Fa nə Far na Məl
15
1 A tə batəbatər məɗəfəkunya fa, a ɗatə tuku hya far na dəhə məl nda hyo nəu nji. 2 Janə ənda hyo məra, kala ndə nda kwa nəu ndə məl, cha far na məl nda cho nəu kuvanya ndər Isra'ila. Ngwa cha tsakətə gwa'a nja kinda pa'a wa, aka Tlakə na kərnyi zhazhinda ti məl nda. 3 Ko nau dləu məl nghə tsa ndə shilishili, kəl ja, tuku ka far na məl nda ko nəu kuvanghə ndər Isra'ila. 4 Kəl ja, a ndə do uya ndə ɗaliɗali ku huɗa hi wa, aka tə hə'i ngə Hyel Tlakən hi kwa nəhi ka sərfa'aki nga, cho səkə hi papa'akur gagaɗa, 5 ma hya wur nəubiya nya Hyel Tlakən hi tsa'atsa'a ga ɓəlatə gadlagadla inə ya kwa nə hi ənya na. 6 Aka Hyel Tlakən hi kwa səkə hi papa'akur wi nda cha mər alkawal, hyo nə nyi yavə nə alənya hə'i ɗanghəu, kəl ja, a hə'i da nda hyo dləu yavə tsari pa'a wa. Hyo kura hə'i ɗanghəu, kəl ja, a hə'i da nda kwa kura hi pa'a wa.7 Ma a ɗa kuvan hi ndər Isra'ila da ɗaliɗali nyi ku huɗa mələm inda Hyel Tlakən hi kwa nə hi, ngwa hya da ikərnəhi hya ngyar vala nyi wa. 8 Atəvira ənga, cha hya ɗa wunghəu, hya yavə'u nyi kala sənda cho i. 9 Hya gəla ngwa hya da haɓə ɗimikur ku ɗufwa hi bəra, <<Məɗəfəkunya fa ɗatə ləhəu, fa nda njo far na məl,>> ba'a hya katə nyi yavə nə kuvan hi ndər Isra'ila nda ɗaliɗali nyi ku huɗa hi. Cho nau tiwi nə Tlakəu, ya ba'a cha ɗa bikə nda kwa shaka səpəla'a təkəra hi. 10 Nə nyi ma sə nə ndə na chi wunghəu, ya ngwa hya huhuni ku ɗufwa hi wa, aka təwa əngə Hyel Tlakən hi kwa səkə hi papa'akur təkəra kala tlər kəhi ana təkəra dəhə sənda hyo məra. 11 Aka a da hyo təkə ka nji ɗaliɗali tə hə'i ngə wa. Aka ənga, janə yo nə hi tsaubar, hya ɗa na chi wunghə nə kuvan hi ndər Isra'ila nda butəbutəua.
Ənda njo Pəl Mava
(Dəla 21:1-11)
12 Ma ndər Isra'ila sal ndara mala tə ɗəlnda hi kərnyi ka mava, ya ngə cha mər mavakur nə hi nə fa kwah, fa məɗəfəkunyi, tuku hya wuniya nyi cha təra ka dimur ndəu. 13 Ma hyo wuniya nyi, ngwa hya ngya nyi twa'atwa'a chi wa. 14 Hya ɗa nda sə na chi wunghəu, məlməl na sə nda Hyel Tlakən hi tə səkə hi papa'akur ni, wi ka Kətəng ndara kua, səuhiuhi ana ɓitir anapəu. 15 Hya ɗənghatə ənda ɗaka ɗa mavi'i hi vu Masar, ngə Hyel Tlakən hi tə pəliya hi, nacha gwa'atə yo nə hi chul nawa tsaubar ənya.
16 Kəl ja, ma mava nda tə na, bəra, <<A da yo i ya ngya nghə wa,>> aka nyida nda cho nyida ngha, ana njir ki ngha aka ngya mənakə nda ka char nyi, 17 ba'a ka hətə hafə isəu, ka iya himya cha ni biya nya nyaki ngha, təwa ənga, cho ngya ka mava nghə ma a wur ɗa ana pi ka. Əngə tanyi ko mərtə nyi nə kwatəra nghə tsəu.
18 Ngwa cha ɗa dza'u nə nghə ka wunənda mava nghə wa, aka tlər nda cha mər nə hi fa kwah nga, a ɗatə zhaka mətlə nə tlər ndər mər tlər wazəba. Hyel Tlakən hi kwa səkə hi papa'akur təkəra dəhə tlər kəhi.
Yar Tangərma nə Sərshishi
19 Hya fiya yar tangərmar tla, kətəng ana ku kəhi nə Hyəl Tlakən hi. Ngwa hya zwa na yar tangərmar tla kəhi wa, ya ngwa hya sə shishi yar tangərmar kətəng ka pa'ua wa. 20 Kala fa nahi kə'i njir ki kəhi hyo səm yar tangərmar sərshishi ingə mar Hyel Tlakən hi tə mbwa nda cho tabiya. 21 Macha sərshishi zəzə nyi, ndara gadal, ndara wulfəu, ndara tsə'u tyakəm da tə 'ua'ualəu, ngwa hya hatəmachi ni nə Hyel Tlakən hi wa. 22 Hya səm chulkə sərshishi ingə ku mələm kəhi. Dəhə hi, ndara ndə nda chichinyi, ndara ndə nda pa'a chichinyi kwa nau ɗəa, mada wi ka jigəl ndara kanyaɗəu. 23 Kəl ja, ngwa hya səm mashimashi nyi wa, hya pənda hu'i wi ɓiti.