22
1 Ngǝ Tlakǝ tǝ nar nyi nǝ Musa,2 cha nar nyi nǝ Haruna ana ngulisha'a shili nyi nǝnna gadlagadla i. "Hya la'a sǝlir ga'a ingǝ na karti nga, ingǝ njir Israila kwa maka ɗǝmtsi na karti a na'a, a tsa nda ɗa ba tashiya Tlǝmǝ ɗa nda karti. Naya ngǝ Tlakǝu.3 Ghǝya sakana ba'a nǝ ɓǝlkǝr jival kǝhi, ma vanya ndǝ a ku pama nya ndǝla fǝrist i tǝ ɗa hiɗahiɗa nyi ya ngǝ cha lǝhǝtǝ ga'a inǝ na karti ingǝ njir Israila tǝ ɗǝmtsi nǝ Tlakǝu nga, njo hǝbiya ku zǝba a maɗa. Naya Tlakǝ nga.4 "Macha vanya ndǝ da ku nyandǝla Haruna nda na shilǝkǝ bibi ndara sǝ kwa dzǝ dzǝnyi kusarkusar, a cho kwasǝ ga'a ingǝ na karti ngǝ wa, kǝl sakanda cha chinda kǝrnyi. Ətsǝu ma fǝrist tǝ tsǝkar vanya sǝnda hiɗahiɗa aka cha baɓǝr dza ndǝ, ndara tsǝu pǝ tǝ biya ku fǝrist nda,5 ndara tsǝu cha tsǝkar vanya sǝ pipi nda kwa tǝɗǝ na ta, nda gwa'atǝ cha ɗa hiɗahiɗa, ndara chul ndǝ nda gwa'atǝ cha ɗa hiɗahiɗa, ndara mada chul hiɗahiɗakur man cha ni, yau, fǝrist kwa ɗa hiɗahiɗa.6 Dǝhǝ ndǝ nda tǝ tsǝkar chul ngǝna sǝ'i, cho ɗa hiɗahiɗa ba'a nǝ akǝu, ya a cho nau kwasǝ ku ga'a ingǝ na karti ngǝ wa kǝl nda ahir macha waɗǝ na ɓiti.7 Kǝl ja, ahir ma pǝchi tǝ tǝɗa, cho ɗa karti. Aku biji ngǝ cho nau sǝm sǝ ku huɗa ga'a ingǝ na karti nga, aka sǝursum nyi inga.8 A cho ɗǝ sǝr shishi nda tǝ tǝ sǝnyi ndara kum takǝu tǝ tsǝya wa. Nacha ngǝ kwa gwa'atǝ cho ɗa hiɗahiɗa. Naya ngǝ Tlakǝu.9 "Dǝhǝ fǝrist nda ɓǝlatǝ tsaubar ɗa, atsa nda da ba tǝɗǝkǝnyi sǝpǝla'a nǝ kǝr nǝnda nda kuɗǝ tǝwa ɓǝlnda gadlagadla ɗa inǝna karti na. Naya ngǝ Tlakǝ nda dzǝvǝya nda na karttikur.10 "Ndǝ nda da ku nya ndǝl fǝrist wa, a cho sǝm ga'a nigǝ na karti ngǝ wa. Mihiɓi nda na ngya ku ki fǝrist, ndara ndǝ nda kwa mǝr tlǝr nǝ fǝrist, a cho sǝm ku ga'a ingǝ na karti ingnǝ wa.11 Kǝl ja, ma fǝrist tǝ ɗǝlbiya mava na kwaba nyi, mava nda kwa nau sǝm ku sǝursum nda. Ndǝ nda tsǝu nja yah nyi ku ki fǝrist, cho nau sǝm sǝursum nga.12 Ma cha kwar fǝrist nda cha yah, tǝ hǝdzǝ na nda ndǝ nda da fǝrist wa, a da kwanda ndo sǝm ga'a nǝ karti ingǝ wa.13 Kǝl nda ma sal kwar fǝrist nda tǝ tah, ndara kwar fǝrist nda ta tǝkǝ na sal, ya a zǝr da tsa cha wa, ya ngǝ cha ɓǝl yo ki adanyi wi nda cha ɗaka ɗa tǝvi cha ɗǝuwa, yau, cho nau sǝm sǝursum adanyi. Kǝl ja, a vanya ndǝ da, nda nji ka cha sǝm sǝursum ingǝ wa, kǝl nda njinda ku nya ndǝla fǝrist.14 "Macha vanya ndǝ da nda tǝ sǝm ga'a nǝ karti inga ku tar zǝndǝ, kǝl ba cha ɓǝlndǝ nyi sǝnda nǝ fǝrist, cho tsakǝtǝ zhakǝ mǝtlǝ ku kuma tǝkǝra sǝnda.15 Ngwa fǝrist da mǝrtǝ ga'a ingǝ na karti njir Israila kwa shili ni a mar Tlakǝ ngǝ hiɗahiɗa,16 a tǝwa ngyar ndǝ nda pa da fǝrist cha sǝm ku ga'a nǝ karti wa.Nacha ngǝ kwa tǝɗǝkǝnyi bikǝu