Ənda Njo Ɓu Ndər Mər Səpəla'a
20
1 Tlakǝ tǝ ndǝr na Musa bǝra, 2 cha ɓǝla tsakǝtǝ nar nyi nǝ njir Israila, "Dǝhǝ ndǝ ku pama hi njir Israila, ndara mihiɓi nda na ngya ku pama hi, ndǝ nda tǝ lǝnda zhang ku pama ngulisha'a nyi ka sǝr hatǝmachi nǝ katǝ Molek ngǝ nga, njo tsǝya nyi. 3 Naya na kǝr ɗa kwa mǝr dawa na ndǝ ndǝnyi, yo hǝbiya nyi ku pama nji nyi, aka tǝwa lǝnda zhang ku pama ngulisha'a nyi anǝ katǝ Molek ngǝ nga, cha mǝrtǝ Mbwar ngya ɗa Nda Karti hiɗahiɗa nyi, ya tsǝu cha tashiya sǝlir Tlǝmǝ ɗa nda karti. 4 Macha tsǝu nǝ kǝhyawa nji aku hǝ'i nga tǝ la'a ya ngǝ nda da'atanda ku sakanda ndǝ nda kwa lǝnda zhang ku pama ngulisha'a nyi anǝ Molek, ya ngǝ a da nda tsǝya nyi wa, 5 naya na kǝrɗa yo mǝr dawa na cha ana dǝhǝ njir ki nyi. Yo hǝbiya nyi ku pama nji nyi, na cha, ana njir ki nyi, ana dǝhǝkura nji nda tǝ char ɗa tar jiri ga mǝr zawarkur tǝwa hǝsǝli nǝ Molek. 6 "Ma vanya ndǝ tǝ sha ga nǝu njir daɓǝkǝr na njikǝ mambǝl ndara mutiya, cha mǝr zawarkur nda, ya tari jirikur nda cha char ɗa. Yo mǝr dawa na ndǝ ndǝnyi ya yo hǝbiya nyi ku pama njinyi. 7 " Hya dzǝvǝtǝ kǝr nǝ hi na karti, hya ngya nji karti, aka naya ngǝ Hyel Tlakǝnǝ hi. 8 Hya ɓǝlatǝ gadlagadla ɗa, hya nǝubiya nda. Naya ngǝ Tlakǝ nda dzǝvǝya hi na Kartikur. 9 "Dǝhǝ ndǝ ngǝle adanyi ndara amanyi, njo tsǝya nyi, aka cha ngǝl adanyi ana amanyi. Lǝmar bikǝr mashiny kwa ngyatǝ tǝkǝra cha sǝnyi. 10 "Ma ndǝ nda tǝ mǝr kasalikur na mala tuwul nyi, dǝhǝkura nda mǝtlǝu, ndǝ nda ana mala nda, njo tsǝya nda. 11 "Ndǝ nda piya na mala adanyi, a tsahiya tǝ cha sǝlir adanyi ndani. Tsakya'a nda njo tsǝya nda. Bikǝr mashi kǝnda kwa ngyatǝ kǝr nda. 12 "Ma ndǝ nda piya na mala zǝr nyi, dǝhǝ mǝtlǝ nda njo tsǝya nda mǝr sǝ hiɗahiɗa. Bikǝr mashi kǝnda kwa ngyatǝ kǝra nda. 13 " Ma sal tǝ piya na sal wi ngǝ sal kwa piya na malakǝu, kya'akuranda mǝrtǝ sǝ hiɗahiɗa. Njo tsǝya nda. Bikǝr mashi kǝnda wa ngatǝ kǝranda. 