Wazəba nə Kəriwakur
26
1 Tlakǝ tǝ na, "Ngwa hya da fiɗǝ katǝ nǝ kǝr nǝ hi, ndara sǝlirma wa, ndara hya chiya vanya hangu ka hǝsǝli nyi wa, ndara hya fiɗiya hangu a ku hǝ'i kǝ hi ka hǝsǝli wa, aka naya Hyel Tlakǝn hi nga. 2 Hyo ɓǝlatǝ Pǝchir Ɓǝlsar Asabat ɗa, ǝtsǝu hya hǝtǝnyi sǝli nǝ Mbwa ngyaɗa Nda Karti. Naya Tlakǝ nga. 3 "Ma hya ɓǝlatǝ gadlagadla ɗa ga nǝubiya tsaubar ɗa, ga mǝr sǝnda nda kwa ku sǝnam, 4 yo sǝtǝ hi par ku biji nyi, hǝ'i tsǝu kwa biyandǝ zhar nǝ sǝ zwazwa, ǝtsǝu wu i kwa yah. 5 Zhar fa kǝhi kwa ɗa 'ualǝu, nda ma'a hyo dǝkǝtanyi kǝl bijir tsǝmǝ yayar anaɓ tǝ ɗa, hyo tanyi yayar anaɓ kǝl bijir tlǝka tǝ ɓǝ shili. Hya sǝm sǝursuma hyo nyi, hya ngya ku hǝ'i kǝhi kwalanghǝu. 6 "Yo nǝhi piyarɗufy ku hǝ'i nda, hyo nau piya ku piyarɗufu a lǝvǝr da wa. Yo gǝlǝnda kum taku i aku hǝ'i kǝhi, ya yo kanda hi tsa njir dawa kǝhi i. 7 Hyo gǝdlǝ njir dawa kǝhi, hyo tsǝya nda na balmi kǝhi. 8 Nji tufu ku huɗa hi kwa gǝdlǝ nji gharu, ya gharu ku pama hi kwa gǝdlǝ nji gharu gharu kumnyi! Dǝhǝ njir dawa kǝhi kwa dla sǝya da kiɗa balmi kǝhi. 9 "Yo ndzamǝ hi na kwambiya, yo mǝrtǝ hi hya yah, hya ɗa ɗang gagaɗa. Ya nyabiya mbandǝr ɗa ka hi. 10 Zhar fa kǝhi kwa ɗa 'ual nda ma'a hyo fa'abiya fafanya sǝ zwazwa kǝhi ka hya uya mbwar fiya taɗǝnya zhar nǝ fa kǝhi. 11 Yo ngyata ɗa ku pama hi, ya a da yo hǝyatǝ hi wa. 12 Yo ma'i ku pama hi; yo ɗa ka Hyel kǝ hi, ya hyo ɗa ka na'ana nji. 13 Naya ngǝ Hyel Tlakǝn hi nda fa'abiya hi vu hǝ'i Masar, atsa hya da ba'a ngya ku mavarkur kǝnda. Ya ɓǝlnda gang nǝ mavakur nda da wulea hi, ngǝ mǝrtǝ hi hya ma'i tandarǝu.Nǝuma tǝkǝra tari kǝriwakur
14 "Kǝl ja, ma hya ngyar ngatǝ ɗa, ya ngǝ hya ngyar nǝu tsaubar ɗa ina, 15 ǝtsǝu ngǝ hya ngyar gadlagadala ɗa ina, ga hǝyatǝ tsaubar ɗa i, ngǝ a da hya mǝr sǝnda gadlagadla ɗa tǝ na wa, ngǝ hya ɓǝlnda mbandǝr ɗa, 16 janǝ nǝuma nda yo mǝrtǝ hi: Yo sǝtǝ hi mwandǝzhi nda kwa shili na lǝvǝra, ana shilǝkǝ pampamǝu, ana shilǝkǝ tsǝkuhǝu nda kwa sǝwandǝ lea hi, cho mǝrtǝ hi hya kwa nguvi. Ya ɓwa'atanyi hyo tlǝka, aka njir dawa kǝ hi ngǝ kwa shili sǝmanya. 