nǝ ndǝ ndǝnyi nda kwa shili na nǝuma. Naya ngǝ Tlakǝu nda dzǝvǝya nda na karti." Sǝr shishi inda tǝ ki aka hatǝmach17 Tǝma ngǝ Tlakǝ tǝ nar nyi nǝ Musa, bǝra18 "cha natǝ nyi nǝ Haruna ana ngulisha'a nyi, ana dǝhǝ njir Israila nǝna gadlagadla i. "Kwa nau ɗa ndǝr Israila ndara mihiɓi nda na ngya a ku pama nda cho i cha lǝnda sǝr hatǝmachi nǝ nginda anǝ Tlakǝ aka cha nyabiya vanya sǝmfǝla nda cha mǝra ndara tsǝu aka mǝr ga'a nǝ hirgyaɗi nǝ Tlakǝu.19 Ma cha cho i hatǝmachi nyi cha ɗa ka sǝr dlǝutsi, kǝl cha shili ni salsalnya sǝr shihi nda kǝla tekǝm, aku huɗa tla, ndara kǝtǝng, ndara ku shishi.20 Dǝhǝ sǝnda na tekǝm, a da njo lǝu ka sǝr hatǝmachi wa, aka a njo dlǝu ngǝna hatǝmachi wa.21 Dǝhǝ ndǝ nda lǝu sǝr hatǝmachi na ɓatlǝ ngya mǝnakǝ anǝ Tlakǝ aka cha nyabiya sǝmfǝlanyi, ndara ga'a nǝ hirgyaɗi aku huɗa tlanyi, ndara ku chaɓi kǝtǝng ndara kuwah, tuku sǝr shishi ngǝ cha ɗa mǝnakǝ a tekǝm da dzǝnyi wa aka cha ɗa ka sǝr dlǝutsi.22 A da njo nǝnyi nǝ Tlakǝu sǝr shishi nda wulǝfǝu, ndara nda ɓǝl dzǝnyi, ndara gadal, ndara kǝti, ndara mbǝlkǝɗimi dzǝnyi, ndara gadza wa, sakwata nja lǝnda nyi ka sǝr hatǝmachi nda nja lǝna ka nginda na hu'u a kyatǝ dzǝgana nǝ Tlakǝu wa.23 Gyal tla ndara kǝtǝng nda sǝnda dzǝnda da mǝlmǝl i ka alenyi wa, njo nau shili ka ga'a nǝ hirgyaɗi. Kǝl nda ma cha nja lǝnda ka sǝr hatǝmachi nǝ nyabiya sǝmfǝla nga, yau, a da njo dlǝu wa.24 "Dǝhǝ sǝr shishi nda nja fa'abiya shipilya cha, ndara nja tasǝya nda, ndara nja tiya, ndara nja tlanda, a da njo yi na nyi nǝ Tlakǝu wa.25 A da hyo dlǝu chul ngǝna sǝr shishi i ǝtsǝu a tsa mihiɓi ka hya lǝnda ka sǝr hatǝmachi sǝrsum nǝ Hyel kǝhi wa. Aka a da nda kina ɗaka sǝr hatǝmachi wa, aka kǝti ana tekǝm dzǝnda. A da nj dlǝu nda ka hi wa."26 Tlakǝ tsǝu tǝ ndǝr na Musa cha na,27 "Sakanda tla, ndara kǝtǝng, ndara kuah tǝ yah, njo ngyar nda ɗa hanyi makǝr na amanyi. Ghǝya tǝ pǝchir hanyi chisǝkunyi ana a biyama, njo dlǝutsǝ nyi cha ɗa ka sǝr hatǝmachi nǝ nginda hu'u nǝ Tlakǝu.28 A da njo tla wulew tǝkǝra amar kuah ana zǝr nyi pǝchi zhanghǝ wa, ndara amama nya tla, ndara kǝtǝng, ndara kuah.29 Ma njo lǝu sǝr hatǝmachi nǝ usaku nǝ Tlakǝu, Ko lǝtǝnyi a tǝwa lakunda cho ɗa ka sǝr dlǝutsǝ aka ka.30 Cha ɗa a ɗǝnyatǝ nji dǝhǝkura kum nda nja lǝnda aka tǝmachi pǝshi nda nja hatǝmachi nda. Ngwa nja da hya madami kǝl vanya zǝkǝ wa. Naya Tlakǝ nga.31 "Hya ɓǝlatǝ gadlagadla ɗa hya nǝubiya nda. Naya Tlakǝ nga.32 Ngwa hya da nǝnyi sǝr kuzhi nǝ Tlǝmǝ ɗa nda karti wa, Tuku hya ɓǝlatǝ Tlǝmǝ ɗa na karti, na hi njir Israila. Naya Tlakǝ nga. Naya nga tǝ dzǝvǝya hi na kartikur,33 ya hǝbiya hi vu hǝ'i Masar, aka ya ɗa ka Hyel kǝhi. Naya Tlakǝu nga."