Fa nə Ɓəlsar
25
1 Tlakǝ tǝ ɓwanya na Musa kyatǝ kǝra mǝ Sinai bǝra 2 cha nar nyi nǝ njir Isarila gadlagadla inǝn na."Sakanda hya gwa'atǝ hǝ'i nǝ yo nǝhi na, tuku hya nǝnyi ɓǝlsar nǝ hǝ'i ahir fa mǝɗǝfa aka nja nǝnyi sǝli nǝ Tlakǝu. 3 Fa kwah hyo zwa fa kǝhi. A ku fa kwah nga, hyo ɓatlǝ fa anaɓ kǝhi, hya mǝriya zhar kǝnda. 4 Kǝl ja, aku fa mǝɗǝfǝkunyi, fa nga nǝ ɓǝlsar anǝ hǝ'i, fa nga nǝ ngyar mǝr tlǝra, pǝchir ɓǝlsar anǝ Tlakǝu. A da hyo zwa fa kǝhi wa, a da hyo ɓatlǝ fa anaɓ kǝhi wa. 5 Sǝ nda tsǝ ku hǝ'i, ngwa hya da ba biya ka mǝriya wa, ndara hya tsǝmǝ yayar anaɓ nda da na hi tǝ ɓatlǝ wa, aka fa cha nǝ ɓǝlsar nǝ hǝ'i. 6 Dǝhǝ sǝnda hǝ'i nda tǝ biyandi nda a da nja zwa aku fa nǝ ɓǝlsar nda, nacha hyo sǝma, nakǝ kǝ'i mava ngha sal ana mala, ana njir mǝr tlǝr ngha, ana mihiɓi inda kwa ngya naka, 7 ana sǝr shishi ngha, ana dǝhǝ kum taku. Dǝhǝ papa'akur nda hǝ'i ngǝ kwa biyandi, kwa ɗa sǝrsum madawa."Fa nǝ uya butǝrkǝr
8 "Njo jigabiya fa nǝ ɓlsar mǝdǝfa, mǝɗǝfa zhaka mǝɗǝfa, fa fwaɗǝkumnyi parnya dla. 9 Njo bǝzǝya fa tufukumnyi na tǝlǝm nda na kurakǝu. Pǝshir hanyi kuma nǝ hya mǝɗǝfa, pǝshir mǝr mirga, njo nar nyi nǝ nda mbǝɗǝ tǝlǝm madamani a ku hǝ'i dǝhǝu. 10 Njo ɓǝlatǝ fa tufukumnyi ngǝ na karti. Ətsǝ njo bǝzǝya a ku dǝhǝkura hǝ'i, ǝnda bijir uya butǝrkǝr na anǝ dǝhǝ nji. Cho ɗa ka fa nǝ uya butǝrkǝr anǝ hi. Madawa kwa ɓǝl ka sǝr fa'aki nǝ njir ki nyi, madawa tsǝu nǝ njir kinyi. 11 Fa tufukumnyi nga kwa ɗa ka fa nǝ uya butǝrkǝr nǝ hi. A ku fa nga, a da hyo tlǝka wa, ndara hya mǝriya sǝnda tǝ tsǝ sǝnyi ku hǝ'i,ndara hya tsǝmǝtǝ yayar anaɓǝ nda nda nǝhi ɓatlǝ wa. 12 Aka fa nga nǝ uya butǝrkǝr ngǝ anǝ hi, hyo ɓǝlatǝ na karti. Kǝl ndara hya sǝm sǝnda tsǝ tanyi sǝnyi na kǝr nyi. 13 "A ku fa nǝ uya butǝrkǝr nga, madawa kwa ɓǝl kyada sǝr fa'aki nyi. 14 Macha vany ndǝ tǝ ɗǝl nda babal nyi ndara cha ɗǝlbiya babal tsa zǝmǝnyi ndǝr Israila, ngwa cha da ɗiyanyi wa. 15 Sakanda ndǝ tǝ ɗǝlbiya babal tsa tuwulnyi, 'ualkura kwaba babal nda, kwa ta'i tǝ kǝra gwangkura fa nda tǝ tǝrabiya ahir fa tufukumnyi nǝ uya butǝrkǝr, ǝtsǝu dladza gwangkura fa nǝ zwa inda tǝ hǝyadza tǝvi vanya fa tufukumnyi nǝ uya butǝrkǝr da ɓǝl shili. 16 Macha fa nda tǝ hǝyadzǝ tǝvi vanya fa tufukumnyi nǝ uya butǝrkǝr tǝ ɗa gwang, kwaba babal nda kwa ɗa gwang. Macha fa nda tǝ hǝyadzǝ tǝvi fa tufukumnyi nǝ uya butǝrkǝr da gwang wa, ǝngǝ tsǝu kwaba babal nda nda kwa ɗa 'ual wa.Aka dladza zhar nda nda uya ku fa ingǝ njo ɗǝl nda ngha. 17 Ngwa hya da ɗah kǝrnǝ hi, kǝl nda hy lǝvǝr Hyel kǝhi, aka naya ngǝ Hyel Tlakǝn hi."