17 Yo mǝr dawa na hi, ya njir dawa kǝ hi kwa shili kurahi na pah. Nji inda kǝla kwa i hi kwa shili mǝr tǝlkur tǝkǝra hi. Hyo tǝra na hwi, ya a vanya ndǝ da kwa gǝdlǝ hi wa. 18 "Kǝl nda macha dǝhǝ ka ǝnga, hya ngyar ɗa kǝriwa na'a, yau, yo tsakǝ tǝ hi ɓwaɓwatǝ zhaka mǝɗǝfa. 19 Yo tashiya hǝ kǝr kǝhi nga, yo katǝ hi par, hǝ'i ngǝ hyo zwatǝ ngǝ tsǝu kwa ula, kwa ɗa ɓaɓal wi ngǝ tǝ leyang. 20 Dǝhǝ ɓwaɓwatǝr tlǝr kǝhi kwa ɗa sǝ ɓwa'atanyi, aka hǝ'i kǝhi da kwa biyandǝ zhar wa, ya tsǝu wu nda ku hǝ'i kǝ hi da kwa yah wa. 21 "Macha ba'a ka saka nga hyo mǝr dawa naya, ya a da ya ɗa kǝriwa na'a wa, yau, yo tsakǝ tǝ hi mwandǝzhi zhaka mǝɗǝfa aka bikǝ kǝhi. 22 Yo sǝtǝ kum taku inda kwa tsǝya ngulisha'a kǝhi, ana nda kwa tsǝya tla kǝhi, tsaka ɗangkura kwa hǝyadza, a tsǝu njo la'a nji tǝkǝra laku kǝ hi wa. 23 "Macha dǝhǝ ka ǝnga, a da hya dlǝukri hya ɓatlǝ ngya kǝhi wa, kǝl nda hya ma'i biyama na mǝr dawa naya, 24 naya tǝkǝr ɗa yo mǝr dawa na hi, ya yo sǝtǝ hi mwandǝzhi zaka mǝɗǝfa aka sǝpǝla'a kǝhi. 25 Yo shili na katsakǝr tǝkara hi, aka ɗa kibiya ɗa sukur, aka hya ɓǝlnda mbandǝr alkawal. 26 Yo tlanda lakur uya gwazhilakǝu kǝhi, kǝl mahi'i kumma tǝ tsa gwazhilakǝu nǝhi ku zǝgǝtǝ zhang, ndo tǝkǝya hi nǝ sǝr dǝkǝ tǝdǝɓǝkur. Hyo sǝma, ya a da hya kwa nyiwa. 27 "Macha ahir sǝ ingǝ dǝhǝ a da hya sǝ himi da ya wa, hya ma'i biyama na mǝr dawa naya, 28 aku huɗǝtla, naya na kǝrɗa kwa mǝr dawa nahi zhaka mǝɗǝfa ndiya matsa nda haɗa aka sǝpǝla'a kǝhi. 29 Hyo ɗǝ kumǝr ngulisha'a shili kǝhi ana ku'i kǝhi aka chul huɓu nda kwa ɗa. 30 Yo dlǝdlǝnda mbwar hǝsǝli kǝ hi inda kyatǝ dǝgǝl, yo sǝwandǝ dzǝgana nǝ murdi kǝhi, ya pǝnda daɓar dzahi kyatǝ kǝra katǝ kǝhi ingǝ kǝra pi nga. Naya ya kwa hǝɗǝ tsa hi. 31 Yo zhazhandǝ na mǝlǝm kǝhi ndo ɗa ka huɗǝfi, ya sǝwandǝ mbwar hǝsǝli kǝhi, ya a da yo tlatǝ shu'uni murdi kǝhi i wa. 32 Yo sǝwandǝ hǝ'i kǝhi, nda ma ndǝr njir dawa kǝhi tǝ shili aka nda ngya kwa nda mǝr mǝngǝl. 