Alenya Gadlagadla i'i
19
1 Tlakǝ tǝ nar nyi nǝ Musa bǝra, 2 cha dǝkǝtǝ nyi nǝ njir Israila gadlagadla inǝn na. "Hya ngya na karti, aka naya Hyel Tlakǝn hi ndǝ karti ya. 3 Madawa ku pama hi da char nyi sǝli nǝ amanyi ana adanyi, ǝtsǝu cha ɓǝlatǝ Pǝchir Ɓǝlsar Asabat ɗa.Naya ngǝ Hyel Tlakǝn hi. 4 "Ngwa hya da sha hya nǝu katǝ wa, ndara hya ɓatlǝ katǝ ana leng nǝ tsǝshiu aka hya hǝsǝli nǝnda wa. Naya ngǝ Hyel Tlakǝn hi. 5 Ma hyo hatǝmachi nǝ ɓatlǝ ngya mǝnakǝ nǝ Tlakǝu, kǝl hya hatǝmachi nda wi nda gadlagadla tǝ chari, tsa'aka njo dlǝutsi. 6 Tuku njo kwasǝnya kumǝr sǝr hatǝmachi nda pǝshinda tanyi, ǝngǝwa vanya zǝkǝu. Kǝl ja, dǝhǝ sǝnds hǝyadzǝ tǝ pǝchir hanyi makǝrkunyi, kǝl ba nginda na hu'u. 7 Ma nja sǝm nyi pǝshir hanyi makǝrkunyi, cho ɗa ka sǝr hǝɗa. Ya njo dlǝu hatǝmachi nda wa. 8 Dǝhǝ ndǝ nda kwasǝu pǝshir hanyi makǝrkunyi nda, lǝmar bikǝu nyi tǝkǝra cha sǝnyi, aka cha mǝrtǝ sǝr hatǝmachi nda karti nǝ Tlakǝ hiɗahiɗa nyi. Ngǝna ndǝ cho hǝbiya nyi ku pama nji ba tsǝya nyi. 9 Sakanda hyo mǝr tlǝr fa kǝhi ti, ngwa hya da mǝriya kwakwa'a nǝ nya fa kǝhi wa, ǝtsǝu ngwa hya da ɓǝla sha yahinǝ hi hyo vaɗǝ ahir a wur tǝ hya wurandǝ wa. 10 Ngwa hya da mǝriya anab kǝhi hya ɓǝla sha hyo nǝu zhaka mǝtlǝ wa, ngwa hya tsǝm yayar anaɓ kǝhi nda pǝpǝ sǝya hǝ'i wa. Hyo ngyanyi ni nǝ nji ɗali ana mihiɓi inda kwa ngya kǝ'i hi. Naya ngǝ Hyel Tlakǝn hi. 11 "Ngwa da hǝl wa. Ngwa hya da ɗǝah vanya ndǝ wa. Ngwa hya da tla gǝzhi nǝ kǝrnǝ hi wa. 12 A da hyo sǝmfǝla na tlǝm ɗa tǝkǝra gǝzhi wa, aka mǝr ǝnga kwa tashiya tlǝmǝr Hyel kǝ hi. Naya ngǝ Tlakǝu. 13 Nga hya da ɗǝa tuwul kǝ hi ndara hya guratsǝya kar nyi wa. Ngwa da ngyar ki wazǝba ndǝr mǝr tlǝr uzakǝn ku bijinyi bǝra kǝl vanya zǝkǝ wa. 14 Ngwa hya da ngǝl da dada himi wa, ndara hya fiya nyi sǝr tlǝhi nǝ ndǝr wulfǝu cha dla tǝ wa. Ənga hyo ngatǝ lǝvǝr Hyel kǝ hi. Naya ngǝ Tlakǝn hi. 15 "Ngwa hya da chari tari jiri ku nǝuma wa. A da hyo char tazhira nǝ nji ɗalɗali ndara hya la'a sǝlir nji gǝna wa. Aku jiri hyo mǝrtǝnyi nǝuma nǝ tuwul kǝhi. 16 Ngwa hya da pǝ ɓwanya gǝzhi tǝkǝra vanya ndǝ wa, ndara hya mǝr vanya sǝ nda kwa shili na nyi mwandǝzhi nǝ pya tuwul nghǝ wa. Naya ngǝ Tlakǝu. 17 "A da ko ngyar zǝmǝnghǝ ku ɗufwa kǝ wa. Ma vanya ndǝ tǝ mǝr sǝ kǝla tsatsa'a, kǝl ka natǝ nyi bikǝu nyi tǝ babal. Ma cha da ǝngǝ wa, nakǝ ma'a tǝɗǝkǝnyi tǝkǝ bikǝ nǝ kǝra kǝrnghǝ ndani. 