Pǝchaɓǝ nǝ mǝɗǝfakunya fa
18 "Ma hya ɓǝlatǝ gadlagadla ɗa ina, ya ngǝ hyo nǝubiyanda, hyo ngya kwalanghǝ a ku hǝ'i nda, 19 hǝ'i nda tsǝu kwa biyandi zhar nyi, hyo sǝma, hyo nyi, hyo ngya kwalanghǝu. 20 "Kwa nau ɗa hyo jawo bǝra mi eo sǝm ku fa mǝɗǝfa nǝ ɓlsar nga, mangǝ nda ea kwa tlǝkawa, sakawata ea tsǝmǝtǝ zhar fa kǝ ea? 21 Naya Tlakǝu, yo sǝtǝ hi papa'akur aku kwahkunya fa nda hǝ'i nda kwa biyandi zhar nǝ fa gwang gagaɗa, nda kwa nyam nahi fa makǝrǝu. 22 Ma hyo nda shi tlǝka ku fa chisǝkunyi, hyo shili sǝm kǝr sǝmǝ ku hǝyadzǝr sǝ zwa nǝ fa kwahnda. Hyo sǝm tanyi ku taɗǝr sǝ zwa zwa nda, kǝl bijinda hya nda shili mǝriya zhar fa nǝ dlakunya fa.
Pǝllǝ kar sǝr fa'aki
23 "A da njo ɗǝlnda na nyi babal nǝ vanya ndǝ cho gǝzǝya ba'anawa wa, aka na'a ngǝ hǝ'i. A na'a, nǝ hi wi mihiɓi nga hi, nda nja ngyahi ka hya mǝr tlǝr na hǝ'i nga. 24 Dǝhǝ babal fa inda hya fa'aki ni, ma hya ɗǝlnda, tuku hya mbǝɗiya laku nda njo ɓǝla pǝliya sǝkǝu. 25 "Ma zhang ku huɗa zamǝn hi tǝ ɗa ɗalɗalinyi, ngǝ tǝ gwa'atǝ cha tlatsǝ mar babal nyi ga ɗǝlnda, kǝl vanya ndǝ ku nyavi kǝnda shili pǝliya sǝnda zaǝnyi tǝ ɗǝlnda. 26 Macha a ndǝ nda tsa ndǝr ɗǝlnda babal nda nda kwa pǝliyanyi wa, kǝl nda a biyama macha mbabiya dza ga uya dunamar pǝliya babal nda na kǝrnyi, 27 kǝl ba cha jigabiya ɗangkura fa nda nja mǝrtǝ ku biji nda nja ɗǝlnda babal nda. Kǝl ba cha jigabiya kwaba babal nda, wi nda tǝ gwangkur fa nda tǝ hǝyadza tǝvi fa tufukumnyi nǝ uya butǝrkǝr ɓǝla shili. Hǝyadzǝr kwaba nda, njo ɓǝlandi nyi nǝ ndǝ nda ɗǝl babal nda. Babal nda tsǝu njo ɓǝlandi nyi nǝ tlakǝr nyi. 28 Kǝl ja, macha a sǝ da tsa cha 'ual nda cho nau pǝliya sǝnyi nǝ wa, yau, babal nda nja ɗǝlnda kwa ngya ku cha ndǝ nda ɗǝlnda kǝl fa tufukumnyi nǝ uya butǝrkǝr. 