33 Yo wiɗǝnda hi ku pama jul nji, ya yo tsǝbiya katsakǝr ɗa yo gǝdlǝ hi ni.Yo mǝrtǝ hǝ'i kǝhi cha ɗa ka huɗǝfi, mǝlǝm kǝhi tsǝu ɗa zhazha. 34 Saka ngǝ ja, hǝ'i kǝhi kwa uya ɓǝlsar mǝɗakǝu aku biji ngǝ cha ɗa ka mbwar ki tanyi, ɓǝlsar nda hya ngyar nǝnyi nda.. Saka nda hya kyatǝ hǝ'i nji dawa kǝhi, hǝ'i kǝhi kwa uya ɓǝlsar nyi. 35 Ma hǝ'i ngǝ wur ɗa ka mbwar ki tanyi, cho uya ɓǝlsar da a cha ta uya sakanda hi na ngya kwa wa. 36 "Kǝl ja, nahi nda hǝyadza ku hǝ'i njir dawa kǝhi, yo fǝu hi lǝvǝra, nda ma heli kwa tlǝnda lǝmba hi, hya tǝra hwi wi nji inda njo nǝu hinǝnda na katsakǝr. Hyo dlǝdla sǝya hu'i mada ngǝ nji do nǝu hinǝ hi wa. 37 Hyo dlǝdla sǝya tǝ kǝr nǝ hi wi nji nda kwa hwi tsa katsakǝr, mada ngǝ ndǝ da kwa gǝdlǝnda wa. Aka ǝnga, a da hyo uya dunamar ta'i ka njir dawa kǝhi wa. 38 A tǝ bata, hyo kuɗa aku pama jul nji, hǝ'i njir dawa kǝhi kwa shili kwasanya hi. 39 Nji nda hǝyadzǝ ku huɗa hi, nda kwa kuɗǝ sammǝu, ǝngǝ hyo nda satǝ hǝ'i njir dawa kǝhi aka bikǝ kǝhi ana bikǝr ajinǝ hi. 40 "Kǝl ja, macha ndo dǝkǝbiya sǝpǝla'a kǝnda ana nǝ jival kǝnda, ana tari jirikur na'a, ana dawakur kǝnda na'a, 41 nda mǝrtǝ ɗa ya ɗa na dawakur nǝnda, nda gwa'atǝ ya sǝtǝ nda kyatǝ hǝ'i ndǝr dwa kǝnda, ma hya tashiya ɗufu kǝla tlabǝndzang nga, ngǝ hya kǝnda mǝl sǝpǝla'a kǝhi nga, 42 Yo ɗunghatǝ alkwal ɗa na Yakubu ana alkwal ɗa na Ishaku, ana alkawal ɗa Ibrahim, yo ɗǝnghatǝ na hǝ'i nga. 43 Kǝl ja, njo ngyar hǝ'i nga ngatǝ mǝsɗakǝkur ɓulsar aku dǝhǝ biji nda cha kwa ngya wi ngǝ mbwar ki. Ya hyo dlǝutsǝ nǝuma nǝ bikǝ kǝhi aka hya hǝyatǝ tsaubar ɗa, ya ǝtsǝu ya ngyar gadlagadla ɗa . 44 "Dǝhǝ ka ǝnga sakanda hi ku hǝ'i njir dawa kǝhi, a da ya kwa ngya hi wa, ndara ya hǝɗǝ tsahi, nda ma yo zhazhanda hi ka zhang, ya ɓǝlnda alkawal ɗa kǝ'i hi wa, aka naya ngǝu Hyel Tlakǝn hi. 45 Kǝl ja, aka na hi, yo ɗǝnghatǝ alkawal ɗa da ya mǝra ana jival kǝhi inda ya fa'abiya vu Masar atǝ lea jul nji, aka ya ɗa ka Hyel kǝnda. Naya ngǝ Tlakǝu." 46 Ingǝ ngǝ gadlagadla, ana tsaubar i, ana dlǝdlǝɓǝ nda Tlakǝu tǝ mǝr aku pama cha ana nji nyi Israila tǝwa Musa a kyatǝ Dǝgalǝr Dǝgǝl Sinai.