14 "Ma sal tǝ piya na malakǝu ana amanya malanda, nacha nga sǝ kǝmangǝrkur ngǝ 'ual'ual. Dǝhǝ nda makǝr njo nginda nda ku hu'u, tsaka a kǝmangǝrkur da kwa ɗa ku pama hi wa. 15 " Ma sal tǝ piya na sǝr shishi, njo tsǝya nyi, ǝtsǝ njo tsǝya sǝr shishi nda. 16 "Ma malakǝu tǝ piya na sǝr shishi, njo tsǝya nyi, ya njo tsǝya sǝr shishi nda tsǝu. 17 "Ma ndǝ tǝ hǝdzǝ na kwamǝnyi, kwara adanyi, ndara kwara amanyi, ngǝ da piya sal ana mala, nacha ngǝ sǝr kuzhi nga. A mar nji njo hǝbiya nda ku pama njikǝnda, aka ndǝ nda tashiya tǝ sǝlir kwamǝnyi, lǝmar bikǝ ngyatǝ kǝra cha sǝnyi. 18 "Ma ndǝ tǝ piya na malakǝu ku biji nda cha kwa dǝkǝsǝu, yau, kya'akura nda njo hǝbiya nda ku pama njikǝnda, aka ɓǝlnda tǝ nda gadlagadla nǝ ngya ku kartikur. 19 "Ngwa ka da piya na kwamǝnya amngha, ndara kwamǝnya adanghǝ wa. Aka mǝr ǝnga kwa tashiya sǝli nyi. Bikǝr sǝpǝla'a na ngya cha tǝkǝra cha. 20 Ma ndǝ tǝ piya mala zamǝnya adanyi, a tashiya tǝ cha sǝlir zamǝnya adanyi ndani. Bikǝr sǝpǝla'a kǝnda ngyatǝ tǝkǝra nda, ndo tǝ kǝla yah. 21 Ma ndǝ tǝ piya na mala zamǝnyi, nacha ngǝ sǝr hǝɗǝ nga. Tashiya tǝ sǝlir zamǝnyi ndani. A da ndo yah pa'awa. 22 " Hya ɓǝlatǝ gadlagadla ɗa ana tsaubar ɗa, hya nǝubiya nda, atsa hǝ'i nda yo yi nahi kwa ka ngya kwa da ba chiɗǝkǝ nahi. 23 Ngwa hya da nǝu sǝr jival nya nji ingǝ ya gǝdlǝbiya aka hya gwa ku hǝ'i ngǝ wa. Aka nda mǝr chul ngǝna sǝ'ingǝ tǝ gwa'atǝ yo hǝɗǝ tsanda. 24 Kǝl ja, naya yo nar hi ǝnda hyo sǝma, ya hyo fa'abiya ki na hǝ'i kǝnda. Yo nǝhi, ya cho ɗa ka nǝ kǝhi, hǝ'i cha da kwa pǝnda 'ua ana mumwa, hǝ'i cha nda na sakǝnda. Naya ngǝ Hyel Tlakǝn hi, nda takǝbiya hi ka alenya jul nji. 25 Aka ǝnga, hya tǝkǝbiya pampamkur ndo pama sǝr shishi da hiɗahiɗa ana nda kǝla hiɗahiɗa nyi, eakǝ inda hiɗahiɗa ana nda kǝla hiɗahiɗa nyi. Ngwa hya da mǝrtǝ kǝr nǝhi hiɗahiɗa tǝwa sǝr shishi ndara eakǝ wa, ndara tǝwa vanyi sǝu nda kwa tǝɗǝna ta wa, sǝ'inda ya takǝbiya nda nda ɗa ka sǝr hǝɗǝ nǝ hi. 26 Hyo ɗa na karti na'a, aka naya Tlakǝnǝ hi na karti ya, ya tsǝu takǝbiya hi tǝya ka alenya jul nji aka hya ɗa ka na'a. 27 "Sal ndara malakǝ nda kwa hakǝzǝ ndara kwa daɓǝkǝr na njikǝ mambǝl, njo vakǝna nda na mangu ba tsǝya nda. Bikǝr mashi kǝnda kwa ngyatǝ kǝra nda. (King James Ver: Sal ndara malakǝ nda mutiya ndara kwa daɓǝkǝr na njikǝ mambǝl...)