Mal Zaitun ana Gwazhilakə nda Njo Fiya Mar Tlakəu
24
1 Tlakǝ tǝ ɓwanya na Musa bǝra, 2 "Cha natǝ nyi nǝ njir Isarila ǝnda nda shili na nyi mal zaitun tsamunyi nda nja ɗabiya aka chakai, tsaka nja uya chakai mbǝla wa'atanyi. 3 Haruna kwa fiya chakai nda tǝ Mbwanda Ndiya na Karti a biyamar miɗi dǝgal nda nja tabiya Gwarara mbandǝr nda ku Madlǝɓa Tsǝmǝdza. Haruna kwa tsamartǝ chakai ngǝ mar Tlakǝu, ghǝya akǝu ba'a nǝ wurvi. Nacha nga tsabaur nga ghǝya sakana ba'anǝ jival kǝhi. 4 Haruna ngǝ kwa tsǝmar chakai nga tǝ zuwa bingha nga mar Tlakǝ nga aka cha ngǝɗa.Gwazhilakǝ nda nǝnyi nǝ Hyel Tlakǝu
5 Hǝtǝ ǝpu nda kuɓǝtǝu nja mǝrtǝ gwazhilakǝ matakwara kwabumǝtlǝ ni. Tǝdǝɓǝkur kala takwara kwa ɗa ǝpu kilo mǝtlǝu. 6 Go tǝwu nda ku ghahi mǝtlǝu, kala ghahi takwara kwah a kyatǝ dalagi fǝtǝfǝtǝ na bǝjingha nda mar Tlakǝ nda. 7 Go pǝu mordi aku kala ghahi, cha ɗa ka hatǝmachi da nja lǝnda na hu'u a nǝ Tlakǝu tǝvǝra gwazhilakǝu. 8 Kala Pǝchir Ɓǝlsar Asabat, ǝngǝ Fǝrist kwa ɓatliya gwazhilakǝ amar Tlakǝu tǝnyar njir Israila. Nacha ngǝ tlǝr njir Israila ba'anawa. 9 Ngǝna gwazhilakǝ kwa ɗa ka mbaɗǝ Haruna ana ngulisha'a shili nyi. Ndo kwasǝ tǝ vanya mbwa nda karti, aka ngǝna mbaɗǝ ana karti cha gagaɗa ku huɗa sǝr hatǝmachi nda nja lǝnda na hu'u nǝ Tlakǝu. Nacha nga tsaubar cha nda ba'anawa.
Gadlagadla tǝkǝra la'a sǝlir Hyel ana sǝnda cha ɓatla
10 Vanya ndǝ nda, nda amanyi kwar Israila adanyi tsǝu ndǝr Masra cha, ngǝ cha pah na vanya ndǝr Israila ku ngakǝ nda. 11 Kǝl ngǝ zǝr mala Israila nda tǝ hǝyatǝ Tlǝmǝr Tlakǝ tǝwa ngǝla. Kǝl ngǝ shili na cha da Musa. Tlǝmǝr amanyi Shelomit kwar Dibri nyandǝla Dan. 12 Ngǝ nja funyi ku jarum tǝ vanya vi, kǝl sakanda Tlakǝ tǝ nar sǝnda njo mǝr na cha. 13 Kǝl ngǝ Tlakǝ tǝ ndǝr na Musa bǝra, 14 "Hǝbiya ndǝ ngǝ biyahir ngakǝu. Ka nar nyi nǝ dǝhǝ nji inda ngatǝ nyi nda fǝtǝ cha nda kyo kǝra cha. Ahir nga nja nar nyi nǝ dǝhǝ nji nda vǝvakǝnda nyi mungu. 15 Ahir nga, kǝl ba tsǝmǝtǝ njir Israila ka nar nda bǝra dǝhǝ nda hǝyatǝ Hyel, bikǝr sǝpǝla'a nyi tǝkǝra cha sǝnyi. 16 Ətsǝu dǝhǝ ndǝ nda hǝyatǝ Tlǝmǝr Tlakǝu, njo tsǝya nyi. Dǝhǝkura nji kwa vakǝnda nyi, mada mihiɓi cha, ndara ndǝr Israila. Sakanda ndǝ tǝ hǝyatǝ Tlǝmǝr Tlakǝu, njo tsǝya nyi. 17 "Dǝhǝ ndǝ nda tǝ tsǝya ndǝ njo tsǝya nyi. 18 Dǝhǝ ndǝ tsǝya sǝr shishi vanya ndǝu, cho kinda na vanya sǝr shishi tǝvira nda cha tsǝya nda. Gadlagadla nga, pi tǝvǝra pi. 19 "Dǝhǝ ndǝ takasǝya vanya ndǝu, mada chul ngǝ takasǝ man cha mǝrtǝ nyi,nacha ma'a ǝngǝ njo mǝrtǝ nyi. 20 Macha cha ɓǝlǝu ɗǝhi nyi, na cha ma'a njo ɓǝlǝu nǝnyi na ɗǝhi. Macha cha chakǝubiya lea vanya ndǝu, na cha ma'a nji chakǝubiya lea cha. Macha badlǝbiya hira vanya ndǝu, na cha ma'a njo badlǝbiya hira cha. Chul takasǝu nda cha mǝrtǝnyi vanya ndǝu, ǝngǝ njo mǝrtǝ nyi. 21 Dǝhǝ ndǝ nda tsǝya sǝr shishi, cho kya, ana vanyi. Kǝl ja, dǝhǝ ndǝ nda tsǝya ndǝu, njo tsǝya nyi kǝrnyi. 22 Tsaubar zhang tanyi nga, ǝngǝ kwa ɗa na mihiɓi ana ndǝr Israila, aka naya Hyel Tlakǝu nga. 23 Ahir Musa tǝ dǝkǝnda dǝhǝ tsaubar inǝ nǝ njir Israila, kǝl ngǝ hǝtǝ ndǝ nda hǝyatǝ Hyel nda biyahir ngakǝu, ǝngǝ nja vǝvakǝnda nyi mangu cha tah. Ngǝ njir Israila tǝ mǝr wi nda Tlakǝu tǝ nar nyi nǝ Musa.