Ladər Pampam i'i
23
1 Tlakǝ tǝ nar nyi nǝ Musa, 2 "Ndǝr na njir Israila ka nar nda: 'Janǝ ladǝr nǝ Tlakǝ inda nja ɓatliya. Nda njo bǝzǝya wi daɓǝdzǝ nǝ karti i.Ladǝr nǝ pǝchir ɓǝlsar nǝ Asabat
3 "Hanyi kwah hyo mǝr tlǝr kǝ hi, kǝl ja, pishir hanyi mǝɗǝfǝkunyi Asabat nga nǝ ɓǝlsar, pǝchi nga nǝ tsamǝtsǝ nda karti. A da hyo mǝr tlǝr pishi nda mada kushu tǝ dǝhǝ mbwanda hi tǝ wa, aka pǝchir ɓǝlsar Asabat nga, nda nja dzǝvǝya nǝ Tlakǝu.
Ladǝr nǝ dlǝgǝlnda ana gwazhilakǝ kǝla tlǝlam
4 "Janǝ ladǝr nǝ Tlakǝ inda nja ɓatliya. Njo bǝzǝya aka njir Israila ɓǝlatǝ kala ladǝr, tǝwa tsǝmǝdzǝ nda karti, nda njo mǝra aku bijir ladǝr nǝ hǝsǝli nda nja ɓatliya. 5 Pishir hanyi kwabufwaɗǝ nǝ tangǝrmar hya aba'akǝu, njo ghǝya ladǝr nǝ dlǝgǝlnda anǝ Tlakǝu. 6 Pishir hanyi kwabutufu nǝ hyanda, njo mǝr ladǝr nǝ gwazhilakǝ kǝla tlǝlam nǝ Tlakǝu. Hanyi mǝɗǝfa hyo mǝrtǝ hyo sǝm gwazhilakǝ kǝla tlǝlam. 7 Pishir hanyi tangǝrma nǝ ladǝr nda, hya tsǝmǝdzǝ nda karti aka hǝsǝli. A da hyo mǝr tlǝr nda hi tsǝl na mǝr wa. 8 Kǝl ja, hyo lǝtǝ sǝr hatǝmachi kǝ hi nda nja lǝnda na hu'u nǝ Tlakǝ nǝ hanyi mǝɗǝfa. Pishir hanyi mǝɗǝfǝkunyi njo tsǝmdza nda karti aka hǝsǝli. A da hyo mǝr nda hi tsǝl mǝr pishinda wa."
Ladǝr nǝ tangǝrmar nǝnǝnya yayar sǝ zwazwa
9 Tlakǝ tǝ ndǝr na Musa bǝra 10 cha dǝkǝtǝ nyi nǝ njir Israila inna gadlagadla. "Sakanda hi gwa ku hǝ'i nǝ yo nǝ hi na, ma hya mǝriya fa kǝ hi, kǝl hya hǝtǝ dǝmadǝma zhang ku tangǝrmar nǝnǝnya yayar sǝ zwazwa nda ghǝya mǝriya, hya na nyi nǝ fǝrist. 11 Fǝrist nda tsǝu cho hǝtǝ shi huɗamǝllǝm amar Tlakǝu, aka sǝr hatǝmachi, tsaka nja dlǝutsǝ hi. Vanya zǝkǝu ahir Pǝchir Ɓǝlsar nǝ Asabat, fǝrist kwa lǝnda nyi. 12 Pishir nja lǝnda dǝmadǝma ka sǝr hatǝmachi nǝ hatǝ, njo shili na zǝr gam fa zhang nda kǝla tekǝm aka hatǝmachi nǝ nginda a mar Tlakǝu. 13 Tsa'a na zǝr gam nda, hyo lǝtǝ sǝr hatǝmachi sǝ zwazwa nǝ kilo mǝtlǝ nǝ ǝpu nda kuɓǝtǝ nda nja zǝukutǝ na mal zaitun, hatǝmachi nda nja lǝtǝ nga anǝ Tlakǝu, nda kwa shu'ini kwitkwitǝ anǝnyi. Tsa'a ingǝ tsǝu, hyo shili na sǝr hatǝmachi nǝ sasa, lita zhang nǝ ɓitir anaɓ. 14 A da hyo sǝm gwazhilakǝ nda nja mǝr na taɗǝr sǝ zwazwa, ndara sǝ zwazwa nda nja tsaku, ndara taɗǝr sǝ zwazwa nda katlau wa, kǝl pishinda hya shili ni hatǝmachi nǝ tangǝrmar nǝnǝnya yayar sǝ zwazwa nǝ Hyel kǝhi. Nacha nga, gadlagadla ngǝ nǝ ba'anawa, a nǝ hi tǝ dǝhǝ mbwanda hi na ngyati, ghǝya tang na ba'a nǝ jival kǝ hi.