29 "Ma ndǝ tǝ ɗǝlnda ki ku mǝlǝm dǝgal nda na ɓangtili, cho nau pǝliya ki nda ku fa zhang ahir nda cha ɗǝlnda. Lakur pǝliya da tsa cha aku fa zhang. 30 Kǝl nda ma cha a cha nau pǝliya ku fa zhang ngǝ wa, yau, ki nda cha kwa na ngya ku mǝlǝm nda na ɓangtili nda kwa ngya ka nǝ ndǝ nda ɗǝlbiya nda ba'anawa, ba'anǝ ɓǝlǝr jivanyi. A da njo ɓǝlandǝ ki nda aku fa tufukumnyi nǝ uya butǝrkǝr wa. 31 Kǝl ja, ki nda ku giwa nda kǝla ɓangtili tǝ ɓandiǝ i, njo jiganda wi ngǝ tǝ babal fa i. Njo nau pǝliya nda, ya ba ɓǝlandǝ nyi nǝ tlakǝr ki inda a ku tufukumnyi nǝ uya butǝrkǝr. 32 Kǝl nda ja, tǝkǝra mǝlǝm Lauyawa, ana ki kǝ nda inda ku mǝlǝm dǝgal nda nja tlabiya nda, laku nda tsa Lauyawa nda ndo pǝliya sǝnda kala biji. 33 Ma ndǝr Lawi tǝ ɗǝlnda ki aku ki inda ku mǝlǝm dǝgal nǝ njir lawi, a cha nau pǝliya ki nda wa, njo ɓǝlandǝ nyi a ku fa nǝ tufukumnyi nǝ uya butǝrkǝr.A ki njir Lawi aku mǝlǝm dǝgal kǝnda, sǝr fa'aki kǝnda inga nǝ ba'anawa a ku njir Israila. 34 Kǝl ja, babal nda ɓandǝ mǝlǝm kǝnda inda wawa'a a da njo ɗǝlnda wa, aka sǝr fa'aki kǝnda inga nǝ ba'anawa.
Yava (hasarǝu) nǝ njir ɗali
35 "Ma zhang ku pama zamǝnghǝ i tǝ go tari, nda ɗali tǝ sǝya nyi, kǝl ka vala nyi wi nda tǝ ki ko vala mihiɓi nda na ngya ku pama hi. 36 Ngwa ka da ba nǝnyi yava na zhar tǝkǝri wa. Kǝl ja, ka lǝvǝr Hyel ngha, ka ngyar zamǝnghǝ cha ngya na ka. 37 A da ko nǝnyi yava (tlǝnda nyi mǝl) na kwaba na jigadǝmar zhar tǝkǝri wa, ndara tsǝu ka ɗǝlnda nyi sǝursum na gwa'a vanya zhar tǝkǝri a tsa cha wa. 38 Naya ngǝ Hyel Tlakǝn hi nda fa'abiya hi vu hǝ'i Masar, aka ga ya nǝ hi hǝ'i njir Kana'ana ǝtsǝu ya ɗa ka Hyel kǝ hi."
