa həsəli nda. 35 Musa da nau gwa ku Madləɓa Tsəmdzə nda wa aka ləmbəkə haɗiya ti, aka səlir Hyel tə haɗiya madləɓa həsəli nda.
36 Aku dəhə ma'i njir Isra'ila, ma dəhə sakanda ləmbəkə nda əngwa təkəra madləɓa həsəli nda, kəl ndo ngyar mbwa nda. 37 Kəl ja, ma'a ləmbəkə nda da əngwa wa, a da ndo ngyar mbwa nda wa, kəl pəshi nda ləmbəkə nda tə ngyar mbwa nda. 38 Ənga ləmbəkə Tlakə tə ngya təkəra madləɓa həsəli nda əpuchi, əvu'i tsə'u kəl hu'u kwa ɗa ku ləmbəkə nda, njir Isra'ila kwa la'a laku ku dəhə ma'i kənda.