Ladǝr nǝ suku i'i (Maki-Mǝdzǝu:Kulnyi-Dzǝvǝmma:fǝrist)
15 " Ghǝya vanya zǝkǝu nǝ Pichir Ɓǝlasar Asabat, Fwatǝ pichinda hya shili na dǝmadǝma aka hatǝmachi nǝ hatǝ shi huɗamǝllǝm nda, hya jigatsǝ suku mǝɗǝfa. 16 Pichir Ɓǝlsar Asabat nǝ mǝɗǝfǝkunyi, ahir hanyi tufukumnyi ngani, kǝl hya lǝtǝ vanya hatǝmachi nǝ taɗǝr sǝ zwazwa nǝ Tlakǝu. 17 Hya'atǝ ku ki kǝhi, hyo shili na gwazhilakǝ mǝtlǝ hya lǝtǝ nyi ka sǝr hatǝmachi nǝ hatǝ anǝ Tlakǝu. Kala takwara nǝu gwazhilakǝu njo mǝr nyi na kilo mǝtlǝu nǝ ǝpu kuɓǝtǝ nda nja mǝr na tlǝlam, ba nja lǝnda nyi ka sǝr hatǝmachi nǝ tangǝrmar nǝnǝnya sǝ zwazwa anǝ Tlakǝu. 18 Tsa'a na gwazhilakǝ nda, hyo lǝnda nguli gam mǝɗǝfa nda na fa kǝnda zhang zhang ya kǝla tekǝm, ana zǝr gyal tla, ana gam mǝtlǝu. Hyo lǝnda nda aka sǝr hatǝmachi nǝ nginda nǝ Tlakǝu tsa'a na hatǝmachi kǝhi nǝ sǝ zwazwa ana sǝ sasa, hatǝmachi nda nja lǝnda nga na hu'u anǝ Tlakǝu, nda kwa shu'ni kwitkwitǝ anǝ nyi. 19 Ətsǝu, hyo lǝtǝ bura zhang aka sǝr hatǝmachi nǝ chinda sǝpǝla'a , ana nguli gam mǝtlǝ nǝ fa zhang zhang aka sǝr hatǝmaci nǝ ɓatlǝ ngya mǝnakǝu. 20 Fǝrist kwa har shi huɗamǝllǝm nguli gam mǝtlǝ inda, ana gwazhilakǝ nǝ tangǝrmar nǝnǝnya yayar sǝ zwazwa ka hatǝmachi nǝ hatǝ a mar Tlakǝu. Ndo ɗa na karti nǝ Tlakǝu, mbaɗǝ nǝ Fǝrist nga. 21 Pishinda njo bǝzǝya ǝnda pǝchir tsǝmdzǝ nda karti nga anǝ hi. A da hyo mǝrtlǝr nda hi tsǝl na mǝr wa. Nacha nga, gadlagadla nga nda ba'anawa a tǝ dǝhǝ mbwanda tǝ hya tǝ na ngya, ghǝya ǝnya ka ba'a nǝ ɓulkǝr jival kǝhi. 22 "sakanda hyo mǝr tlǝr fa nǝ hǝ'i kǝhi, ngwa hya da mǝr dǝhǝ ka nya fa nya kǝhi wa, ngwa hya da ba sha yahi hyo vaɗǝ ahir a wur to hi wuranda tlǝr fa wa.
Ladǝr nǝ mbǝɗǝ papam
23 Tlakǝ tǝ ɓwanya na Musa bǝra, 24 cha dǝkǝr nyi nǝ njir Israila gadlagadla ina."Pishir hanyi tangǝrma nǝ hya mǝɗǝfa, hya ɓǝlatǝ pǝchir ɓǝlsar nǝ pa'anyi, pǝchi cha nǝ ɗǝnghatǝ na Hyel kǝhi. Njo daɓǝdzǝ nda karti ka hǝsǝli, nda njo ghǝya na mbǝɗǝ papam i. 25 A da hyo mǝr tlǝr nda hi tsǝl na mǝr pishinda wa. Hyo hatǝmachi nda nja lǝnda na hu'u anǝ Tlakǝu.