Gadlagadla tǝ kǝra mavi'i
39 "Ma zhang ku pama zamǝnghǝ tǝ ɗa ɗalɗalnyi nda gwa'atǝ ma cha ɗǝlnda nghǝ kǝrnyi, ngwa ka chinyi tuku cha mǝr tlǝr nǝnghǝ wi mava wa. 40 Cho ngya nakǝ wi ndǝr mǝr tlǝr tanyi nǝngha, cho zǝba nǝnghǝ kǝl fa tufukumnyi nǝ uya butǝrkǝr tǝ ɓǝla shili. 41 A ku biji nga, nacha na ngulisha'a nyi ndo ɓǝl tanda ya da jikǝnda . Ndo ɓǝl ya tǝ sǝr fa'a ki kǝnda. 42 Aka njir Israila mavi inga, nda nja fa'abiya vu hǝ'i Masar. A da njo ɗǝlnda nda wi mavi'i wa. 43 A da ko mǝr 'ua'uramǝkur tǝkǝra nda tsa'a na char nda ɓwaɓwatǝ wa, Kǝl nda ka lǝvǝr Hyel ngha. 44 Kǝl ja, a tǝ kǝra mavi'i shili ana mahi'i, aku jul nji inda tǝ ɓandǝ nghǝ ngǝ ko nau ɗǝltsǝ nda i. 45 Ko nau ɗǝlbiya mavi'i a ku pama mihiɓi ingǝ na ngya ku pama hi nga, njir ki kǝnda ana ngulisha'a nda nda yiyah a ku pama hi. Ndo ɗa ka sǝr cha hi. 46 Ko nau shandǝ nda ka sǝr fa'aki nǝ ngulisha'a ngha, aka ndo ɗa ka sǝr cha ngulisha'a ngha. Ndo ɗa ka mavi'i kǝ hi ba'anawa. Kǝl ja, tǝkǝra zamǝn hi njir Israila, a vanya ndǝ kwa ɗa tlakǝ nǝ kuvanyi tsa'a nǝnyi ɓwaɓwatǝ wa. 47 "Ma mihiɓi nda na ngya ku pama tǝ ɗa ndǝr gǝna, ya ngǝ ndǝr Israila zamǝn hi tǝ ɗa ndǝ ɗali, nda cha ɗǝlnda ma kǝr nyi nǝ mihiɓi nda, ndara nǝ zhang ku huɗa njir ki mihiɓi nda, 48 njo nau pǝliya ndǝr Israila nda. Zhang ku huɗa zamǝnyi kwa nau pǝliya nyi, 49 ndara zamǝnya adanyi cha, ndara zǝr zamǝnya adanyi, ndara vanya ndǝ ku nyavi kǝnda. Nacha na kǝrnyi kwa nau pǝliya kǝrnyi ma cha kwaba nyi da. 50 Nacha tǝkǝrnyi ana ndǝ nda tǝ ɗǝlbiya nyi ndo jigabiya biji ghǝuya tǝ fa nda cha ɗǝlndanyi kǝrnyi, yatǝ fa nǝu Jubilee.. 'Ualkura kwaba nda njo kinda aka cha uya butǝrkǝr, kwa ta'i tǝ kǝra gwangkura kwaba nda njo ki ndǝr mǝr tlǝr uzakǝn. 51 Macha fa nda tǝ hǝyadza tǝ ɗa gwang, cho kinda kwaba wi nda cha ɗa ka dlǝutsǝ aku biji nda cha ɗǝlnda kǝrnyi. 52 Kǝl ja, macha fa inda tǝ hǝyadza tǝ ɗ kushu tǝvi fa Jubilee. yau, cho kinda kwaba aka cha uya butǝrkǝr nyi. 53 Mihiɓi nda kwa nǝuna ndǝr Israila nda wi ndǝr mǝr tlǝr uzakǝn nda nja hǝtǝ ka fa -ka fa ka mǝr tlǝr tanyi. A da njo ngyar vanya mihiɓi nda na ngya ku Israila kwa nǝnyi ɓwaɓwatǝ nǝ zamǝn hi wa. 54 Macha tsǝu a nja nau pǝliya nyi tǝwa zhang ku huɗa laku ingǝ wa, yau, njo nǝnyi dimukur na cha ana ngulisha'a a ku fa nǝ Jubilee. 55 Aka njir Israila mavi inga, mavi nga nda nda ya fa'abiya vu hǝ'i Masar. Naya Hyel Tlakǝn hi nga.