18 "A da ko gwa'a lakur ki sukur ndara ka gǝzǝ vanya ndǝ ku ɗufwa kǝ wa, Kǝl nda ka nyida tuwulngha wi kǝrngha. Naya Tlakǝ nga. 19 "Hyo ɓǝlatǝ gadlagadla ɗa. Ngwa hya da ngyar sǝr shishi nǝ ki nda sǝli alenya chuli pampam wa. Ngwa hya da tlǝka chuli sǝu zwazwa mǝtlǝ aku fa zhang wa. A da hyo ha lukutu nda nja tsatǝ ga mbǝtǝ na pa'ua pampam mǝtlǝ wa. 20 "Ma ndǝ tǝ piya na kwar mava, nda a wurtǝ nja mbatǝ ndǝr ǝnda cho hǝdzǝ na vanya ndǝu, ya a ndǝ da ta pǝlenyi wa, ndara mǝrtǝ nyi ka dimur ndǝ wa, yau, kǝl ja, mǝrtǝ nda nǝuma nǝ ɓunda, kǝl nda gwa nja tsanda wa, aka a malanda ta ɗa ka dimur ndǝ wa. 21 Dǝhǝ ka ǝnga ndǝ ndǝnyi kwa shili na gam atǝ gwar nyavi nǝ Madlǝɓa tsǝmǝdza aka sǝr hatǝmachi nǝ zhazhandǝ na bikǝnyi a mar Tlakǝu. 22 Fǝrist ja kwa handanyi tǝmachi nǝ mirga, a nǝ ndǝ nda, a mar Tlakǝu, ana gam hatǝmatci nǝ zhazhanda bikǝ nda cha mǝra, ya njo farna sǝpǝla'a nyi. 23 "Sakanda hya gwa ku hǝ'i nda ga tlǝka kala chuli wu nda yah, ya nǝ sǝma, hya hǝta yayar wuinda ka sǝr hǝɗa nǝ fa makǝrǝu. Aku fa makǝr inga ngwa da sǝm wa. 24 Kǝl ja, aku fa fuwaɗǝkunyi yayar wuinda kwa ɗa ka sǝnda nja dzǝvǝya na karti ana sǝr fala anǝ Tlakǝu. 25 A ku fa tufukunyi ngǝ ja, hyo nau sǝm yayar wuinda. Tǝ wa ǝnga yayar wu kǝ hi kwa nau tsakǝtǝ yah aka hi. Naya Hyel Tlakǝn hi nga. 26 "A da hyo ɗǝ kum na mashi nyi tsǝu tanyi kwa wa.Ngwa hya da mǝr mutiyakur ndara hya hakǝzǝ wa. 27 Ngwa hya da ɓandi kǝra hi na sǝ shishi, ndara hya sǝnda tǝngha hi wa. 28 Ngwa hay da tǝta dza kǝr nǝhi aka sǝ'ingu ndǝ nda tǝ wa. Ya ǝtsǝu ngwa hya da tǝ ɗǝghǝu dzǝn hi wa. Naya Tlakǝ nga. 29 "Ngwa hya da fǝu ku'imahi kǝ hi ku zawarkur aku mbwa'lǝ hǝsǝli i wa. Ma hya mǝr zawarkur ǝnga, a mǝrtǝ hi tar jiri ndani anǝ Tlakǝu, ya hǝ'i nga kwa nyandi dzǝ na shushukur. 30 "Hya ɓǝlatǝ Pǝchir Ɓǝlsar nǝ Asabat ɗa,ya tsǝu hya la'a sǝlir Mbwar Ngyaɗa Nda Karti. Naya Tlakǝ nga. 31 "Ngwa hya da ma'i kyaɗa njir daɓǝkǝr ka jikǝ mambǝl wa, ndara hya gwa'a dǝma tsa mutiya (ndǝr hakǝzǝu).Ma hya mǝr ǝnga, hyo ɗa hiɗahiɗa nyi. Naya Hyel Tlakǝn hi nga. 32 "Hyo hya'atǝ tǝ ta'i ma hyo usar nda ndǝ na shishi pǝrtǝ, hyo hǝtǝnyi sǝli nǝ ndǝ halhal, aka hyo lǝvǝr Hyel kǝ hi nga. Naya Tlakǝ nga. 33 "Ngwa hya da mǝr ɗimikur nǝ mihiɓi nda na ngya ku hǝ'i kǝ hi wa. 34 Dǝhǝ mihiɓi nda na ngya tǝ hǝ'i kǝ hi, hya hǝtǝnyi wi zhang cha ku huɗa zǝmǝn hi, hyo nyida wi kǝrnǝ hi. Aka ɗaka ɗa nahi ma mihiɓi hi tǝ hǝ'i Masar. Naya ngǝ Hyel Tlakǝn hi. 35 "Ngwa hya da char tari jirikur tǝwa mǝr tlǝr na sǝr dǝkǝsǝ nǝ gǝzhi wa, ndara dǝkǝ dzǝgamǝkur, ndara nǝ tǝdǝɓǝkur, ndara nǝ gwangkura vanya sǝu. 36 Kǝl nda sǝr dǝkǝsǝ kǝ hi, nǝ dǝkǝ tǝdǝɓǝkur, ana kǝtas nǝ dǝkǝsǝ, ana kǝtas dǝkǝ gwangkura vanya sǝu, nda ɗa nǝ jiri. Naya ngǝ Hyel Tlakǝn hi nda tǝ fa'abiya hi voatǝ hǝ'i Masar. 37 Hya ɓǝlatǝ gadlagadla ɗa, ana dǝhǝkura tsaubar ɗa, hya nǝubiya nda. Naya Tlakǝ nga.