Pǝchir mǝr mirga
26 Ngǝ Tlakǝ nar nyi nǝ Musa, 27 Ka ɗǝnghatǝ Pǝchir Mirga, njo mǝr nyi pishir hanyi kuma nǝ hya mǝɗǝfa ahir ladǝr nǝ mbǝɗǝ papam. Pishinda hyo tashiya kǝr nǝhi tǝwa sǝmdzǝn, tsǝmdzǝ kǝhi kwa ɗa nǝ karti, hyo lǝu sǝr hatǝmachi kǝhi na hu'u nǝ Tlakǝu. 28 A da hyo mǝr tlǝr pishin da wa, aka pǝchir mirga nga, nda njo mǝr mira aka hi amar Hyel Tlakǝn hi. 29 Dǝhǝ ndǝ nda kǝla tǝ sǝmdzǝn njo hǝbiya nyi ku pama nji nyi ba tsǝya nyi. 30 Dǝhǝ ndǝ nda tǝ mǝr tlǝr ppishinda, Naya Tlakǝ kwa tsǝya ni. 31 A da hyo mǝr mada kushu wa. Nacha nga gadlagadla nga nda ba'anawa atǝ dǝhǝ mbwanda tǝ hya tǝ na ngya, ghǝya ǝnya ba'a nǝ ɓǝlǝr jival kǝhi. 32 Pichir Ɓǝlsar nǝ Asabat nga nǝhi, ya pishinda tuku hyo sǝmdzǝn. Bijir ɓǝlsar ana sǝmdzǝ ngo ghǝya aba akǝu tǝvi Pǝchi Mirga, ba'a nǝ tǝɗǝr pǝchi nǝ vanya zǝkǝu,
Ladǝr nǝ Madlǝɓa i'i
33 Tlakǝ nar nyi nǝ Musa, 34 "Cha ndǝrna njir Israila: 'Pishir Hanyi tufu nǝ hya mǝɗǝfa njo ghǝya Ladǝr nǝ Madlǝɓa aka Tlakǝu, nja mǝr nyi hanyi mǝɗǝfa. 35 Njo ghǝya tsǝmdzǝ nda karti pǝshir hanyi tangǝrma. Pishnda tsǝu a da hyo mǝr tlǝr nda hya tsǝl nǝ wa. 36 A ku hanyi mǝɗǝfa nga hoy hatǝmachi nda njo lǝu na hu'u nǝ Tlakǝu. Pishi hanyi chisǝkunyi hyo tsǝmǝdzǝ nda karti, hyo hatǝmachi nda njo lǝu hu'u nǝ Tlakǝu. Nacha ngo ɗa tsǝmǝdzǝ nda karti, a da hyo mǝr tlǝr nda hi tsǝl na mǝr wa. 37 "Ingǝ ladǝr nǝ Tlakǝ nda nja ɓatliya. Hyo mǝr ngǝna ladǝr hǝsǝli tǝwa tsǝmǝdzǝ nda karti, aka hya hatǝmachi kǝhi nda nja lǝnda na hu'u anǝ Tlakǝu, hatǝmachi nǝ nginda, nǝ sǝ zwazwa, ana nǝ sasa. Njo lǝtǝ sǝr hatǝmaci tǝ kala biji nyi. 38 Ngǝna ladǝr i tsakǝ nga tǝkǝra pǝchir Ɓǝlsar nǝ Asabat nda nja ɓatliya ka Tlakǝu. Ngǝna hatǝmaci i tsǝu tsakǝ nga tǝkǝra ga'a kǝhi i, ana tǝkǝra hatǝmachi kǝhi nǝ nyabiya sǝmfǝla, ana tǝkǝra ga'a kǝ hi i nǝ hirgyaɗi nda hyo maka nǝnyi nǝ Tlakǝu. 39 "Pishir hanyi kwabutufu nǝ hya mǝɗǝfa, biji nda hya tsǝmǝtǝ zhar hǝ'i kǝ hi, kǝl hya ɓǝlatǝ nǝn na ladǝr Tlakǝ n hanyi mǝɗǝfa. Pishir hanyi tangǝrma ana tsǝu pishir hanyi chisǝkunyi nǝ ladǝr nda, hyo ɓǝliyasar. 40 Pishir hanyi tangǝrma hyo gwa'ari yayar wua, nǝ wu manǝkǝ i, ana cha wur debinau, ana cha wu nda na heli i ɗanghau, ana cha wu inda nya dlǝlǝm, hya kwa mǝr hirgyaɗi a mar Hyel Tlakǝn hi nǝ hanyi mǝɗǝfa. 41 Hya ɓǝlatǝ ladǝr nǝ hǝsǝli nǝ Tlakǝ nga hanyi mǝɗǝfa kala fa. Nacha nga gadlagadla nga nǝ ba'anawa anǝ hi ghǝya sakana ba'a nǝ jival kǝhi. 42 A ku hanyi mǝɗǝfa nǝ ladǝr nga, dǝhǝ nji nda ɗa ka ngulisha'a Israila kwa ngya ku Madlǝɓa i. 43 Tǝwa ǝnga, nyadǝla nda hi kwa shili kwa zǝndǝ ǝnda ya fǝu Isarila nda ngya aku Madlǝɓa ku biji nda ya fa'abiya nda vu Masar. Naya Hyel Tlakǝ nǝ hi nga. 44 Əngǝ Musa tǝ nǝnyi tsaubar ingǝ nǝ njir Israila ngǝna ladǝr nǝ Tlakǝu nda nja ɓatliya.