Piyar Sal ka Mala inda Nja Kati
18
1 Tlakǝ tǝ nary nyi nǝ Musa bǝra, 2 cha ndǝr na njir Israila, cha natǝ nda, "Naya ngǝ Hyel Tlakǝn nǝhi. 3 A da hyo ngya chulkǝ nǝ Marsar mbwa nda hya ɗaka ngatǝ haɗa wa. Ya a da hyo ngya chulkǝ nǝ njir Kan'ana mbwa nǝ yo i ya yi na hi tǝ nǝ wa. A da hyo nǝu gadlagadla kǝnda i wa. 4 Tuku hyo ɗa kǝriwa na tsaubar ɗa, hya ɓǝlatǝ gadlagadla ɗa, ǝtsǝu hya ma'i kwa. Naya ngǝ Hyel Tlakǝ nǝhi. 5 Hyo ɓǝlatǝ gadlagadla ɗa ana tsaubar ɗa. Aka dǝhǝ ndǝ nda ɗa kǝriwa nanda cho uya pi tǝwanda. Naya ngǝ tlakǝu. 6 "Ngwa ka da piya na jikǝ nghǝ da lǝhǝ wa. Naya ngǝ Tlakǝu. 7 Ngwa ka da nǝnyi sǝr kuzhi nǝ adanghǝ tǝwa piya na amanghǝ wa. Nacha ngǝ amanghǝ nga, ngwa da i ka piya na cha pa'a wa. 8 Ngwa da piya na mala adanghǝ wa, nacha ngǝ kwa shili na hǝyatǝvi nǝ adangha. 9 "Ngwa ka da piya na kwamǝnghǝ wa, mada kwara adanghǝ cha ndara kwar amanghǝ cha, mada aku ki kǝhi yanyi nji, ndara tǝ vanya mbwa. 10 Ngwa ka da piya na ajinghǝ wa, mada kwar zǝrnghǝ cha ndara kwanghǝ tǝ yanyi. nacha ngǝ kwa ɗa ka sǝr kuzhi nǝngha. 11 "Ngwa ka da piya na kwamalakǝu nda vanya mala tǝ yiyah nyi nǝ adanghǝ wa, aka kwamǝnghǝ nga cha. 12 "Ngwa ka da piya na kwamǝnya adanghǝ wa, aka jikǝnda cha nda lǝhǝu. 13 A da ko piya na kwamǝnya amanghǝ wa, aka jikǝnda cha nda lǝhǝu. 14 Ngwa ka da piya na mala zamǝnya adanghǝ wa, ngwa da lǝhǝtǝnyi na jigadǝmar piya na cha wa, aka nacha ma'a amanghǝ cha. 15 "Ngwa da piya na mala zǝrnghǝ wa, aka mala zǝrnghǝ cha. Ngwa da piya na cha wa. 16 "Ngwa da piya na mala zamǝnghǝ wa. Nacha ngǝ kwa shili na hǝyatǝvi nǝ zamǝngha. 17 "Ngwa ka da piya na malakǝu ba'a kwanyi tsǝu wa. Ya ngwa da piya ajiny wa, ana kwamalakǝ da kwanyi tǝ yiyah ndara kwmalakǝ nda zǝrnyi. Dǝhǝ nda jikǝ inga da lǝhǝu. Nacha ngǝ sǝr hǝɗǝ cha nda 'ual'ualǝu. 18 A da ko hǝdzǝ na kwamǝnya malanghǝ wa, ndara ka piya na cha ma tǝ wurɗa tsǝu tanyi malanghǝ na pi wa. 19 Ngwa ka da ɗa lǝhǝ na malakǝ aka ka piya nacha aku sakanda cha ku dǝkǝsǝ wa. 20 "Ngwa ka da piya na mala tǝwulnghǝ wa. Mǝr ǝnga kwa gwa'atǝ ko ɗa hiɗahiɗa nyi. 21 "Ngwa ka da lǝnda ngulisha'a nghǝ ka sǝr hatǝmachi nǝ katǝ nda na tlǝm nyi Molekǝ wa, aka mǝr ǝngǝ kwa tashiya Tlǝmǝr Hyel ngh. Naya ngǝ Tlakǝu. 22 "Ngwa ka da piya na sal wi ngǝ kǝ kwa piya na malakǝ wa. Nacha ngǝ sǝr hǝɗǝ cha. 23 "Ngwa ka da piya na sǝr shishi wa, aka ka kwa mǝrtǝ kǝrnghǝ sǝr hǝɗǝu. Malakǝ tsǝu a cho piya na sǝr shishi wa. Nacha ngǝ sǝr hǝɗǝ cha. 24 "Ngwa hya da mǝrtǝ kǝr nǝhi kǝla karti a tǝwa mǝr chulkǝ sǝ inda, aka tǝwa ǝngǝ nji kǝla zǝndǝ Hyel kwa ɗa kǝla karti, nji kǝla zǝndǝ Hyel inda na ngya ku hǝ'i ngǝ tǝvi nahi, nji inda Tlakǝ kwa gǝdla, tsaka hya gwa. 25 Tǝwa ǝnga hǝ'i nda tǝ ɗa kǝla karti, aka ǝnga Tlakǝ kwa mǝrtǝ nda nǝuma nǝ nji inda ngya ku hǝ'i, ya hǝ'i nda kwa chiɗǝkǝbiya nda ɗǝɗǝu tanyi. 26 "Kǝl ja, nahi hyo ɗa kǝriwa nǝ gadlagadla ɗa ana tsaubar ɗa. A da hyo mǝr ma da zhang ku huɗa sǝr hǝɗǝ ingǝ wa, ndara nakǝ zǝr Israila ka ndara nakǝ mihiɓi ka nda na ngya ku pama hi. 27 Aka dǝhǝ nji nda tǝ ngya ku hǝ'i nǝ tǝvi hya shili, mǝrtǝ nda chul ngǝna sǝr hǝɗǝ ii. Tǝwa ǝnga hǝ'i ngǝ tǝ ɗa sǝr hǝɗa. 28 Ma hya mǝrtǝ hǝ'i ngǝ ka sǝ hiɗahiɗa tǝwa mǝr sǝ inga, hǝ'i ngǝ kwa chiɗǝkǝbiya hi, wi nda cha mǝr na nji nda tǝ ngya kwa tǝvi nahi. 29 "Dǝhǝ ndǝ mǝr sǝr hǝɗǝ inga, njo hǝbiya nyi ku pama nji nyi ba tsǝya nyi. 30 Aka ǝnga kǝl hya ɗa kǝriwa nǝ tsaubar ɗa, ǝtsǝu ngwa hya da mǝr mada zhang ku huɗa sǝr mǝr hǝɗǝ ingǝ nji nda ngya ku hǝ'i tǝ mǝr tǝvi nahi wa.