Tsaubar inda Təkəra Pərist i'i
21
1 Tlakǝ tǝ ɓwanya nǝ bǝra cha nar nya nǝ fǝrist i, ngulisha'a shili nǝ Haruna bǝra, "Ngwa vanya ndǝ ku pama hi da mǝrtǝ kǝrnyi hiɗahiɗa nyi tǝwa tsǝkar baɓǝr ndǝ tǝtǝ nǝ njikǝnda wa, 2 Kǝl ndara baɓǝr ndǝ tǝtǝ nǝ zamǝnyi nda lǝhǝu, wi amanyi ndara adanyi, ndara zǝr nyi, ndara kwanyi, ndara zamǝyi, 3 ndara tsǝu kwamǝnyi nda na ngya ku kinyi, ya a da cha ta ɗǝu wa. Aka nda, cho nau mǝrtǝ kǝrnyi hiɗahiɗa nyi. 4 Kǝl ja, a da cho mǝrtǝ kǝrnyi hiɗahiɗa nyi, aka ngya mǝnakǝkur nǝ hǝndzǝ nda daɓiya nda ka njikǝ mala nyi wa. 5 "Ngwa fǝrist i da ba sǝ shishir kǝra nda wa, ndara nda mwatsǝu nda tǝngha nda, ndara nda tǝɗǝghǝ dzǝnda ka char huɗǝtla kǝnda wa. 6 Ndo ngya na karti nǝ Hyel kǝnda, ngwa nda ɗa mǝrtǝ Tlǝmǝr Hyel kǝnda hiɗahiɗanyi wa, aka nanda ngǝ njir lǝnda sǝr hatǝmachi nda nja lǝtǝ ka nginda na hu'u nǝ Tlakǝu, nda sǝrsum hyel kǝnda nga. Aka ǝnga ndo ngya na kart. 7 "Ngwa nda da hǝdzǝ na malanda kwa mǝr zawarkur wa, ndara malanda ɗa hiɗahiɗa nyi, ndara nda tǝkǝ na salnyi wa, aka fǝrist i ana karti nda anǝ Hyel kǝnda. 8 Aka ǝnga, nji kwa la'a fǝrist i ana karti, aka nanda ngǝ njir lǝtǝnyi sǝursum nǝ Hyel kǝnda. Nji kwa la'a nda na karti, aka naya Tlakǝ nga tǝ dzǝvǝya nda na kartikur, naya na Karti ya. 9 Ma kwar fǝrist tǝ mǝrtǝ kǝr nyi hiɗahiɗa nyi tǝwa zawarkur, a tashiya tǝ cha sǝlir adanyi ndani. Njo nginda nyi na hu'u cha tah. 10 " Fǝrist nda tǝ ɗa ka dǝngalǝr fǝrist ku pama zǝmǝnyi i, nda nja tabiya ga pǝunyi mal dzǝvǝ ku kǝra cha, nda tsǝu nja dzǝvǝya nyi na karti aka cha handzi lukutu i nǝ fǝrist, a cho ngyar shishir kǝra cha wazaɓarai wa, ndara cha tau lukutu nyi aka cha char huɗǝtla nyi wa. 11 A cho gwatǝ mbwanda baɓǝr ndza ndǝ tǝtǝ tǝ wa. A da cho mǝrtǝ kǝrnyi hiɗahiɗa nyi wa, ndara na baɓǝr tǝtǝr ndza amanyi wa, ndara mada nǝ adanyi cha. 12 A da cho mǝrtǝ kǝrnyi hiɗahiɗa nyi tǝwa biyatanyi ku Vi nda Ndiya na Karti aka cha go mbwanda baɓǝr dza ndǝ tǝtǝ tǝ wa, aka a wurtǝ nja dzǝvǝ nyi na mal nǝ Hyel ku kǝra cha. Naya Tlakǝ nga. 13 "Cho hǝdzǝ na kwamalakǝ nda pa'a ɗǝ ta zǝndǝ sal 14 A cho hǝdzǝ na mala nda salnyi tǝ tǝ wa, ndara mala nda tǝ tǝkǝ na salnyi, ndara tsǝu mala nda nja mǝrtǝ nyi hiɗahiɗa nyi, tǝwa zawarkur. Kǝl nda cho hǝ malakǝu nda pa'a tǝ ta zǝndǝ sal ku pama nji nyi, 15 a tsa cha da ba mǝrtǝ ngulisha'a nyi ndo nda kina ɗa karti hiɗahiɗa nyi, aka naya ngǝ Tlakǝu, ya ya dzǝvǝya nyi karti ka cha ɗa ka dǝgalǝr Fǝrist." 16 Tlakǝ tǝ ɓwanya na Musa abǝra, 17 cha natǝ nyi nǝ Haruna ǝnda, "Ghǝya ǝnya ba'a nǝ jivalngha, a vanya ndǝ nda ku nyadǝla ka nda na tekǝm nda njo ngyanyi cha lǝtǝnyi sǝursǝm nǝ Hyel nyi wa. 18 A ndǝ da nda na tekǝm kwa yi lǝhǝ dzǝr dzǝgana aka cha lǝnda sǝr hatǝmachi, ndara wulǝfǝu cha, ndara gadalǝu, ndara ndǝr kǝti ku huɗǝma, ndara ndǝ nda daɓar dza cha i da mǝlmǝl na alenyi wa, 19 ndara cha cha ɓǝlɓǝl nyi ndara a tǝ hi, 20 ndara ndǝr gyaɗi ku yi, ndara dǝnjing, ndara ndǝ nda lya ce sǝuwasǝuwa nyi, ndara ndǝr kǝti i, ndara ndǝr gadza, ndara ndǝ nda nja tlabiya michiu ni. 21 A vanya ndǝ nda ku nyadǝla Haruna fǝrist, nda na tekǝm dzǝnyi ndo ɗa lǝhǝ dzǝr dzǝgana, aka cha lǝnda sǝr hatǝmachi nǝ nginda na hu'u anǝ Tlakǝu wa. Manda cha na tekǝm dzǝnyi, a cho nau shili lǝhǝ dzǝr dzǝgana aka cha lǝtǝ nyi sǝursum nǝ Hyel nyi wa. 22 Cho nau sǝm sǝursǝm nda nja lǝnda ka Hyel nyi, sǝursum nda karti, ana nda ndiya na karti. 23 Kǝl ja, a cho ɗa lǝhǝ na dǝgalǝr miɗi na Mbwanda Ndiya Karti ndara dzǝgana wa, aka tekǝm dzǝnyi, a tsa cha da ba mǝrtǝ Mbwar Ngyaɗa Nda Karti hiɗahiɗa, ana dǝhǝ sǝnda kwa. Aka naya ngǝ Tlakǝ nda dzǝvǝya nda na karti." 24 Əngǝ tanyi tsǝu Musa tǝ nar nyi nǝ Haruna, ana ngulisha'a shili Haruna, ana ma'a dǝhǝkura njir Isarila.